ލަންޑަން (ފެބްރުއަރީ 2) - އިނގިރޭސި ޕްރިމިއާ ލީގުަގައި ރޭ ބޯންމައުތު ދަނޑުގައި 2-0 އިން އެ ޓީމު ބަލިކޮށް ލީގުގެ އެއް ވަނައިގައި ލިވަޕޫލުން ނުވަ ޕޮއިންޓުގެ ލީޑެއް ނަގައިފި އެވެ.
އެއް ވަނައިގައި އޮތް ލިވަޕޫލަށް ވަނީ 23 މެޗުން 56 ޕޮއިންޓް ލިބިފަ އެވެ. ދެ ވަނައިގައި އޮތް އާސެނަލަށް 23 މެޗުން 47 ޕޮއިންޓް ލިބިފައިވާއިރު، ތިން ވަނައިގައި އޮތް ނޮޓިންހަމް ފޮރެސްޓަށް ވަނީ 24 މެޗުން 47 ޕޮއިންޓް ލިބިފަ އެވެ. ފޮރެސްޓުން ވަނީ އިއްޔެ ކުޅުނު މެޗުގައި، 7-0 އިން ބްރައިޓަން އަތުން މޮޅުވެފަ އެވެ.
ބޯންމައުތު ދަނޑުގައި އެންޓޮއިން ސެމެންޔޯ ޖެހި ޝޮޓެއް ދަނޑިއަށް އަމާޒުވިއިރު، ލިވަޕޫލުން ފުރަތަމަ ހާފުގައި ލީޑުނެގީ އެ ޓީމުގެ ކޯޑީ ގަކްޕޯ އަށް ކުރި ފައުލަކަށް ލިބުނު ޕެނަލްޓީ އަކުން މުހައްމަދު ސަލާހު ޖެހި ގޯލުންނެވެ. ބޯންމައުތުގެ ޑޭވިޑް ބްރޫކްސް ފުރަތަަމަ ހާފުގައި ޖެހި ގޯލެއް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަަލައިފައި އޮފްސައިޑް ކަމަށް ނިންމައިފަ އެވެ.
ދެ ވަނަ ހާފުގައި ބޯންމައުތަށް އެއްވަރުކޮށްދޭން ޖަސްޓިން ކްލައިވަޓަށް ލިބުނު ރަނުގެ ފުރުސަތު ވީ ބޭކާރެވެ. މިއީ، ބޯންމައުތުގެ މާކަސް ޓަވެނިއާ ޖެހި ޝޮޓެއް ދަނޑީގައި ޖެހިފައި އޭރިއާތެރެއިން ލިބުނު ބޯޅައަކުން، ކްލައިވަޓް ޖެހި ޝޮޓް ދިޔައީ މާ ބޭރުންނެވެ.
އޭގެ ފަހުން، ކައުންޓަ އެޓޭކެއްގައި ލިވަޕޫލަށް ދެ ވަނަ ގޯލު ޖަހައިދިނީ ސަލާހު އެވެ. މި ގޯލާ އެކު ސަލާހު ވަނީ ލީގުގައި 178 ގޯލު ޖަހައިފަ އެވެ. މިއާ އެކު، ލީގު ތާރީހުގައި އެންމެ ގިނަ ގޯލު ޖެހި ކުޅުންތެރިންގެ ލިސްޓުގައި ސަލާހު ވަނީ ހަ ވަނަ އަށް ޖެހިލައިފަ އެވެ. އެއީ ކުރިން 177 ގޯލާ އެކު، ޗެލްސީގެ ލެޖެންޑް ފްރޭންކް ލަމްޕާޑް އޮތް މަގާމެވެ.
މި މޮޅާ އެކު، ލިވަޕޫލުން ލީގުގައި 19 މެޗު ބަލިނުވެ ހަމަކުރިިއިރު، 11 މެޗަށް ފަހު ބޯންމައުތު މި ވަނީ ބަލިވެފަ އެެވެ.
ލީގުގައި ރޭ ނިއުކާސަލް ޔުނައިޓެޑް ވަނީ އަމިއްލަ ދަނޑުގައި 2-1 އިން ފުލަމް އަތުން ބަލިވެފަ އެވެ.
