ސްރީ ލަންކާގެ ނެގަމްބޯގައި ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ބީޗްވޮލީބޯލް ޗެމްޕިއަންޝިޕްގެ ކުއާޓާ ފައިނަލުން ރާއްޖޭގެ ޕެއާތަކަށް މުބާރާތް ނިންމި ފަސް ވަނައިގައި ނިންމާލަން ޖެހިއްޖެ އެވެ.
އެ ގޮތުން، މީގެ ކުރިން، ރާއްޖޭގެ ފިރިހެން އެއް ވަނަ ޕެއާ، އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް) ވަނީ މީގެ ކުރިން ކަވާ ބީޗް މުބާރާތްތަކުގައި، ދެ ފަހަރު ރަން މެޑަލް އަދި ރިހި މެޑަލް ހޯދައިފަ އެވެ.
އެކަމަކު، މި ފަހަރުގެ މުބާރާތުގެ، ފުރަތަމަ މެޗުގައި ސްރީ ލަންކާގެ ދިލީޕާ އާއި މަލިތުގެ ޕެއާ އަތުން 21-17، 14-21، 11-15 އިން ބަލިވީ އެވެ. އޭގެ ފަހުން، ކަޒަކިސްތާންގެ ގުރިން އާއި މުހައްމަދުގެ ޕެއާ އަތުން 18-21، 21-19، 16-18 އިން އަދި އީރާނުގެ ގަލޭނޯވީ އާއި އަބޯލްހަސަން އަތުން ބަލިވީ 16-21، 11-21 އިންނެވެ.
ކުޑަ ކާއްޓެ އާއި އެޑަމްގެ ޕެއާ، ކުއާޓާ ފައިނަލުގައި ލަންކާގެ އަންޖަނާ އާއި ސަންދުންގެ ޕެއާ އަތުން ބަލިވީ 19-21، 19-21 އިންނެވެ. ރޭންކިން ޕޮއިންޓު ތާވަލުގައި 144 ޕޮއިންޓާ އެކު، ކުޑަކާއްޓެ އާއި އެޑަމްގެ ޕެއާ ފަސް ވަނައިގައި އޮތްއިރު، ރާއްޖޭގެ ދެ ވަނަ ޕެއާ، މުހައްމަދު އަލީ (ޑެންޒޯ) އާއި އަހުމަދު މުހައްމަދު (ކޯކޭ) ގެ ޕެއާ އަށް ވެސް 144 ޕޮއިންޓް ލިބިފައިވެ އެވެ.
ޑެންޒޯ އާއި ކޯކޭގެ ޕެއާ ވަނީ ގްރޫޕްގައި، ބޫޓާންގެ ޕެއާ އެއް ބަލިކޮށްފަ އެވެ. އެ ގޮތުން، ބޫޓާންގެ ޖުމޭ އާއި ޑޯޖީގެ ޕެއާ، އަތުން ޑެންޒޯ އާއި ކޯކޭގެ ޕެއާ މޮޅުވީ، 21-14، 21-12 އިންނެވެ.
ދެން، ކުޅުނު މެޗުތަކަށް ބަލާއިރު، ޑެންޒޯ އާއި ކޯކޭގެ ޕެއާ ވަނީ، ސްރީ ލަންކާގެ އަންޖަނާ އާއި ސަންދުން އަތުންގެ ޕެއާ އަތުން، 11-21، 14-21 އިން، ކަޒަކްސްތާންގެ ޔަކޯވިއޭވް އާއި ބޮގާޓޫގެ ޕެއާ، އަތުން 14-21، 11-21 އިން އަދި ލަންކާގެ ނަތިން އާއި މަދޫޝާގެ ޕެއާ އަތުން 10-21، 15-21 އިން ބަލިވެފަ އެވެ.
ކުއާޓާ ފައިނަލުގައި، ޑެންޒޯ އާއި ކޯކޭގެ ޕެއާ ބަލިވީ ލަންކާގެ ދިލީޕާ އާއި މަލިތުގެ ޕެއާ އަތުން 12-21، 12،21 އިންނެވެ. ލަންކާގެ ދިލީޕާ އާއި މަލިތުގެ ޕެއާ ވަނީ، އެޑަމް އާއި ކުޑަކާއްޓެގެ ޕެއާ ވެސް ގްރޫޕް ސްޓޭޖުގައި ބަލިކޮށްފަ އެވެ.
މި މުބާރާތުގައި ވާދަކުރި ރާއްޖޭގެ އަންހެން ދެ ޕެއާ އަކީ، އަންހެން އެއް ނަމްބަރު ޕެއާ އަކީ ހައްވާ ރާޝިދާ (ހައްވަ) އާއި އައިޝަތު މާޖިދާ (މާޖީ) އެވެ. ދެން ވާދަކުރަނީ އާމިނަތު އަރީޝާ (އަރީ) އާއި ފާތިމަތު ޒީނިޔާ (ޒީ) ގެ ޕެއާ އެވެ. މި ދެ ޕެއާގެ ތެރެއިން މެޗެއް ކާމިޔާބުކުރީ ގްރޫޕް ސްޓޭޖުގައި، ހައްވަ އާއި މާޖީގެ ޕެއާ އިންނެވެ. އެއީ، ބޫޓާނުގެ ޒަންގްމޯ އާއި ލޭކީއާގެ ޕެއާއާ ދެކޮޅަށް ކުޅެގެން، 21-16، 21-08 އިންނެވެ.
ހައްވަ އާއި މާޖީގެ ޕެއާ ދެން ކުޅުނު މެޗުތަކުގެ ނަތީޖާ އަށް ބަލާއިރު، ސްރީ ލަންކާގެ ދެ ޕެއާ އަތުން ބަލިވި އެވެ. އެއީ، ޝެހާނީ އާއި ޗަތުރިކާގެ ޕެއާ އަތުން 07-21، 07-21 އިން އަދި ކަސޫނީ އާއި ވަސަނާ އަތުން ބަލިވީ 11-21، 17-21 އިންނެވެ. މީގެ އިތުރުން، ކަޒަކްސްތާންގެ ރީޔުކޯވާ އާއި ކަރީމޯވާގެ ޕެއާ އަތުން 15-21، 12-21 އިން ބަލިވިއިރު، ކުއާޓާ ފައިނަލުގައި ކަޒަކްސްތާންގެ ކަބުލްބެކޯވާ އާއި އިވާންޗެންކޯގެ ޕެއާ އަތުން 15-21، 08-21 އިން ބަލިވެފައިވެ އެވެ.
ރާއްޖޭގެ ދެ ވަަނަ ޕެއާ ކަމަށްވާ، އަރީ އާއި ޒީގެ ޕެއާ ވަނީ ކުޅުނު ހުރިހާ މެޗުން ނާކާމިޔާބުވެފަ އެވެ. އެ ގޮތުން، ފުރަތަމަ މެޗުގައި ކަޒަކްސްތާންގެ ކަބުލްބެކޯވާ އާއި އިވާންޗެންކޯގެ ޕެއާ އަތުން 14-21، 13-21 އިން ބަލިވިއިރު، ދެން ކުޅުނު މެޗުތަކުގައި، ކިރިގިސްތާންގެ ރަސުލްބެކް ކީޒީ އާއި އައިޓްބެކޯވާގެ ޕެއާ އަތުން ތިން ސެޓު ކުޅެގެން، 21-19، 14-21، 09-15 އިން ބަލިވީ އެވެ.
ޒީ އާއި އަރީގެ ޕެއާ ވެސް ލަންކާގެ ދެ ޕެއާ އަތުން ބަލިވި އެވެ. އެއީ، ލަންކާގެ ދީޕިކާ އާއި ކަސޫނީގެ ޕެއާ އަތުން 18-21، 14-21 އިންނާއި ކުއާޓާ ފައިނަލުގައި ކަސޫނީ އާއި ވަސަނާގެ ޕެއާ އަތުން އަތުން 13-21، 14-21 އިންނެވެ.
ރާއްޖޭގެ އަންހެން ދެ ޕެއާ އަށް ވެސް ރޭންކިންގައި ލިބިފައިވަނީ، ފަސް ވަނަ އެވެ. އެއީ، 144 ޕޮއިންޓާ އެކު އެވެ.
މި ފަަހަރުގެ މުބާރާތުގައި ރާއްޖެ އާއި ލަންކާގެ އިތުރުން، ދެން ވާދަކުރާ ގައުމުތަކަކީ، އިރާން، ބޫޓާން، ކިރްގިސްތާން އަދި ކަޒަކްސްތާން އެވެ.
