ޕެރިސް (ޖެނުއަރީ 23) - ޔުއެފާ ޗެމްޕިއަންސް ލީގުގައި ރޭ މެންޗެސްޓާ ސިޓީ އާއި ބަޔާން މިއުނިކުން ކުޅުނު މެޗުތަކުން ބަލިވިއިރު، އިންޓަ މިލާނާއި އާސެނަލުން މުބާރާތުގެ ގަދަ 16 އިން ފުރުސަތު ހޯދުމާ ގާތަށް ޖެހިލައިފި އެވެ.
ސިޓީން ދެ ގޯލުގެ ލީޑެއް ނެގި ނަމަވެސް ޕީއެސްޖީ ވަނީ 4-2 އިން މޮޅުވެފަ އެވެ. ފެޔަނޫޑުން ވަނީ 3-0 އިން ބަޔާން މިއުނިކް ބަލިކޮށްފަ އެވެ. އަދި ލައުޓާރޯ މާޓީނޭޒްގެ ގޯލުން 1-0 އިން ސްޕާޓާ ޕްރާގު އަތުން އިންޓަ މޮޅުވިއިރު، އާސެނަލުން ވަނީ 3-0 އިން ޑިނަމޯ ޒަގްރެބް ބަލިކޮށްފަ އެވެ.
އާރްބީ ސަލްޒްގާބް އަތުން 5-1 އިން ރެއާލް މެޑްރިޑް ވަނީ މޮޅުވެފަ އެވެ.
ޕެރިހުގައި ކުޅުުނު މެޗުގެ ދެ ވަނަ ހާފުގެ ކުޅުން ފެށިގެން މާ ގިނައިރެއް ނުވެ، ތިން މިނިޓް ތެރޭ ސިޓީން ދެ ގޯލު ޖެހި އެވެ. މި ގޯލުތައް ޖެހީ ޖެކް ގްރީލިޝް އާއި އާލިން ބްރައުޓް ހާލަންޑް އެެވެ. އޭގެ ފަހުން، ހަތަރު ވަރަކަށް މިނިޓް ތެރޭ ދެ ގޯލު ޖަހައި، ޕީއެސްޖީން އެއްވަރުކުރި އެވެ. އެ ޓީމުގެ ލަނޑުތައް ޖެހީ، އޮސްމާން ޑެމްބެލޭ އާއި ބްރެޑްލީ ބާކޮލާ އެވެ.
ޕީއެސްޖީން މޮޅުވީ ޖޮއާއޯ ނެވޭސް އާއި ގޮންޒާލޯ ރާމޯސް ޖެހި ގޯލުތަކުންނެވެ.
މި މެޗުން މޮޅުވެ، ޕީއެސްޖީން ވަނީ ޕްލޭއޮފްގެ ޖާގައެއް ހޯދުމުގެ ފުރުސަތު ފަހިކޮށްފަ އެވެ. އެކަމަކު، މި މެޗުން ބަލިވެ، ސިޓީ އަށް ޗެމްޕިއަންސް ލީގުގެ ގަދަ 24 ޓީމުގެ ތެރެއިން ފުރުސަތު ގެއްލި މުބާރާތުން ކެޓުމުގެ ބިރު ވަނީ ބޮޑުވެފަ އެވެ.
ފެޔަނޫޑުން ބަޔާން ބަލިކުރި މެޗުގައި ލަނޑުތައް ޖެހީ، ސަންޓިއާގޯ ހިމެނޭޒް ދެ ގޯލާއި އަޔަސޭ އުއޭޑާ އެވެ. މި ނަތީޖާއާ އެކު ބަޔާން އޮތީ ތާވަލުގެ 15 ވަނައިގަ އެވެ. އެއީ ހަތް މެޗުން 12 ޕޮއިންޓް ހޯދައިގެންނެވެ. އަދި 11 ވަނައިގައި އޮތް ފެޔަނޫޑަށް ހަތް މެޗުން ވަނީ 13 ޕޮއިންޓް ލިބިފަ އެވެ.
ސަލްްޒްބާގް ކޮޅަށް ރެއާލުން ލަނޑުތައް ޖެހީ ރޮޑްރީގޯ އާއި ވިނީޝިއުސް ޖޫނިއާ، ކޮންމެ ކުޅުންތެރިއަކު ދެ ގޯލާއި ކީލިއަން އެމްބާޕޭ ގޯލެކެވެ. ސަލްޒްބާގުގެ ލަނޑު ޖެހީ، މެޑްސް ބިޑްސްޓަރްޕް އެވެ. މި މޮޅާ އެކު ރެއާލް އޮތީ ހަތް މެޗުން 12 ޕޮއިންޓާ އެކު 16 ވަނައިގަ އެވެ.
އަމިއްލަ ދަނޑުގައި ކުޅުނު އާސެނަލުން ޑިނަމޯ ޒަގްރެބް ކޮޅަށް ލަނޑުތައް ޖެހީ ޑެކްލަން ރައިސް، ކައި ހަވާޓްޒް އަދި މާޓިން އޮޑެގާޑް އެވެ. އާސެނަލް އޮތީ ލީގުގެ ތިން ވަނައިގަ އެެވެ. އެއީ ހަތް މެޗުން 16 ޕޮއިންޓް ހޯދައިގެންނެވެ. އަދި ހަތަރެއްގައި އޮތް އިންޓަ އަށް ވެސް ހަތް މެޗުން ވަނީ 16 ޕޮއިންޓް ލިބިފަ އެވެ.
