ވެރިކަން ހިންގާ، ޕީޕަލްސް ނެޝަނަލް ކޮންގްރެސް އަށް މެންބަރު އިތުރުކުރަން އިލެކްޝަން ކޮމިޝަނަށް ހުށަހެޅި ވަގު ފޯމުތަކުގެ މައްސަލަ ސީރިއަސް މައްސަލައެއް ގޮތުގައި ބަލަމުންދާ ކަމަށް ފުލުހުން ބުނި ކަމަށް އެމްޑީޕީން މިއަދު ބުނެފި އެވެ.
އެމްޑީޕީގެ ލީގަލް ޓީމުން ފުލުހުންނަށް ހުށަހަޅާފައިވާ އެ ޕާޓީގެ 96 މެންބަރެއް ވަގަށް ޕީއެންސީއަށް ވެއްދި މައްސަލައިގައި ހޯދިފައިވާ ކުރިއެރުން ބެލުމަށް ފުލުސް އޮފީހަށް ދިޔުމަށްފަހު ނޫސްވެރިންނަށް މައުލޫމާތު ދެމުން އެ ޕާޓީގެ ތަރުޖަމާން އަނަސް އަބްދުއްސައްތާރު ވިދާޅުވީ ވަގު ފޯމުތަކުގެ މައްސަލަ ސީރިއަސް މައްސަލައެއް ގޮތުގައި ބަލަމުންދާ ކަމުގެ ޔަގީންކަން ފުލުހުން ދީފައިވާ ކަމަށެވެ.
މިގޮތުން ޑީއެންއާރަށް ކުރެވޭ ތުހުމަތުތަކާ އެކު އެ މުއައްސަސާ ހިމާޔަތް ކުރުމަށް ފުލުސް އޮފީހުގައި އެދުމުން، އެކަމާ ގުޅިގެން ފުލުހުން ވެސް ކަންބޮޑުވުން ފާޅު ކުރެއްވި ކަމަށް އަނަސް ވިދާޅުވި އެވެ.
"ފުލުހުން ވެސް މިއަދު ބައްދަލުވުމުގައި ފާހަގަކުރެއްވި، ހަމައެކަނި އަޅުގަނޑުމެން ފާހަގަކުރެއްވި ކަންތައްތައް އެކަންޏެއް ނޫނޭ އަންނާނީ. ޕާސްޕޯޓަށް ވެސް މި އަންނަ ވަރަށް ބޮޑު ސެކިއުރިޓީ ބްރީޗެކޭ ވާނީ. އެހެންވީމަ އެބޭފުޅުން ވަރަށް ބޮޑަށް ޔަގީންކަން ދެއްވި އެ މުއައްސަސާގެ މުހިންމުކަމާއި ހައްސާސްކަން ފާހަގަކުރެއްވި. އަދި މި މައްސަލައަކީ ސީރިއަސް މައްސަލައެއް ގޮތުގައި ބައްލަވަމުން ކުރިއަށްދާ ކަމަށް ވެސް އެބޭފުޅުން ހިއްސާ ކުރެއްވި،" އަނަސް ވިދާލުވި އެވެ.
ޕީއެންސީން މަސައްކަތް ކުރަމުންދަނީ އެ ޕާޓީއަށް އިލެކްޝަންސް ކޮމިޝަނުން ފައިސާ ހޯދުމަށް މެންބަރުން ވެއްދުނު ގޮތަކަށް ވައްދަން ކަމަށް ވެސް އޭނާ ފާހަގަކުރެއްވި އެވެ.
އެމްޑީޕީގެ ލީގަލް ޓީމުގެ ހެޑް މަހްފޫޒް ސައީދު ވިދާޅުވީ ވަގު ފޯމުތަކުގެ މައްސަލަ ހުށަހެޅި މީހުންގެ ބަޔާން ނަގައި، ފިންގާ ޕްރިންޓް ތަހުލީލު ކުރުމުގެ މަސައްކަތް ފުލުހުން ކުރަމުންދާ ކަމަށެވެ.
ނަމަވެސް އެމްޑީޕީން ހުށަހަޅާފައިވާ މައްސަލަތަކުގެ އެއްވެސް ތަފްސީލެއް މިއަދުގެ ބައްދަލުވުމަށް ފުލުހުން ހޯދާފައި ނުވާތީ، އެކަން އެނގިފައި ނުވާ ކަމަށް މަހްފޫޒް ވިދާޅުވި އެވެ.
"އެ މައްސަލަތައް ވެސް ތަހުގީގު ކުރައްވާނެ ކަމުގެ ޔަގީންކަން ދެއްވި. އަޅުގަނޑުމެން ޕާޓީ މެދުވެރިކޮށް ޕޮލިހަށް މައްސަލަ ހުށަހެޅި ބޭފުޅުންނަށް ދަންނަވާލަން ބޭނުން ފުލުހުންގެ ފަރާތުން އެބޭފުޅުންނަށް ގުޅުއްވާނެ. އެބޭފުޅުން ބަޔާން ދެއްވައި ފުލުހުންނަށް އެ މައްސަލައިގެ ތަހުގީގުގައި އެއްބާރުލުން ދެއްވުމަކީ ވަރަށް މުހިންމު ކަމެއް،" މަހްފޫޒް ވިދާޅުވި އެވެ.
ވަގު ފޯމުތަކުގެ މައްސަލައިގައި ޕީއެންސީގެ ރަޖިސްޓްރާގެ އިތުރުން ފޯމުތަކުގައި ހެކިވެރިއެއްގެ ގޮތުގައި އެންމެ ގިނައިން ސޮއިކުރެއްވި ވިލިމާލޭ ދާއިރާގެ މެންބަރު މުހައްމަދު އިސްމާއިލްއާ ފުލުހުން ސުވާލު ކޮށްފައި ނުވާތީ، އެކަން އަވަސް ކުރުމަށް ވެސް އެދިފައިވާކަން މަހްފޫޒް ފާހަގަކުރެއްވި އެވެ.
އެމްޑީޕީގެ 3،000 އަށްވުރެ ގިނަ މެންބަރުން ޕީއެންސީއަށް ވަގަށް ވައްދާފައިވާ ކަމަށް އެ ޕާޓީން ތުހުމަތު ކުރެ އެވެ. އެގޮތުން އޭގެ ތެރެއިން ބައެއް މައްސަލަތައް އިލެކްޝަންސް ކޮމިޝަންގެ އިތުރުން ފުލުހުންނަށް ވެސް ވަނީ ހުށަހަޅާފަ އެވެ.
