ވެރިކަން ކުރާ، ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެންބަރު އިތުރުކުރަން އިލެކްޝަން ކޮމިޝަނަށް ހުށަހެޅި ވަގު ފޯމުތަކުގެ މައްސަލަ ތަހުގީގު ކޮށްދިނުމަށް އެދި އިދިކޮޅު އެމްޑީޕީން ހިއުމަން ރައިޓްސް ކޮމިޝަނަށް ވެސް މައްސަލައެއް ހުށަހަޅައިފި އެވެ.
އެމްޑީޕީގެ އޮފިޝަލެއް "އަދަދު" ނޫހަށް ބުނީ އެޗްއާރުސީއެމަށް އެ ޕާޓީން ހުށަހެޅީ ރައްޔިތުންތަކެއްގެ ޒާތީ މައުލޫމާތު ވަގަށް ނަގައިގެން ޕީއެންސީއަށް މީހުން ވެއްދި މައްސަލަ ކަމަށެވެ.
"އެއީ އަސާސީ ހައްގަކަށް އަރައިގަތުމުގެ އަމަލަކަށް ވާތީ ޒާތީ މައުލޫމާތު ވަގަށް ނަގައިގެން ޕީއެންސީއަށް މީހުން ވެއްދި މައްސަލަ އެމްޑީޕީގެ ފަރާތުން އެޗްއާރުސީއެމަށް ހުށަހެޅީ،" އެމްޑީޕީގެ އޮފިޝަލް ބުންޏެވެ.
ވަގު ފޯމުތައް ފުރައިގެން އާންމުން ޕީއެންސީއަށް ވެއްދި މައްސަލައިގައި ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ. އަދި އޭގެ އެތައް މައްސަލައެއް މިހާރު ވަނީ ފުލުހުންނަށް ވެސް ހުށަހަޅައިފަ އެވެ. ނަމަވެސް އެ މައްސަލަތައް ތަހުގީގު ކުރަމުންދާކަމެއް ފުލުހުން ނުބުނެ އެވެ.
ރައްޔިތުންގެ ޒާތީ މައުލޫމާތު ވަގަށް ނަގައިގެން މީހުން ޕީއެންސީއަށް ވެއްދި ކަމަށް ކުރާ ތުހުމަތުތަކާ ގުޅޭ ގޮތުން މިއަދު ޑީއެންއާރުގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ތަކުރާރުކޮށް ނޫސްވެރިން ސުވާލު ކުރަން ފެށުމުން އެތަނުގެ ވެރިން ވަނީ މީޑިއާއަށް ފިލައިފަ އެވެ.
ނަމަވެސް ވަގު ފޯމު ކަމަށް ބެލެވޭ ފޯމުތައް ފުރީ ޑީއެންއާރު ހިންގާ އޮފީހުގެ ތެރޭގައި ކަމަށް މިއަދު އެތަނުގެ ވެރިން އެއްބަސްވި އެވެ. ޑީއެންއާރްއިން ބުނީ ވަގު ފޯމު ކަމަށް ބެލެވޭ ފޯމުތައް ފުރުމުގެ މަސައްކަތް ކުރި މަންޒަރުގެ ފޮޓޯތައް ނަގާފައި ވަނީ އެތަނުގެ މީޓިން ރޫމުގައި ކަމަށެވެ.
ވަގު ފޯމު ކަމަށް ބެލެވޭ ފޯމުތައް ފުރުމުގެ މަސައްކަތް ކުރި ތަނުގައި ހޯމް މިނިސްޓްރީގެ ޑެޕިއުޓީ މިނިސްޓަރު އަދި ޑީއެންއާރުގެ ވެރިޔާ އަހުމަދު އާލީ ވެސް ހުންނެވި އެވެ. އެކަމަކު، އާލީ މިއަދު ވިދާޅުވީ އޭނާ އެތަނަށް ދިޔައީ ހަމައެކަނި ޕިއްޒާ ކާން ކަމަށެވެ. ނަމަވެސް، ވަގު ފޯމު ކަމަށް ބެލެވޭ ފޯމު ފުރި މަންޒަރުގެ ފޮޓޯތައް ލީކުވިއިރު، ބައެއް ފޯމުތަކާއެކު އާލީ ވެސް ހުންނެވި އެވެ.
ނޫސްވެރިންގެ ސުވާލުތައް ވަކި ހިސާބަކުން ހޫނުވުމުން އާލީ އާއި ހޯމް މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު އިބްރާހިމް ނޫސްވެރިންނަށް ފިލައި، އޮފީސް ތެރެއަށް ވަދެ ވަލު ދޮރާށިން ނުކުމެ ފިލީ އެވެ. އެ ދެ ބޭފުޅުން ފިލީ އެ ދެ ބޭފުޅުންގެ ގަމީހުގައި ނޫސްވެރިން ހަރު ކުރި ވަޔާލެސް މައިކުތަކާ ވެސް އެކު އެވެ.
