މިލާން (ޖެނުއަރީ 16) - އިޓާލިއަން ލީގުގައި ރޭ ބޮލޯނިއާ އަށް 2-2 އިން އިންޓަ މިލާނާ އެއްވަރުކޮށް، އެ ޓީމު ލީގުގެ ރޭހުގައި ކުރިއަށްދިއުމުގެ ފުރުސަތެއް ހުއްޓުވައިފި އެވެ.
ލީގުގެ އެއް ވަނައިގައި އޮތް ނަޕޯލީ އަށް 20 މެޗުން 47 ޕޮއިންޓް ލިބިފައިވާއިރު، ރޭގެ ނަތީޖާއާ އެކު އިންޓަ އަށް 19 މެޗުން 44 ޕޮއިންޓް ވަނީ ލިބިފަ އެވެ. އިންޓަ އިން މެޗު ހަމަކުރާއިރު، ނަޕޯލީއާ ޕޮއިންޓުގެ ގޮތުން އެއްވަރުކޮށް، ލީގުގެ އެއް ވަނަ އަށް އަރަން ފުރުސަތު އެބައޮތެވެ. އެކަމަކު، ރޭގެ މެޗުން އިންޓަ އަށް މޮޅުނުވެވުމުން، މެޗު ހަމަކުރާއިރު އެއް ވަަނައިގައި ލީޑެއް ނެގުމުގެ ފުރުސަތު ގެއްލުނީ އެވެ.
ތިން ވަނައިގައި އޮތް އެޓަލަންޓާ އަށް ވަނީ 20 މެޗުން 43 ޕޮއިންޓް ލިބިފަ އެވެ.
އިންޓަ ދަނޑުގައި ރޭ ކުޅުނު މެޗުގެ 15 ވަނަ މިނިޓްގައި ބޮލޯނިއާ އިން ލީޑުނެގީ، ސަންޓިއާގޯ ކަސްޓްރޯ ޖެހި ގޯލުންނެވެ. އޭގެ ހަތަރު މިނިޓް ފަހުން، ޑެންޒެލް ޑަމްފްރީސް ވަނީ ގޯލެއް ޖަހައި، ނަތީޖާ ހަމަހަަމަކޮށްފަ އެވެ.
ފުރަތަމަ ހާފުގެ އިތުރުވަގުތުގައި، އިންޓަ އިން ލީޑުނެގީ ލަޓައުރޯ މާޓީނޭޒް ޖެހި ގޯލުންނެވެ. މިއީ، މި ސީޒަނުގެ 26 މެޗުން މާޓީނޭޒް ޖެހި ނުވަ ވަނަ ގޯލެވެ. ބޮލޯނިއާ އިން ނަތީޖާ ހަމަހަމަކުރީ އެމީލް ހޯލްމް ޖެހި ގޯލުންނެވެ.
