ކުރިން އަމަލު ކުރަމުން އައި ގޮތް ބަދަލުކޮށް މޯލްޑިވްސް ވޯޓާ އެންސް ސްވަރޭޖު ކޮމްޕެނީ (އެމްޑަބްލިއުއެސްސީ) ގެ ކަލެކްޝަން ރަނގަޅު ކުރުމަށް ކަމަށް ބުނެ އެއް މަހުގެ ބިލު ނުދެއްކިޔަސް، ފެނުގެ ހިދުމަތް ކަނޑާލަން އެ ކުންފުނިން ނިންމައިފި އެވެ.
އެމްޑަބްލިއުއެސްސީގެ އެމްޑީ އަބްދުލް މަތީން މުހައްމަދު "އަދަދު" އަށް ވިދާޅުވީ އެ ކުންފުނީގައި ކަންކުރަން އޮންނަ އުސޫލަކީ, ކޮންމެ މަހެއްގެ ވެސް ބިލު ނުދައްކައިފި ނަމަ ފިޔަވަޅު އަޅަން ޖެހޭ ގޮތަށް ކަމަށެވެ.
ނަމަވެސް ކުރީގެ މެނޭޖުމަންޓުތަކުން މި އުސޫލާ އެއް ގޮތަށް ފިޔަވަޅު ނާޅާ ކަމަށް ފާހަގަކުރައްވައި, މަތީން ވިދާޅުވީ އެއީ ކުންފުނީގެ ހިންގުން ހަރުދަނާ ނުވުމުން ކަންކުރަމުން އައި ގޮތް ކަމަށެވެ. އަދި ކުރިއަށް އޮތް ތަނުގައި އެންމެނަށް ހަމަހަމަ އުސޫލެއްގެ ދަށުން ބިލުގައި އޮންނަ ތާރީހަށް ބިލު ނުދައްކައިފިނަމަ ފިޔަވަޅު އަޅުމުން ގެންދާނެ ކަަމަށް އޭނާ ވިދާޅުވި އެވެ.
"އަޅުގަނޑުމެންނަށް ކުރީގެ ވާހަކަތަކެއް ދެއްކުމުގެ މާނައެއް ނެތް. މިސާލަކަށް ކުރީގައި އެކަން ކުރީ ކިހިނެއް ހެއްޔޭ. ހަ މަސް ދުވަހު ހުރިހޭ. އަށް މަސް ދުވަހު ހުރިހޭ. އެބަހުރި ލޭޓްވެފައި. އެއީކީ ކޮންމެހެން އެ އޮންނަ އުސޫލުގެ ދަށުން ބަހައްޓާފައި އެއްޗިއްސެއް ނޫން. އަނެއްހެން ދަންނަވާ ކަމަށްވަންޏާ ކަލެކްޝަންގެ އިން އެފިޝިއަންސީ އެ ފެންނަނީ،" މަތީން ވިދާޅުވި އެވެ.
"އެއް ޒަމާނެއްގައި އިން އެފިޝިއަންޓްކޮށް ތަނެއް އޮތަތީވެ، ކޮންމެހެން ނުޖެހޭ އިން އެފިޝިއަންޓްކޮށް އޮންނާކަށް. ދެން އަނެއްކާ އަނެއް ކަމަކީ ހުރިހާ އެންމެންނާ ދޭތެރޭ ވެސް އެއް އުސޫލަކުންތާ އަމަލު ކުރެވެންވާނީ. ބިލެއް އަޅުގަނޑުމެން މި ފޮނުވަނީ ތާރީހެއް ކަނޑައަޅާފައި. އެހެންވެއްޖެއްޔާ އެ ތާރީހެއް ހަމަވީމަ، ފިޔަވަޅު އެޅެންޖެހޭނެތާ އެންމެންނާ ދޭތެރޭ ވެސް އެއް އުސޫލަކުން. ދެން އޭތި އެއް ބަޔަކަށް ހަ މަސް ދުވަސް، އަނެއް ބަޔަކަށް އަށް މަސް ދުވަސް. އެއީކީ ވެސް އުސޫލެއް ނޫންތާ ދެއްތޯ."
ގިނަ މީހުން ބިލުތައް ދެއްކުމުގައި ފަރުވާތެރި ކަމަށާއި ދައްކަން ޖެހޭ ބިލުތައް ގަވާއިދުން ދެއްކުމަކީ ކުންފުނި ރަނގަޅަށް ހިންގުމަށް ވެސް މުހިންމު ކަމަށް މަތީން ވިދާޅުވި އެވެ. އަދި ބިލު ނުދައްކާ މީހުންނަށް ކުރީބައިގައި އެކަން އީމެއިލް ނުވަތަ ފޯނުގެ ޒަރިއްޔާއިން އެސްއެމްސް ކޮށްގެން އަންގަމުންދާނެ ކަމަށް އޭނާ ވިދާޅުވި އެވެ.
"ކޮންމެ ގޮތެއް ވިޔަސް ގެއަށް އައިސްފައި އޮންނަ ބިލެއް އެއީ. ކުރަން ޖެހޭ ހަރަދެއް އަސްލު އެއީ. މިސާލަކަށް ކަރަންޓަށް ވިޔަސް، ފެނަށް ވިޔަސް، ފޯނަށް ވިޔަސް އެހެން ހުރިހާ އެއްޗަކަށް ވިޔަސް، އެ ބިލުތައް ސެޓްލް ނުކޮށް ހުންނަ ކަމަށްވާނަމަ ހަމަ އަނެއްކާ ވެސް އަނެއް މަހަށް އިތުރު ބިލުތަކެއް ދާނީ. ގޭދޮށުގެ ހަރަދުތައް ބެލެހެއްޓުމުގައި ފުދޭ ވަރަކަށް ގިނަ މީހުން ޑިސިޕްލިން އަސްލު" އޭނާ ވިދާޅުވި އެވެ.
ނަމަވެސް މަތީން ވިދާޅުވީ ބޮޑު ކަމެއް ދިމާވެގެން ބިލު ނުދެއްކޭފަދަ ހާލަތުގައި ލިޔުމުން އެކަން ބަޔާންކޮށް ފޮނުވުމުން، އެކަމުގެ ކުޑަބޮޑު މިނަށް ބެލުމަށް ފަހު ލުއިތައް ދެމުންދާނެ ކަމަށެވެ.
އެމްޑަބްލިއުއެސްސީން ކުރިން އަމަލު ކުރަމުން އައި ގޮތުން އެއް މަހު ބިލު ނުދެއްކި ނަމަވެސް، ފެން ކަނޑައެއް ނުލަ އެވެ. އެގޮތުން ބިލު ދައްކަން ތިން މަސް ދުވަހުގެ ފުރުސަތެއް އާންމު ގޮތެއްގައި ދެ އެވެ.
