ސިޔާސީ ޕާޓީތަކަށް މެންބަރުން އިތުރުކުރުމަށް އާންމުންގެ ޒާތީ މައުލޫމާތުގެ ނަހަމަ ބޭނުންކޮށް ވަގު ފޯމުތަކެއް އިލެކްޝަން ކޮމިޝަން (އީސީ) އަށް ހުށަހަޅަމުންދާ މައްސަލަތައް ބޮޑުވެ، މި މަހުގެ ނިޔަލަށް ޕާޓީތަކަށް މެންބަރުން ވެއްދުން މެދުކަނޑާލަން ނިންމާފައިވާ ކަމަށް އީސީ އިން ބުނެފި އެވެ.
މިހާރު އެންމެ ބޮޑަށް ފެންމަތިވެފައިވަނީ ވެރިކަން ހިންގާ، ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެންބަރުން އިތުރުކުރަން ވަގު ފޯމުތައް ހުށަހެޅި މައްސަލަ އެވެ. އެ މަސައްކަތުގައި ސަރުކާރުގެ ވެރިންނާއި މަޖިލިސް މެންބަރުންވެސް ބައިވެރިވެފައިވާއިރު ވަގު ފޯމުތަކެއް ހުށަހެޅި ކަމަށް އެ ޕާޓީން އެއްބަސްވެފައިވެ އެވެ.
އީސީއިން މިރޭ ނެރުނު ބަޔާނެއްގައި ބުނީ، ސިޔާސީ ޕާޓީތަކަށް މެންބަރުން ވެއްދުން މެދުކަނޑާލާފައިވަނީ ޖެނުއަރީ 30، އާ ހަމައަށް ކަމަށެވެ. އެކަން ކުރަނީ މެންބަރުން ވެއްދުމުގެ ނިޒާމު ހަރުދަނާކުރުމަށް ކަމަށެވެ.
"މިގޮތަށް ނިންމި ނަމަވެސް 'މައި ޕޯޓަލް' މެދުވެރިކޮށް ޕާޓީން ވަކިވުމުގެ ހިދުމަތް މެދުނުކެނޑި ކުރިއަށްދާނެ،" އީސީން ބުނެފައިވެ އެވެ.
ވަގު ފޯމުތަކުގެ މައްސަލަ ފަޅައިގެން ދިޔައީ ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓޭ) ގެ ނަމުގައި ވަގު ފޯމެއް ހުށަހަޅައިގެން އެ ފޯމު ޕްރޮސެސްކޮށް އޭނާގެ ރެޖިސްޓްރީ ޕީއެންސީއަށް ބަދަލުކުރިކަން ފަޅައިއެރުމުންނެވެ. އެ މައްސަލާގައި ޒިންމާވާ ފަރާތްތަކާ ދެކޮޅަށް ފިޔަވަަޅު އަޅާނެ ކަމަށް އީސީން ވަނީ ބުނެފަ އެވެ.
މި ނޫހާ ވާހަކަ ދެއްކި ޕީއެންސީގެ ބައެއް އިސް އޮފިޝަލުން ވިދާޅުވަނީ ވަގު ފޯމު ފުރައިގެން އެ ޕާޓީއަށް ވެއްދި މީހުންގެ އަދަދު އެތައް ހާހަކަށް އަރާނެ ކަމަށެވެ. ވަގު ފޯމު ފުރުމުގެ މަސައްކަތް ކުރި އެއް ތަނަކީ ޕީއެންސީގެ ހަރުގެ ކަމަށް ވެސް އެ ޕީއެންސީން ވާހަކަ ދެއްކި ބައެއް މީހުން ބުންޏެވެ.
ސަރުކާރަށާއި ޕީއެންސީއަށް މިކަމުގައި އެތައް ތުހުމަތެއް އަމާޒުވެފައިވަނިކޮށް މިއަދު ވަނީ، ވަގު ފޯމުތައް ކަމަށް ބެލެވޭ ފޯމުތަކެއް ފުރުމުގެ މަސައްކަތް ކުރިއިރު އެތަނުގައި ހޯމް މިނިސްޓަރު އަލީ އިހުސާން ހުންނަވާ މަންޒަރު ފެންނަ ފޮޓޯތަކެއް ލީކުވުމަށެވެ. އެ ފޮޓޯތަކުން ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ހިންގެވުމާ ހަވާލުވެ ހުންނެވި ހޯމް މިނިސްޓަރީގެ ޑެޕިއުޓީ މިނިސްޓަރު އަހުމަދު އާލީ ވެސް ފެނެ އެވެ.
މިކަމާ ގުޅިގެން އިހުސާނުގެ އިތުބާރު ނެތްކަމުގައި މައްސަލައެއް ރައްޔިތުންގެ މަޖިލީހަށް ހުށަހެޅުމަށް އިދިކޮޅު އެމްޑީޕީގެ ޕީޖީ ގްރޫޕުން ވަނީ ނިންމާފަ އެވެ.
