ޓިއުރިން (ޖެނުއަރީ 15) - އިޓާލިއަން ލީގުގައި ރޭ އެޓަލަންޓާއާ ދެކޮޅަށް ކުުޅުނު މެޗުން ޔުވެންޓަސްއާ 1-1 އެއްވަރުވެއްޖެ އެވެ.
މިއީ މި ފަހަރުގެ ލީގުގައި ބަލިނުވެ އޮތް ޔުވެންޓަސް އިން އެއްވަރުވެގެން ނިމުނު 13 ވަނަ މެޗެވެ. މިއީ، 2004/2005 ވަަނަ ސީޒަނުގައި އިންޓަ މިލާނުން ފުރަތަމަ 20 މެޗުގެ ތެރެއިން 14 މެޗުން އެއްވަރުވި ފަހުން، ފުރަތަމަ 20 މެޗުގެ ތެރެއިން އެންމެ ގިނަ ފަަހަރު ޓީމެއް އެއްވަރުވި ލީގު ސީޒަނެވެ.
ލީގުގެ ފުރަތަަމަ 20 މެޗު ބަލިނުވެ، އާ ކޯޗު، ތިއާގޯ މޮޓާގެ އިރުޝާދުގެ ދަށުން ޔުވެންޓަސް އިން ނިންމާލިއިރު، އެ ޓީމު އޮތީ ލީގު ތާވަލުގެ ފަސް ވަަނައިގަ އެެވެ. އެއީ 34 ޕޮއިންޓާ އެކު އެވެ. އެއް ވަަނައިގައި އޮތް ނަޕޯލީ އަށް 20 މެޗުން ވަނީ 47 ޕޮއިންޓް ލިބިފަ އެވެ. ދެ ވަނައިގައި އޮތް އިންޓަ މިލާނަށް 18 މެޗުން 43 ޕޮއިންޓް ލިބިފައިވެ އެވެ.
އެޓަލަންޓާ ދަނޑުގައި ކުޅުނު މެޗުގެ ފުރަތަމަ ހާފުގައި ލަނޑެއް ޖެހޭތޯ ޔުވެންޓަސް އާއި އެޓަލަންޓާ އިން ކުރި މަސައްކަތް ކާމިޔާބެއްނުވި އެވެ.
އެކަަމަކު، ދެ ވަނަ ހާފު ފަށައިގެން، ނުވަ މިނިޓް ތެރޭ ޔުވެންޓަސް އިން ލީޑުނެގި އެވެ. މި ލަނޑު އެ ޓީމަށް ޖަހައިދިނީ ޕިއޭރޭ ކަލޫލޫ އެވެ. މެޗުގެ 54 ވަނަ މިިނިޓްގައި ކަލޫލޫ ޖެހި ބޯޅަ ގޯލަށް ވަނީ ހަނި އޭންގަލުންނެވެ.
ޔުވެންޓަސް އިން މި މެޗު ކާމިޔާބުކުރާނެ ކަމަށް ބެލެވިފައި އޮއްވައި، އެޓަލަންޓާ އިން އެއްވަރުކުރީ މެޗުގެ 78 ވަނަ މިނިޓްގަ އެވެ. މި ގޯލު ޖަހައިިދިނީ އިޓަލީގެ ގައުމީ ޓީމުގެ ފޯވާޑް، މަޓެއޯ ރެޓެގީ އެވެ. މި މެޗުގައި އެޓަލަންޓާ އިން ފޮނުވާލި ގިނަ ހަމަލާތަކެއް ޔުވެންޓަސްގެ ކީޕަރު، މިޝޭލޭ ޑި ގްރެގޯރިއޯ ވަނީ މަތަކޮށްފަ އެެވެ.
