ސަރުކާރު ހިންގާ ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) އަށް މެންބަރުން އިތުރު ކުރަން ވަގު ފޯމު ފުރި ކަމަށް ބުނާ މީހުންގެ ފޮޓޯ ހަރުކުރުމުން އެމްޑީޕީގެ ހަރުގެއަށް ކަޅުތެޔޮ ޖަހައިފި އެވެ.
ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރު މުހައްމަދު އިސްމާއީލް އާއި ސަރުކާރުގެ އިސް މަގާމުތަކުގައި ތިއްބެވި ބައެއް ބޭފުޅުންނާއި ޕީއެންސީގެ އެކްޓިވިސްޓުންތަކެއްގެ ފޮޓޯ، ކަރުދާހަށް ޕްރިންޓުކޮށް ހަރުކޮށްފައި ހުރީ، ޗާންދަނީމަގުގައި ހުންނަ އެމްޑީޕީގެ ހަރުގޭގެ ދަގަނޑު ގޭޓުގަ އެވެ.
އެ ފޮޓޯތައް އިއްޔެ ހަރުކޮށް ސޯޝަލް މީޑިއާގައި ފޮޓޯ އާއި ވީޑިއޯތައް ވައިރަލް ވަމުން ދަނިކޮށް، ކަޅުތެޔޮ ޖަހާފައި ވަނީ ރޭ ދަންވަރުގެ ވަގުތެއްގަ އެވެ.
އެއީ ކޮން ބަޔަކު ކުރި ކަމެއްކަން ނޭނގެ އެވެ.
އެ މައްސަލައިގައި ފުލުހުން ރޭ އެ ސަރަހައްދަށް ހާޒިރުވި އެވެ. ނަމަވެސް ފުލުހުން އަދި ބަހެއް ނުބުނެ އެވެ.
ކަޅުތެޔޮ ޖެހުމަކީ ރާއްޖޭގެ ސިޔާސީ މަސައްކަތުގައި ޒަމާނުއްސުރެ ވެސް އޮތް ކަމެކެވެ. ބައެއް ފަހަރު ސިޔާސީ މީހުންގެ ގަޔަށް ވެސް ކަޅުތެޔޮ ޖަހާފައި އެބަ ހުއްޓެވެ.
ޕީއެންސީގެ މެންބަރުންގެ އަދަދު 100،000 އަށް އެރުވުމަށްޓަކައި ހަރަކާތްތައް މުޅި ރާއްޖޭގައި ކުރިއަށް ގެންދިޔަ އެވެ. ވަޒީރުންނާއި ރައްޔިތުންގެ މަޖިލީހުގެ މެންބަރުން ވަކި އަދަދަކަށް ޕާޓީއަށް މެންބަރުން ހޯދަން އެންގި އެވެ. މެންބަރުން އިތުރުކުރަން ޕީއެންސީން ހިންގި އެ ހަރަކާތްތަކުގައި އިސްކޮށް ހަރަކާތްތެރިވީ ސަރުކާރުގެ ވެރިންނާއި މަޖިލީހުގެ މެންބަރުންނެވެ.
ޕީއެންސީ އަށް ވަގަށް މެންބަރުން ވައްދާ ޝަކުވާ ބޮޑުވެފައި ވަނިކޮށް، އެކަން އެގޮތަށް ހިނގާފައިވާ ކަމަށް ޕީއެންސީން އިއްޔެ އެއްބަސްވި އެވެ. އެފަދަ ބައެއް މައްސަލަތައް ބައެއް ފަރާތްތަކުން ޕޮލިހަށް ހުށަހަޅާފައިވާއިރު، އިލެކްޝަންސް ކޮމިޝަނުން ވެސް ދަނީ އެ މައްސަލަ ބަލަމުންނެވެ.
ޕީއެންސީ އަށް ވަގަށް މެންބަރުން ވެއްދީ އެ ޕާޓީގެ ޖަގަހައިގެ ތެރޭގައި ކަމަށާއި، އެކަން ކުރީ ކޮން ބައެއްކަން އެނގިވަޑައިގަންނަވާ ކަމަށް މާފަންނު މެދު ދާއިރާގެ މެންބަރު އަސްމާ ރަޝީދު ވިދާޅުވެފައިވެ އެވެ.
ވަގު ފޯމުގެ މައްސަލަ މި ހަފުތާގައި އިތުރަށް ހޫނުވީ، ވަގު ފޯމު ފުރަމުން ފުރަމުން ގޮސް، ހއ. ވައިކަރަދޫ ދާއިރާގެ ރައްޔިތުން މަޖިލީހުގެ މެންބަރުން ހުސައިން ޒިޔާދު (ފިއްޓޭ) ވެސް ވަގަށް ޕީއެންސީ އަށް ވެއްދިކަން ފަޅައި އެރި ހިސާބުންނެވެ.
ވަގު ފޯމުގެ މައްސަލައިގައި ހޯމްލޭންޑް ސެކިއުރިޓީ މިނިސްޓަރާ ސުވާލުކުރަން ގަލޮޅު ދެކުނު ދާއިރާގެ މެންބަރު މީކާއީލް ނަސީމް އިއްޔެ ވަނީ ރައްޔިތުންގެ މަޖިލީހަށް ހުށަހަޅުއްވައިފަ އެވެ.
