ރައީސް ޑރ. މުހައްމަދު މުއިއްޒުގެ ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްމަންޓު، އަދި ވިޔަފާރިވެރިޔާ މުހައްމަދު އަލީ ޖަނާހު އަށް، ހުޅުމާލޭ ފޭސް އެކެއްގެ އެންމެ އަގުބޮޑު ސަރަހައްދުން ދީފައި އޮތް ބޮޑު ބިން އަތުލައިފި އެވެ.
ދެހާސް ތޭވީސް ވަނަ އަހަރުގެ ފަހުކޮޅުގައި ޖަނާހު އަށް ދިނީ، ސެންޓްރަލް ޕާކް ކުރިމަތިން އުރީދޫ ބިލްޑިންއާ ޖެހިގެން ހުޅަނގަށް އޮތް 300،000 އަކަފޫޓުގެ ބިމުން ގާތްގަނޑަކަށް 100،000 ފޫޓެވެ.
ރިޔާސީ އިންތިހާބު ކައިރިވެފައި ވަނިކޮށް އެ ބިން ޖަނާހު އަށް ދީފައި ވަނީ ބޮޑު ޝޮޕިން މޯލެއް އެޅުމަށެވެ.
ނަމަވެސް އެ ބިން ދިން އަގެއް، އަދި ޝަރުތުކުރި ކަންކަން އެޗްޑީސީން ހާމައެއް ނުކުރެ އެވެ.
އެޗްޑީސީގެ އޮފިޝަލަކު މިއަދު އަދަދު ނޫހަށް ބުނީ، ޖަނާހު އަތުން އެ ބިން އަތުލީ، ކުންފުނީގެ މެނޭޖިން ޑިރެކްޓަރަކަށް އިބްރާހިމް ފަޒުލް ރަޝީދު ހުންނެވި ދުވަސްވަރު ކަމަށެވެ.
"ބިން އަތުލީ، އެއްބަސްވުމާ އެއްގޮތަށް އެއްވެސް ފައިސާއެއް، އަދި ކަމެއް ވެސް ކޮށްފައި ނެތުމުން. ފައިސާ ދެއްކުމުގެ މުއްދަތުތައް ދިޔައީ އިތުރުކުރަމުން،" އޭނާ ވިދާޅުވި އެވެ.
އިއުލާނު ކުރުމެއް ނެތި ވިޔަފާރި ބޭނުންތަކަށް ހުޅުމާލޭން ގިނަ ބިންތަކެއް އެޗްޑީސީގެ މިހާރުގެ މެނޭޖުމެންޓުން ވެސް ދޫކޮށްފައިވެ އެވެ. ސަރުކާރާ ގުޅުން އޮތް އެކި ފަރާތްތަކަށް އެފަދަ ބައެއް ބިންތައް ދިނީ ކުލީގެ އިތުރުން ސީއެސްއާރުގެ ގޮތުގައި ފައިސާ ދައްކާ ގޮތަށް ނުވަތަ އެހެން ކަމެއް ކުރަންޖެހޭ ގޮތަށެވެ.
