ސިޔާސީ ޕާޓީތަކަށް ފައިސާ ދޫކުރާނީ މިހާރު އެ ކޮމިޝަނަށް ލިބިފައި ހުރި ފޯމުތަކުގެ ސައްހަކަން ކަށަވަރު ކުރުމަށްފަހު ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.
އީސީގެ މެންބަރު ހަސަން ޒަކަރިއްޔާ "އަދަދު" އަށް ވިދާޅުވީ ސިޔާސީ ޕާޓީތަކަށް ފައިސާ ދޫކުރުމުގެ ކުރިން މިހާރު އެ ކޮމިޝަނަށް ހުށަހަޅާފައިވާ ހުރިހާ ފޯމެއްގެ ސައްހަކަން ކަށަވަރު ކުރާނެ ކަމަށެވެ.
އީސީން މިހެން ބުނެފައި މިވަނީ ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން އެ ޕާޓީއަށް ވަގަށް މީހުން ވައްދާ މައްސަލަ ބޮޑުވެފައިވާ ދަނޑިވަޅެއްގަ އެވެ.
ވަގު ފޯމުތަކެއް ފުރައިގެން ހދ. ވައިކަރަދޫގެ ގިނަ ބަޔަކާއެކު އެމްޑީޕީއަށް ނިސްބަތްވާ އެ ދާއިރާގެ މަޖިލިސް މެންބަރު، ހުސެއިން ޒިޔާދު (ފިއްޓޭ) ޕީއެންސީއަށް ވެއްދި މައްސަލަ އިއްޔެ ފެންމަތިވުމާ ގުޅިގެން، އެ މައްސަލައިގައި ޒިންމާވާ ފަރާތްތަކާ ދެކޮޅަށް ފިޔަވަޅު އަޅާނެ ކަމަށް ވެސް އީސީން ވަނީ ބުނެފަ އެވެ.
ފިއްޓޭ ޕީއެންސީއަށް ވެއްދުން ކުށްވެރިކޮށް، އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް ކަމާގުޅުން ހުރި އިދާރާތަކުން މިއަދު އެމްޑީޕީން ވަނީ ގޮވާލާފަ އެވެ.
ރައީސް ޑރ. މުހައްމަދު މުއިއްޒުގެ އަމާޒު ހާސިލު ކުރެއްވުމަށް ޕީއެންސީއަށް އެއް ލައްކަ މެންބަރުން ހަމަ ކުރުމަށް މިދިޔަ އަހަރު ގިނަ ބަޔަކު އެ ޕާޓީއަށް ވަނީ ވައްދާފަ އެވެ. ވަގަށް އެ ޕާޓީއަށް މީހުން ވެއްދި ކަމުގެ މައްސަލަ ފެންމަތިވީ އޭގެ ފަހުންނެވެ.
ސިޔާސީ ޕާޓީތަކަށް މީހުން ވެއްދުމަށް ވަގު ފޯމު ފުރައި ހުށަހެޅުމުން އެ ފޯމުތައް ޕްރޮސެސްކޮށް ޕާޓީތަކުގެ ދަފްތަރަށް ބޮޑެތި ބަދަލުތަކެއް މިފަހުން ވަނީ އައިސްފަ އެވެ. ސޮއި ފޯޖުކޮށްގެން ޕާޓީތަކަށް ވައްދަމުންދާ ކަމުގެ ޝަކުވާ ބައެއް އާންމު ރައްޔިތުން ވެސް ދަނީ ކުރަމުންނެވެ.
