އެސްޓޯނިއާގެ ރައީސް ޑރ. އަލާ ކާރިސްގެ ދައުވަތަކަށް އެ ގައުމަށް ރައީސް ޑރ. މުހައްމަދު މުއިއްޒު ރަސްމީ ދަތުރެއްގައި ފުރާވަޑައިގަތުމަށް ނިންމަވައިފި އެވެ.
ރައީސް އޮފީހުން ހާމަކޮށްފައިވާ ގޮތުގައި މި ދަތުރު އެމަނިކުފާނު ކުރައްވާނީ ޖެނުއަރީ 13-16 އަށެވެ. މިއީ ރާއްޖޭގެ ރައީސަކު އެސްޓޯނިއާއަށް ވަޑައިގަންނަވާނެ ފުރަތަމަ ފަހަރެވެ.
މި ދަތުރުގައި އެ ގައުމުގެ ރައީސާއި ކެބިނެޓުގެ ބައެއް ވަޒީރުންނާ ވެސް ރައީސް މުއިއްޒު ބައްދަލުކުރައްވާނެ އެވެ. މި ދަތުރުގައި ރައީސް މުއިއްޒުގެ އަރިހުގައި ސަރުކާރުގެ މަތީ ފަންތީގެ ވަފުދެއް ވެސް ބައިވެރިވާނެ އެވެ.
ބަލްޓިކް ގައުމެއްގެ ގޮތުގައި އޮތް އެސްޓޯނިއާއަކީ ޑިޖިޓަލް ޓެކްނޮލޮޖީގެ ދާއިރާއިން ގިނަ ކުރިއެރުންތަކެއް ހޯދާފައިވާ ގައުމެކެވެ. އެ ގައުމުގެ ސަރުކާރުގެ 99 އިންސައްތަ ހިދުމަތް އޮންލައިންކޮށް ހޯދެ އެވެ. އެ ގައުމުގެ ތައުލީމީ ނިޒާމަކީ ވެސް ދުނިޔޭގެ ނިސްބަތުން ކުރީގައި ގުނާލެވޭ ނިޒާމެކެވެ.
ރާއްޖެ އާއި އެސްޓޯނިއާއާ ދެމެދު ޑިޕްލޮމެޓިކް ގުޅުން ގާއިމުކުރީ މާޗު 22، 1994 ގަ އެވެ.
