އެމެރިކާގެ ލޮސް އެންޖެލެސްގެ ޖަންގަލިތަކުގައި ރޯވި އަލިފާންގަނޑު ފެތުރި 10،000 އަށްވުރެ ގިނަ ގެ އަނދައި އަޅިއަށްވެ، މަރުވި މީހުންގެ އަދަދު 11 އަށް އަރައިފި އެވެ.
ލޮސް އެންޖެލެސްގައި ތިން މިލިއަނަށްވުރެ ގިނަ މީހުން ދިރިއުޅޭއިރު އެކި ސަރަހައްދުތަކުން އެތައް ހާސް ބަޔަކު ރައްކާތެރި ސަރަހައްދުތަކަށް ބަދަލުވުމަށް އިވެކުއޭޝަން އޯޑަރުތައް ވަނީ ނެރެފަ އެވެ.
އަލިފާންގަނޑު ފެތުރުމާއި ވައިގެ ސަބަބުން އަލިފާންގަނޑު ނިއްވަން ފަޔާ ފައިޓަރުންނަށް ބޮޑެތި އުނދަގޫތަކެއް އަންނަނީ ކުރިމަތިވަމުންނެވެ. އެގޮތުން ސިޓީގެ ބޮޑު ސަރަހައްދަކަށް އަދިވެސް ނުރައްކާ އެބަ އޮތެވެ.
މިހާތަނަށް ލޮސް އެންޖެލެސްގައި ރޯވި އަލިފާންގަނޑުގައި އިންޝުއަރެންސް ކޮށްފައި ހުރި ތަންތަނަށް ލިބުނު ގެއްލުން 8 ބިލިއަން ޑޮލަރަށް އަރާ ކަމަށް ވަނީ އަންދާޒާ ކޮށްފަ އެވެ.
ލޮސް އެންޖެލެސްގައި އަލިފާން ރޯވެ އަނދަމުންދާއިރު ބައެއް އާންމުން ވެސް ތަންތަނުގައި ރޯކުރަމުންދާ ކަމަށް އަންނަނީ ތުހުމަތު ކުރެވެމުންނެވެ. އެގޮތުން މިހާތަނަށް އެފަދަ ތުހުމަތެއްގައި އެކަކު ހައްޔަރު ކޮށްފައިވެ އެވެ.
މީގެއިތުރުން އަލިފާނުގެ ހާދިސާގެ ނާޖާއިޒް ފައިދާ ނަގައި ބައެއް ތަންތަނަށް ގެއްލުންދީ، ވައްކަން ކުރުމުގެ ތުހުމަތުގައި 20 މީހަކު މިހާތަނަށް ވަނީ ހައްޔަރު ކޮށްފަ އެވެ.
އަލިފާނުގެ ހާދިސާގައި އެމެރިކާގެ މަޝްހޫރު ގިނަ އެކްޓަރުންގެ ގެތައް ވަނީ އެއްކޮށް އަނދާ ހުލިވެފަ އެވެ.
އެމެރިކާގެ އިދާރާތަކުން ބުނާ ގޮތުގައި މިހާރު އަނދަމުންދާ އަލިފާންގަނޑުތަކަކީ މީގެ ކުރިން ދުވަހަކު ވެސް ރޯނުވާހާ ވަރުގަދަ އަލިފާންގަނޑުތަކެވެ.
