ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒު އާއި އެ ޕާޓީގެ ކައުންސިލް މެންބަރު، ރައްޔިތުންގެ މަޖިލީހުގެ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމް އެމްޑީޕީ އަށް ސޮއިކޮށްފި އެވެ.
ޝިފާޒު އާއި އާޒިމުގެ އިތުރުން، އެމްޑީޕީގައި ކުރިން އިސް ދައުރެއް އާދަކުރަމުން ދިޔަ އިބްރާހިމް ރަޝީދު (މާމިގިލީ އިބޫ) ވެސް ދަ ޑިމޮކްރެޓްސް ދޫކޮށް، އެމްޑީޕީ އަށް އިއްޔެ ސޮއިކޮށްފައިވާ ކަމަށް، ދެ ޕާޓީގެ މަސްދަރުތަކުން ކަށަވަރުކޮށް ދިނެވެ.
މިކަމާ ގުޅޭ ގޮތުން މި ތިން ބޭފުޅުންގެ ރަސްމީ ބަހެއް ނުލިބުނެވެ. ފޯނުން ގުޅުމުން ޖަވާބެއް ނުދެއްވަ އެވެ. ވަޓްސްއަޕްއިން މެސެޖުކުރުމުން އެމްޑީޕީ އަށް ސޮއިކުރިކަން ދޮގެއް ނުކުރެ އެވެ.
ނިމިގެން ދިޔަ ރިޔާސީ އިންތިހާބުގައި ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބުގެ ރަނިންމޭޓަކަށް ހުންނެވި، ހުސައިން އަމްރު ވެސް ވަނީ އެމްޑީޕީ އަށް ސޮއިކޮށްފަ އެވެ.
މި ބޭފުޅުން އެމްޑީޕީއަށް ސޮއިކުރުމަށް ފަހު، ދަ ޑިމޮކްރެޓްސްގެ ރައީސް ހަސަން ލަތީފުއާ ބައްދަލު ކުރައްވައި، ޕާޓީ ބަދަލުކުރި ސަބަބު ކިޔައި ދެއްވި ކަމަށް، އެކަމުގެ މައުލޫމާތު އެނގޭ މީހަކު "އަދަދު" ނޫހަށް ބުންޏެވެ.
"ވަރަށް އަވަހަށް ރަސްމީކޮށް އެކަން [ޕާޓީ ބަދަލުކުރިކަން] އިއުލާނު ވެސް ކުރާނެ. އެ ބޭފުޅުން ބޭނުންވީ ސިޔާސީ ހަރަކާތްތަކަށް ރަނގަޅު ޕްލެޓު ފޯމެއް. ހަގީގަތުގައި އެ މީހުންގެ ހިނގަމުން ދިޔައީ އެމްޑީޕީގެ ވިންދު،" އަދަދު ނޫހާ ވާހަކަ ދެއްކި މީހާ ބުންޏެވެ.
މި ހަތަރު ބޭފުޅުންގެ ތެރެއިން އާޒިމަކީ އެމްޑީޕީން ވަކިކޮށްފައި ހުރި ބޭފުޅެކެވެ.
އާޒިމް އެމްޑީޕީން ވަކިކުރީ، އެންމެ ފަހުން ބޭއްވި ރިޔާސީ އިންތިހާބު ކައިރިވެފައި ވަނިކޮށް، ފޯޅަވައްސާއި އައްޑޫއާ ދެމެދު އޮތް ކަނޑުގެ އިގުތިސޯދީ ސަރަހައްދުގެ އިން ވަކިކުރި މައްސަލާގައި އޭރު އިދިކޮޅު ސިޔާސީ ޕާޓީތަކުން އުފައްދާފައިވާ "ފޯޅަވަހި ކޯލިޝަން"ގެ ބައްދަލުވުންތަކާއި ޕްރެސް ކޮންފަރެންސްގައި ބައިވެރިވެވަޑައިގެންނެވި މައްސަލަ އާއި އޭރުގެ ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގައި ސޮއިކުރުމާ ގުޅިގެންނެވެ.
އާޒިމް އެމްޑީޕީން ވަކިކުރުމާ ގުޅިގެން، މަޖިލީހުގައި ތިއްބެވި އެ ޕާޓީގެ ގިނަ މެންބަރުންތަކެއް ޕާޓީ ދޫކޮށްލައި، އަދި ސަރުކާރުގެ މަގާމުތަކުގައި ތިއްބެވި ބައެއް ބޭފުޅުން އިސްތިއުފާ ދެއްވުމަށް ފަހު، ދަ ޑިމޮކްރެޓްސް އުފެއްދުމުގެ މަސައްކަތް ރަސްމީކޮށް ފެށި އެވެ.
އެމްޑީޕީގެ އެތެރެ ރޫޅިގެން ދިޔައީ ރިޔާސީ ކެންޑިޑޭޓުގެ ވާދަވެރިކަމުގަ އެވެ. އެމްޑީޕީގެ ރިޔާސީ ޕްރައިމަރީގައި ކުރީގެ ރައީސް މުހައްމަދު ނަޝީދު އަށް ކުރިމަތިވި ނާކާމިޔާބީ ގަބޫލު ނުކުރައްވައި، އެ މަނިކުފާނާއި އެ މަނިކުފާނުގެ ސަޕޯޓަރުން ނުކުތީ، އެމްޑީޕީގެ ކެންޑިޑޭޓު ‘އިބްރާހިމް މުހައްމަދު ސޯލިހު ނޫން ގޮތެއް’ ހޯދުމަށެވެ.
ރިޔާސީ އިންތިހާބު އެމްޑީޕީ އަށް ގެއްލިގެން ދިޔަ މައިގަނޑު އެއް ސަބަބަކީ އެއީ ކަމަށް ގިނަ ބަޔަކު ގަބޫލުކުރެ އެވެ.
އަމްރު އެނބުރި އެމްޑީޕީ އަށް އައުމާއެކު އެކަމަށް މަރުހަބާ ކިޔައި ރައްޔިތުންގެ މަޖިލީހުގެ ހުޅުމާލޭ ދާއިރާގެ ކުރީގެ މެންބަރު އަލީ ނިޔާޒު އެކްސްގައި ރޭ ކުރެއްވި ޕޯސްޓެއްގައި ބުނީ ސިޔާސީ އިސްލާހީ މަސައްކަތުގައި އަބަދުވެސް އެންމެ މުހިއްމު މަސައްކަތެއް ކުރެވޭނެ ޖާގަ އޮންނާނީ އެމްޑީޕީގައި ކަމަށާއި، ސިޔާސީ ކުރިމަގު ހޯދަން އެދޭ ކޮންމެ މީހަކަށް އެމްޑީޕީ އޮތީ ތަންމިނަށް ހުޅުވިފައި ކަމަށެވެ.
