މިއަދު ހެނދުނު އެއާޕޯޓުގައި ޕިކަޕަކަށް ކާރެއް މުޑިއަރަން މެދުވެރިވީ ކާރު ދުއްވަން އިން ޑްރައިވަރަށް ދިމާވި ކުއްލި ސިއްހީ ހާލަތެއްގެ ސަބަބުން ކަމަށް ބެލެވޭ ކަމަށް މޯލްޑިވްސް އެއާޕޯޓްސް ކޮމްޕެނީން ބުނެފި އެވެ.
އެ ކުންފުނިން އެކްސްގައި ދާދި ދެންމެއަކު ކުރި ޕޯސްޓެއްގައި ބުނީ އެކްސިޑެންޓު ހިނގި ގޮތް ބެލުމަށް މަސައްކަތް ކުރަމުންދާ ކަމަށެވެ. އެކްސިޑެންޓު ހިނގަން މެދުވެރިވީ ޑްރައިވަރަށް ދިމާވި ކުއްލި ސިއްހީ ހާލަތެއްގެ ސަބަބުން ކަމަށް މިހައިތަނަށް ކުރި ޕްރިލިމިނަރީ އެސެސްމެންޓުތަކުން ދައްކާފައިވާ ކަމަށް އެމްއޭސީއެލުން ބުންޏެވެ.
"މި އެކްސިޑެންޓު ހިނގަން މެދުވެރިވީ ދުއްވަމުން ދިޔަ ޑްރައިވަރަށް ދިމާވި ސިއްހީ ކުއްލި ހާލަތެއްގެ ސަބަބުން ކަމަށް ޕްރެލިމިނަރީ އެސެސްމެންޓުތަކުން ލަފާ ކުރެވެ އެވެ، ހާދިސާ ހިނގި ގޮތް އިތުރަށް ބަލަމުންދާ ވާހަކަ މި ފުރުސަތުގައި ދަންނަވަމެވެ،" އެމްއޭސީއެލުން ބުންޏެވެ.
ކާރު ދުއްވަން އިން މީހާއަށް ފަރުވާ ދިނުމަށް މިހާރު ވަނީ ހޮސްޕިޓަލަށް ގެންގޮސްފަ އެވެ. ނަމަވެސް އޭނާގެ ހާލަތެއް އަދި ސާފެއް ނުވެ އެވެ.
މިއަދު ހެނދުނު ހިނގި އެކްސިޑެންޓުގެ ބައެއް މަންޒަރުތައް ސޯޝަލް މީޑިއާގައި މިހާރު ދަނީ ދައުރުވަމުންނެވެ. ވީޑިއޯއިން ފެންނަ ގޮތުގައި އެކްސިޑެންޓުވި ކާރު އޮތީ ކޮންޓްރޯލް ނުވެ ގޮސް ޕިކަޕުގެ ފަހަތަށް މުޑި އަރައިފަ އެވެ.
ޕިކަޕުގައި ކާރު ޖެހުނުލެއް ބާރުކަމުން، ކާރުގެ ވިންޑާ ހަމައަށް އޮތީ ޕިކަޕުގެ ދަށުވެފަ އެވެ.
އެ ހާދިސާގައި ކާރުގެ ފަހަތު ސީޓުގައި އިން މީހާއަށް ވެސް ކޮންމެވެސް ވަރެއްގެ އަނިޔާތަކެއް ވެގެން އެއާޕޯޓު ކްލިނިކުގައި ފަރުވާދިން ކަމަށް ފުލުހުން ބުންޏެވެ. އޭނާއަށް މާބޮޑު އަނިޔާއެއް ނުވާ ކަމަށް ވެސް ފުލުހުން ބުންޏެވެ.
