ރައީސް ޑރ. މުހައްމަދު މުއިއްޒު މިއަދު ހަވީރު ކ. ގުޅިއަށް ވަޑައިގަންނަވާ ގޮތަށް ހަމަޖެހިއްޖެ އެވެ.
"އަދަދު" އަށް އެނގިފައިވާ ގޮތުގައި ރައީސް މުއިއްޒު ގުޅިއަށް ވަޑައިގަންނަވަނީ އަތޮޅު ތެރެއަށް ކުރައްވާ ދަތުރުފުޅު ފެއްޓެވުމުގެ ގޮތުންނެވެ.
ގުޅިއަކީ ރައީސް މުއިއްޒު މި އަހަރު އަތޮޅުތެރެއަށް ކުރައްވާ ދަތުރުފުޅުގެ ތެރެއިން ވަޑައިގަންނަވާ ފުރަތަމަ ރަށެވެ.
އެމަނިކުފާނު ގުޅިއަށް ވަޑައިގެން އެ ރަށުގެ ރައްޔިތުންނާ ބައްދަލު ކުރެއްވުމަށް ވަނީ ހަމަޖެހިފަ އެވެ.
މީގެ އިތުރުން ރައީސް މުއިއްޒު މި ހަފްތާ ތެރޭގައި ދެކުނުގެ އަތޮޅުތަކަށް ދަތުރު ކުރައްވާނެ ކަމަށް ވެސް މި ނޫހަށް ވަނީ މައުލޫމާތު ލިބިފަ އެވެ.
ވެރިކަމުގެ ފަސް އަހަރުގައި ރާއްޖޭގައި މީހުން ދިރިއުޅޭ ހުރިހާ ރަށަކަށް ދެ ފަހަރެއްގެ މަތިން ދަތުރު ކުރެއްވުމަކީ ރައީސް މުއިއްޒުގެ ރިޔާސީ ވައުދެކެވެ. އެގޮތުން މިދިޔަ އަހަރު ވެސް އެ މަނިކުފާނު ވަނީ ގިނަ ރަށްތަކަށް ވަޑައިގެން ކައުންސިލްތަކުގެ އިތުރުން ރައްޔިތުންނާ ބައްދަލު ކުރައްވާފަ އެވެ.
މީހުން ދިރިއުޅޭ ހުރިހާ ރަށަަކަށް ދެވަނަ ފަހަރަށް ދަތުރުކުރަން 2027 ގަައި ފަށާނެ ކަމަށް ރައީސް މުއިއްޒު ކުރިން ވަނީ ވިދާޅުވެފަ އެވެ.
