ލަންޑަން (ޖެނުއަރީ 5) - އިނގިރޭސި ޕްރިމިއާ ލީގުގައި މިރޭ އާސެނަލާއި ޗެލްސީ ކުޅުނު މެޗުތަކުން އެއްވަރުވިއިރު، މެންޗެސްޓާ ސިޓީން ޖެހިޖެހިގެން ދެ ވަނަ މޮޅު ހޯދައި ޕްރެޝަރު އަރައިގަތުމަށް މަޑުމަޑުން ކުރިއަށް ފިޔަަވަޅެއް އަޅައިފި އެވެ.
ޗެލްސީން ރަށުންބޭރުގައި ކްރިސްޓަލް ޕެލަސްއާ 1-1 އިން އެއްވަރުވިއިރު، ބްރައިޓަން ދަނޑުގައި އާސެނަލް ވަނީ 1-1 އިން އެއްވަރުވެފަ އެވެ. ސިޓީން ވަނީ އަމިއްލަ ދަނޑުގައި 4-1 އިން ވެސްޓް ހޭމް ޔުނައިޓެޑް ބަލިކޮށްފަ އެވެ.
ލީގުގެ އެއް ވަނައިގައި އޮތް ލިވަޕޫލަށް 18 މެޗުން 45 ޕޮއިންޓް ލިބިފައިވާއިރު، ދެ ވަނައިގައި އޮތް އާސެނަލަށް 20 މެޗުން ވަނީ 40 ޕޮއިންޓް ލިބިފަ އެވެ. ތިން ވަނައިގައި އޮތް ނޮޓިންހަމް ފޮރެސްޓަށް 19 މެޗުން 37 ޕޮއިންޓް ލިބިފައިވާއިރު، ހަތަރު ވަނައިގައި އޮތް ޗެލްސީ އަށް ވަނީ 20 މެޗުން 36 ޕޮއިންޓް ލިބިފަ އެވެ.
ފަސް ވަނައިގައި ނިއުކާސަލް ޔުނައިޓެޑް އޮތީ ޓޮޓެންހަމް ހޮޓްސްޕާސް އަތުން 2-1 އިން މޮޅުވެ، ހޯދި ތިން ޕޮއިންޓާ އެކު، 20 މެޗުން 35 ޕޮއިންޓް ހޯދައިގެންނެވެ. ސިޓީ އަށް ހަ ވަނަ ލިބެނީ 20 މެޗުން 34 ޕޮއިންޓާ އެކު އެވެ.
ޗެލްސީން ކޯލް ޕާމާގެ ގޯލުން މެޗުގެ ކުރީކޮޅުގައި ލީޑުނަގާފައިވަނިކޮށް، ޕެލަސް އިން އެއްވަރުކުރީ، މެޗުގެ ފުރިހަމަ ވަގުތު ހަމަވާން އަށް މިނިޓަށް ވެފައި ހުއްޓަ އެވެ. މި ލަނޑު ޖެހީ އެބްރެޗޭ އެޒޭ ދިން ބޯޅައަކުން ޖިއަން ފިލީޕް މަޓޭޓާ ޖެހި ގޯލުންނެވެ. މިއީ، ލީގުގައި ޗެލްސީން މޮޅެއް ނުލިބި ޖެހިޖެހިގެން ނިންމާލަން ޖެހުނު ތިން ވަނަ މެޗެވެ.
އާސެނަލުން 17 އަހަރުގެ އީތަން ންވަނޭރީގެ ގޯލުން ފުރަތަމަ ހާފުގައި ލީޑުނެގިއިރު، ދެ ވަނަ ހާފުގައި ބްރައިޓަން އިން އެއްވަރުކުރީ ޖޮއާއޯ ޕެޑްރޯ ޖެހި ޕެނަލްޓީންނެވެ. މިއީ، އާސެނަލްގެ ސަލީބާ އޭރިއާތެރެއިން ޖޮއާއޯ ޕެޑްރޯ އަށް ކުރި ފައުލަކަށް ދިން ޕެނަލްޓީ އެކެވެ.
އާލިން ބްރައުޓް ހާލަންޑް ސިޓީގެ ދެ ގޯލު ޖެހި މި މެޗުގައި އެ ޓީމުގެ އަނެއް ލަނޑުތައް ޖެހީ ފިލް ފޯޑެންގެ އިތުރުން ވެސްޓް ހޭމްގެ ޑިފެންޑަރު، ވްލަޑިިމިއޭ ސޯފާލް އަތުން ބައިކޮޅަށް ވަން ގޯލެކެވެ. ވެސްޓް ހޭމްގެ ލަނޑު ޖެހީ، ޖަރުމަނުގެ މިޑްފީލްޑަރު، ނިކްލަސް ފުލްކްރޫގް އެވެ. މިއީ، މިދިޔަ އޮކްޓޫބަރު މަހުގެ ފަހުން، ސިޓީން ޖެހިޖެހިގެން ދެ މެޗުން މޮޅުވި ފުރަތަމަ ފަހަރެވެ.
ޓޮޓެންހަމްގެ ޑޮމިނިކް ސޮލާންކޭ އެ ޓީމަށް ލީޑުނަގައިދީފައިވަނިކޮށް، ނިއުކާސަލަށް އެއްވަރުކޮށްދިނީ އެންތަނީ ގޯޑަން އެވެ. ނިއުކާސަލް މޮޅުވީ، މި ވަގުތު ރަނގަޅު ފޯމެއްގައި ހުރި އަލެކްސަންޑަ އިސާކް ޖެހި ގޯލުންނެވެ. މި މެޗުން ބަލިވެ ޓޮޓެންހަމް މި ވަގުތު އޮތީ 20 މެޗުން 24 ޕޮއިންޓާ އެކު 12 ވަނައިގަ އެވެ.
ލީގުގައި މިރޭ ބްރެންޓްފޯޑުން ވަނީ 5-0 އިން ސައުތެމްޓަން ބަލިކޮށްފަ އެވެ. އެސްޓަން ވިލާ އިން 2-1 އިން ލެސްޓާ ސިޓީ ބަލިކުރިއިރު، ބޯންމައުުތުން ވަނީ 1-0 އިން އެވަޓަންގެ މައްޗަށް ކުރިހޯދައިފަ އެެވެ.
