ރެކޯޑު އަދަދަކަށް ވެރި ރަށް މާލެއަށް ވާރޭ ވެހި އިއްޔެ މާލޭގައި ފެންބޮޑުވުމާ ގުޅިގެން ގެއްލުންވި ވެހިކަލްތަކަށް މާލީ ބަދަލެއް ދޭން ހަމަޖެހިފައި ނުވާ ކަމަށް ނެޝަނަލް ޑިޒާސްޓަ މެނޭޖްމެންޓު (އެންޑީއެމްއޭ) އިން ބުނެފި އެވެ.
އިއްޔެ އާއި ރޭ ވެހުނު ވާރޭގައި މާލޭގެ ބޮޑު ބައެއް ގިނަ ވަގުތުތަކެއް ވަންދެން ފެނު އަޑީގައި އޮތެވެ. އެ ވަގުތުތަކުގައި ގިނަ ބައެއްގެ ވެހިކަލްތަކަކަށް ފެން ވަދެ ހުއްޓިގެން މަގުމަތީ ވަނީ ބަހައްޓާފަ އެވެ. ސައިކަލުތަކާއި ކާރުތަކަށް ވެސް އިއްޔެ ގެއްލުންވި އެވެ.
މިކަމާ ގުޅިގެން "އަދަދު" ނޫހުން ސުވާލު ކުރުމުން އެންޑީއެމްއޭގެ އޮފިޝަލަކު ވިދާޅުވީ އެ އިދާރާއިން މާލީ ގޮތުން އެހީތެރިވެދީ ބަދަލު ދެނީ ޒަރޫރީ ބޭނުންތަކަށް ބޭނުންކުރާ އެއްޗެއްސަށް ލިބޭ ގެއްލުމަށް ކަމަށެވެ. އަދި، ހާލުގަިއ ޖެހޭ މީހުންނަށް ކާބޯތަކެތި ފޯރުކޮށްދިނުމަށް ވެސް މާލީ އެހީ ދޭ ކަމަށް ވިދާޅުވި އެވެ.
އެގޮތުން، ގޭތެރޭ ގެންގުޅޭ ތަކެއްޗާއި ފަރުނީޗަރުތަކަށް ލިބޭ ގެއްލުން ވަޒަންކުރުމަށްފަހު ބަދަލު ދޭ ކަމަށްވެސް އޭނާ ވިދާޅުވި އެވެ. ނަމަވެސް، ސައިކަލު ފަދަ ވެހިކަލްތަކައް އެންޑީއެމްއޭ އިން ބަދަލު ނުދޭ ކަން ފާހަގަކޮށް އޭނާ ވިދާޅުވީ މިފަހަރު ވެސް އެފަދަ ނިންމުމެއް ނުނިންމާ ކަމަށެވެ.
އިއްޔެ، މާލޭގައި ފެން ބޮޑުވުމުގެ ސަބަބުން ދިރިއުޅެން އުނދަގޫވި ހާލަތަށް ދިޔަ 36 ގޭބިސީއެއްގެ 226 މީހަކަށް ވަގުތީ ބޯހިޔާވަހިކަމާއި، ކެއިންބުއިން ފޯރުކޮށްދީފައިވާ ކަަމަށް ނެޝަނަލް ޑިޒާސްޓަ މެނޭޖްމެންޓު ސެންޓަރުން ބުނެފައިވެ އެވެ.
އެ ސެންޓަރުން ބުނީ ފެން ބޮޑުވުމުގެ ސަބަބުން އެހީތެރިކަމަށް އެދި 774 ތަނަކުން ރިޕޯޓުކުރި ކަމަށާއި އޭގެ ތެރެއިން 554 ފަރާތުން އެދުނީ ފެން ވަނުން މައިތިރިކުރަން ވެލި ބަސްތާ ޖަހައި ދިނުމަށް ކަމަށެވެ.
މިއީ އެންޑީއެމްއޭ އިން އިއްޔެ ނެރުނު ތަފާސްހިސާބުތަކެވެ. އޭގެ ފަހުން އެ އިދާރާއިން އަޕްޑޭޓެއް އާންމުކޮށްފައެއް ނުވެ އެވެ.
