މުޅި ރާއްޖެއަށް މޫސުން ގޯސްވެ، މެދުނުކެނޑި ބޯކޮށް ވާރޭ ވެހި ވެރި ރަށް މާލޭގައި ފެންބޮޑުވެފައިވާތީ، ރަށް އާންމު ހާލަތަކަށް ގެނެވެންދެން ބަރު އުޅަނދު ދުއްވުން މަނާކޮށް، ޒަރޫރީ ބޭނުމަކު މެނުވީ ހަތަރު ފުރޮޅުލީ ވެހިކަލް ނުދުއްވަން ފުލުހުން އަންގައިފި އެވެ.
ބައެއް ވެހިކަލްތައް ދުއްވުނުން ފުލުހުން މަނާ ކުރީ މަގުމަތީގެ ރައްކާތެރިކަން ދެމެހެއްޓުމަށް ކަމަށް އެ އިދާރާއިން ބުނެ އެވެ. އަދި ރަށް އާންމު ހާލަތަކަށް ގެނެވެމުން ކުރިއެކޭ އެއްގޮތަށް ހުރިހާ ވެހިކަލަކަށް ވެސް ދުއްވޭނެ ކަމަށް ފުލުހުން ބުނެ އެވެ.
މާލޭގެ ވަރަށް ގިނަ އަދަދެއްގެ ގޭބީސީތަކަށް ފެން ވަދެފައިވާއިރު، މަގުމަތީގައި ހިނގާބިނގާވެ އުޅެން ވަނީ ވަރަށް ބޮޑަށް ހުރަސް އެޅިފަ އެވެ. މާލެއިން ފެން ހިންދުމުގެ މަސައްކަތް ސިފައިން ދަނީ ކުރަމުންނެވެ.
މާލެއަށް ދަނީ ރެކޯޑު މިންވަރަކަށް ވާރޭ ވެހެމުންނެވެ. އެއް ގަޑިއިރު ތެރޭގައި މާލެ ސަރަހައްދަށް ވަނީ 60 މިލިލީޓަރުގެ ވާރޭ ވެހިފަ އެވެ. އަދި 24 ގަޑިއިރު ތެރޭގައި 140 މިލިލީޓަރުގެ ވާރޭ ވަނީ ވެހިފަ އެވެ. އަދި ކުރިއަށް އޮތް ގަޑިއިރުތަކުގައި ވެސް ވާރޭ ވެހޭނެ ކަމަށް މެޓު އޮފީހުން ބުނެ އެވެ.
"މިދިޔަ 24 ގަޑިއިރަށް ބެލި ނަމަވެސް މާލޭ ސަރަހައްދަށް 140 މިލިލީޓަރުގެ ވާރޭ ވެހިއްޖެ،" މެޓު އޮފީހުގެ ހުސެއިން ވަހީދު ޕީއެސްއެމްއަށް ދެއްވި އިންޓަވިއުއެއްގައި ވިދާޅުވި އެވެ. "މިވަގުތު ވަރަށް ބޯކޮށް ވާރޭ ވެހޭ އެބަ، ކުރިއަށް އޮތް ފަސް، ހަ ގަޑިއިރު ވެސް މިވަރަށް ވާރޭ ވެހެމުންދާނެ."
މާލޭ އެއްކޮށް ފެނު އަޑީގައި އޮތް އިރު، މަގުމަތީގައި ޕާކުކޮށްފައި ހުރި ބައެއް އުޅަނދުތައް ވެސް ވަނީ ފެނާއެކު އޮޔާ ގޮސްފަ އެވެ. އޭގެ އިތުރުން މަގުމަތީގައި ބަހައްޓާފައި ހުރި ޕެލެޓުތަކާއި ފުލުހުން ބޭނުން ކުރާ ބެރިކޭޑުތަކެއް ވެސް ވަނީ އޮފާ ގޮސްފަ އެވެ.
މޫސުން ގޯސްވުމުގެ ސަބަބުން މެޓް އޮފީހުން ވަނީ މެދުރާއްޖެ ތެރެއަށް އޮރެންޖު އެލާޓެއް ނެރެފަ އެވެ. އެލާޓު ނެރުނީ ބ. އަތޮޅުން ފެށިގެން ތ. އަތޮޅާ ހިސާބަށެވެ.
މޫސުން ގޯސްވުމުގެ ސަބަބުން ވަރަށް ގިނަ ރަށްރަށުގައި ވަނީ ފެންބޮޑުވެފަ އެވެ. އަދި ގަދަ ވިއްސާރައާއެކު ބައެއް ރަށްތަކަށް ވަނީ އުދަ ވެސް އަރައިފަ އެވެ.
