ފަހު މެޗުގައި ރޭ އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބްގެ މައްޗަށް ކުރިހޯދައި، ކްލަބް އެޗްޑީސީން ގައުމީ ވޮލީ ލީގުގެ ޗެމްޕިއަންކަން ހޯދައިފި އެވެ.
ފަސް ޓީމު ވާދަކުރި މި ފަހަރުގެ ގައުމީ ވޮލީބޯޅަ ލީގުގެ ޗެމްޕިއަންކަން އެޗްޑީސީން ހޯދީ ކުޅުނު ހަތަރު މެޗުން ވެސް މޮޅުވެ 12 ޕޮއިންޓާ އެކު އެވެ. ދެ ވަނަ އަށް ދިޔަ ސިފައިންގެ ކްލަބުން ރޭގެ މެޗާ ހަމައަށް އައިއިރު، އޮތީ ހުރިހާ މެޗަކުން މޮޅުވެފަ އެވެ. އެކަމަކު، ރޭގެ މެޗުން ބަލިވުމާ އެކު، އެ ޓީމަށް ލިބުނީ ނުވަ ޕޮއިންޓެވެ. ތިން ވަނަ އަށް ދިޔަ ސްޕޯޓްސް ކްލަބް ސިޓީ އަށް ހަ ޕޮއިންޓް ލިބުނުއިރު، ހަތަރު ވަނައިގައި ނިންމި ބްލޫސް ފޯ ވޮލީބޯލްގެ އޮތީ ދެ ޕޮއިންޓާ އެކު އެވެ. ލީގުގެ ފުލަށް މި ފަހަރު ވެސް ދިޔައީ ޕޮލިސް ކްލަބް އެވެ. އެ ޓީމަށް ދެ ޕޮއިންޓް ލިބުނެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ލީގުގެ ފަހު މެޗުގައި ސިފައިން ވަނީ ފުރަތަމަ ސެޓު، 21-25 އިން ކާމިޔާބުކޮށްފަ އެެވެ. އެޗްޑީސީ މޮޅުވީ ފަހަތުން އަރައި ދެން ކުޅުނު ތިން ސެޓު ކާމިޔާބުކޮށްގެންނެެވެ. އެ ގޮތުން، އެޗްޑީސީގެ ސެޓުތައް ގެންދިޔައީ، 25-19، 25-21 އަދި 25-14 އިންނެވެ.
މުބާާރާތުގެ ވަނަތަކަށް ބަލާއިރު، ބެސްޓް އައުޓްސައިޑް އެޓޭކަރަކީ، ސިފައިންގެ އާދަމް ނަސީމް އެވެ. ބެސްޓް މިޑްލް ބްލޮކަރުންނަށް ހޮވުނީ އެޗްޑީސީގެ މުހައްމަދު އަހުސަން އާއި އާދަމް ފައިރޫޒް އެވެ. ބެސްޓް ސެޓަރަކަށް، އެޗްޑީސީގެ އަލީ ނިމާލް އަދި ބެސްޓް އޮޕޮސިޓް ޕްލޭޔަރަކަށް ސިފައިންގެ ހުސެއިން ރައްޒާން ހޮވުނުއިރު، ބެސްޓް ލިބަރޯ އަކީ ސިފައިންގެ މުހައްމަދު މިމްރާހު ހަސަން (މިންމި) އެެވެ.
އެންމެ އުންމީދީ ކުޅުންތެރިއަކަށް، ބްލޫސް ފޯ ވޮލީބޯލްގެ ޔައީޝް ރިއްފަތު ހަމީދު ހޮވުނުއިރު، އެންމެ މޮޅު ކޯޗަކީ އެޗްޑީސީގެ ހުސެއިން ޝަރީފް (ނަލަ ހުސެން) އެވެ. އެންމެ މޮޅު ބިދޭސީ ކުޅުންތެރިއަކަށް، އެޗްޑީސީގެ ޕާކިސްތާން ކުޅުންތެރިޔާ، މުބައްޝަރު ރަޒާ ހޮވުނުއިރު، މުޅި މުބާރާތުގެ އެންމެ މޮޅު ކުޅުންތެރިއަކީ ސިފައިންގެ ރައްޒާން އެވެ.
މީގެ ދެ މަސް ކުރިން، ކްލަބް އެޗްޑީސީން ވޮލީބޯލް އެސޯސިއޭޝަން ކަޕް ކާމިޔާބުކުރީ ވެސް ފައިނަލުގައި ދިވެހި ސިފައިންގެ ކްލަބް 3-2 އިން ބަލިކުރުމަށް ފަހު އެވެ. އެހެންކަމުން، ޖެހިޖެހިގެން ދެ މުބާރާތުގައި، އެޗްޑީސީން މި ވަނީ ސިފައިން ފަހަތަށް ޖައްސާލައިފަ އެވެ.
