މެލްބާން، އޮސްޓްރޭލިއާ (ޑިސެމްބަރު 29) - އޮސްޓްރޭލިއާއާ ދެކޮޅަށް މިހާރު ކުރިއަށްދާ ސީރީސްގައި ދެއްކި މޮޅު ކުޅުމާ އެކު، އިންޑިއާގެ ފާސްޓް ބޯލަރު، ޖަސްޕްރީތު ބުމްރާ، ރެކޯޑް އެވްރެޖަކާ އެކު، ޓެސްޓް ކްރިކެޓްގައި 200 ވިކެޓް ހަމަކޮށްފި އެވެ.
އޮސްޓްރޭލިއާއާ ދެކޮޅަށް ކުޅުނު މިއަދު ކުޅުނު މެޗުގައި ނެގި ދެ ވިކެޓާ އެކު، ބުމްރާ މި ވަނީ އޭނާގެ 44 ވަނަ ޓެސްޓް މެޗުގައި، 202 ވިކެޓް ހަމަކޮށްފަ އެވެ.
ޓެސްޓް ކްރިކެޓްގައި ކްރިކެޓް ތާރީހުގައި ވެސް 200 އަށް ވުރެ ގިނަ ވިކެޓް ނެގީ 85 ބޯލަރުންނެވެ. އޭގެ ތެރެއިން ބުމްރާގެ އެވްރެޖަކީ، 3912 ބޯޅައިން 19.56 އެވެ. އޭނާއާ އެންމެ ކައިރިން ވާދަކުރާ ބޯލަރުންނަކީ، 20.34 އެވްރެޖްގައި އޮތް ގޯލް ގާނާ އާއި 20.39 އެވްރެޖަކަށް އޮތްް ޝޯން ޕުލޮކް އެވެ.
ބުމްރާ އަކީ ޓެސްޓް ކްރިކެޓްގައި، ހަތަރު ވަނަ އަށް އެންމެ މަދުން ބޯޅަ އުކައިގެން 200 ވިކެޓް ނެގި ކުޅުންތެރިޔާ އެވެ. އެ ގޮތުން، ބުމްރާ މި އަދަދު ހަމަކުރީ 8484 ބޯޅަ އުކައިގެންނެވެ. އެންމެ މަދު ބޯޅައިން 200 ވިކެޓް ހަމަކުރީ، 7725 ބޯޅައިން 200 ވިކެޓް ހަމަކުރި ވަގާރު ޔޫނިސް އެވެ.
ޓެސްޓް ކްރިކެޓްގައި އިންޑިއާ އަށް އެންމެ އަވަހަށް 200 ވިކެޓް ހަމަކޮށްދިނީ ދާދި ފަހުން ރިޓަޔާކުރި ރަވިޗަންދަރަން އަޝްވިން އެވެ. އަޝްވިން ވަނީ 37 ޓެސްޓް މެޗު ކުޅެގެން 200 ވިކެޓް ހަމަކޮށްފަ އެވެ. ބުމްރާ އާއި ރަވިންދުރަ ޖަދޭޖާ އަކީ އިންޑިއާގައި ދެ ވަނަ އަށް އެންމެ އަަވަހަށް ޓެސްޓް ކްރިކެޓްގައި 200 ވިކެޓް ހަމަކުރި ކުޅުންތެރިންނެވެ.
ކްރިކެޓް ތާރީހުގައި އެންމެ އަވަހަށް ޓެސްޓް ކްރިކެޓްގައި 200 ވިކެޓް ހަމަކުރީ ޕާކިސްތާންގެ ޔާސިރު ޝާހު އެވެ. އޭނާ 200 ވަނަ ވިކެޓް ނެގީ 33 ވަނަ ޓެސްޓް މެޗުގަ އެވެ.
