މިލާން (ޑިސެމްބަރު 29) - އިޓާލިއަން ލީގުގައި ރޭ ކަލިއަރީ އަތުން 3-0 އިން އިންޓަ މިލާން މޮޅުވިއިރު، ފަހު ވަގުތު ގޯލު ޖަހައި، ލާޒިއޯއާ 1-1 އިން އެއްވަރުކުރި އެޓަލަންޓާ އިން އާ އަހަރުގެ ބްރޭކަށްދާއިރު ލީގުގެ އެއް ވަނަ ޔަގީންކޮށްފި އެވެ.
އެޓަލަންޓާ، އެއް ވަނައިގައި އޮތީ 18 މެޗުން 41 ޕޮއިންޓާ އެކު އެވެ. ދެ ވަނައިގައި އޮތް އިން އިންޓަ މިލާނަށް ވަނީ 17 މެޗުން 40 ޕޮއިންޓް ލިބިފަ އެވެ. ތިން ވަނައިގައި އޮތް ނަޕޯލީ އަށް 17 މެޗުން 38 ޕޮއިންޓް ލިބިފައިވާއިރު، އެ ޓީމުން މިރޭ ވެނެޒިއާއާ ދެކޮޅަށް ކުޅޭނެ އެވެ.
އަމިއްލަ ދަނޑުގައި ކުޅުނު ލާޒިއޯ އިން ވަނީ ރޭގެ މެޗުގެ 27 ވަަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ ފިސާޔޯ ޑެލެ-ބަޝީރު އެވެ. ކުރިން ޝެފީލްޑް ޔުނައިޓެޑަށް ކުޅުނު ޑެލެ-ބަޝީރު މި ލަނޑު ޖެހީ ވޮލީ އަކުންނެވެ.
މި މެޗުގެ ކުރިން އެންމެ ފަހުން ލީގުގައި ކުޅުނު 11 މެޗުން އެޓަލަންޓާ މޮޅުވެފައި އޮތް ނަމަވެސް، މި މެޗުން އެކަން ހާސިލްނުވި އެވެ. ފަރުޖައްސާލަން ޖެހުނީ ފަހު ވަގުތު ލަނޑެއް ޖަހައި ހޯދި ޕޮއިންޓުންނެވެ. އެޓަލަންޓާ އަށް މި ލަނޑު ޖަހައިދިނީ، މާކޯ ބްރެސިއަނީނީ އެވެ. އޭނާ މި ލަނޑު ޖެހީ އެފްރިކާގެ މޮޅު ކުޅުންތެރިޔާގެ މަގާމު ހޯދި އަޑެމޯލާ ލުކްމަން ދިން ބޯޅައަކުންނެވެ.
ކަލިއަރީ ދަނޑުގައި އިންޓަގެ ގޯލުތައް ޖެހީ، ދެ ވަނަ ހާފުގަ އެވެ. މި ގޯލުތައް ކާމިޔާބުކުރީ، އަލެސަންދްރޯ ބަސްޓޯނީ، ހަކަން ޗަނޮނޯލޫ އަދި ލައުޓާރޯ މާޓީނޭޒް އެެވެ. މިއީ، އިންޓަ އިން ލީގުގައި ޖެހިޖެހިގެން ހޯދި ފަސް ވަނަ މޮޅެވެ.
