ރާއްޖެއަށް 2004 ގައި އެރި ސުނާމީގެ ހާދިސާއަށް 20 އަހަރު ފުރުން ފާހަގަ ކުރުމަށް ބާއްވާ "ވިލުންތެރި 20 - ރެޒިލިއަންޓް 20" ގެ ޑިޖިޓަލް ޕާޓްނަރަކަށް އުރީދޫ މޯލްޑިވްސް ހަމަޖައްސައިފި އެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އިންތިޒާމު ކޮށްގެން ބާއްވާ ހަތަރު ދުވަހުގެ އެ މައުރަޒު ޑިސެމްބަރު 29 ގެ ނިޔަލަށް ނެޝަނަލް އާޓް ގެލަރީގައި ކުރިއަށްދާނެ އެވެ.
އެ މައުރަޒުން ސުނާމީ ކާރިސާގައި ރާއްޖެއަށް ލިބިނު ހިތްދަތިކަމާއި، ސަލާމަތްވި މީހުންގެ ކެތްތެރިކަމާއި، މުޅި ގައުމަށް ގެނުވި އެއްބައިވަންތަކަމާއި ދިވެހިންގެ ހިތްވަރު އަލާކޮށްދެ އެވެ. އަދި އެ މައުރަޒަކީ އެފަދަ ކާރިސާތަކަށް ތައްޔާރުވުމުގެ މުހިންމުކަމާއި ވިލުންތެރި މުސްތަގުބަލެއް ބިނާކުރުމުގެ މުހިންމުކަން ހަދާން ކޮށްދޭ މައުރަޒެކެވެ.
އުރީދޫއިން ބުނީ އެ މައުރަޒުގައި ޑިޖިޓަލް ޕާޓްނަރެއްގެ ގޮތުގައި ބައިވެރިވީ ރާއްޖެއަށް ދިމާވާ ކާރިސާތަކުގައި އެންމެ ކުރީސަފުގައި ނިކުންނަ އެއް ކުންފުންޏެއްގެ ހައިސިއްޔަތުން ކަމަށެވެ.
އޫރީދޫއިން ވަނީ ކާރިސާތަކަށް އިޖާބަދިނުމާއި ދުރާލާ ތައްޔާރުވުމުގައި ނަމޫނާ ދައްކުވައިދީ، ގައުމަށް ދިމާވާ ކުއްލި ނުރައްކަލުގެ ހާލަތްތަކުގައި މުހިންމު ދައުރެއް އަދާކޮށްފަ އެވެ.
އެގޮތުން 2014 ގައި މާލޭގައި ކުރިމަތިވި ފެނުގެ ހާދިސާގައި، އޫރީދޫއިން ވަނީ އަވަސް އިޖާބައެއްދީ، ކުއްލި ނުރައްކަލުގެ ހާލަތުގައި ބޭނުންވާ ޓެލެކޮމިއުނިކޭޝަންގެ އެހީތެރިކަމާއި، ހިލޭ އެސްއެމްއެސް އެލާޓްތަކާއި، އިންޓަނެޓް ހިދުމަތްތައް ފޯރުކޮށްދީފަ އެވެ.
މީގެއިތުރުން ކޮވިޑް-19 އާ ގުޅިގެން 48 ގަޑިއިރުގެ ތެރޭގައި، އޫރީދޫގެ މުވައްޒަފުންގެ 85 ޕަސަންޓް ގޭގައި ތިބެގެން މަސައްކަތް ކުރުމަށް ބަދަލުކޮށް، މުވައްޒަފުންގެ ރައްކާތެރިކަން ކަށަވަރުކޮށް ކަސްޓަމަރުންނަށް މެދުނުކެނޑި ހިދުމަތް ކަށަވަރުކޮށްދިނެވެ.
އުރީދޫއިން ވަނީ ކޯވިޑް-19 އާ ދެކޮޅަށް ރާއްޖެއިން ކުރަމުންދިޔަ މަސައްކަތަށް އެއްބާރުލުން ދިނުމުގެ ގޮތުން 2.5 މިލިއަން ރުފިޔާގެ އެހީތެރިކަން ވެސް ފޯރުކޮށްދީފަ އެވެ. އަދި އުރީދޫއިން އިންޓަނެޓް ކަނެކްޝަންގެ އެހީތެރިކަމާއި، ކޮވިޑް-19 އާ ގުޅޭ ހޭލުންތެރިކަމުގެ މައުލޫމާތު އާންމުންނަށް ފޯރުކޮށްދިނުމާއި، އޮންލައިންކޮށް ކިޔަވާ ދިނުމަށާއި ސިއްހީ ދާއިރާ އާއި ވިޔަފާރިތަކަށް ބޭނުންވާ ޑިޖިޓަލް ހިދުމަތްތައް ވެސް ފޯރުކޮށްދިނެވެ.
ހަމަ އެއާއެކު، އޫރީދޫއިން ވަނީ ގައުމުގެ ސިއްހީ ހިދުމަތުގެ ވަސީލަތްތައް ހަރުދަނާކުރުމަށް އެއާ އެމްބިއުލަންސް އިކުއިޕްމަންޓަށް 16 މިލިއަން ރުފިޔާ އިންވެސްޓްކޮށް، އަދި ދިވެހި ސަރުކާރަށް ތިން ސީ އެމްބިއުލަންސް ހަދިޔާކޮށްފަ އެވެ.
