ވޭސްޓް މެނޭޖުމަންޓް ކޯޕަރޭޝަން (ވެމްކޯ) ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި ޝަހީދު އިބްރާހިމް އެ މަގާމުން ވަކިކޮށްފި އެވެ.
މިކަން އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަދި ހާމަނުކުރި ކަމުގައިވީ ނަމަވެސް، އިތުބާރު ހުރި މަސްދަރުތަކުން "އަދަދު" އަށް ބުނި ގޮތުގައި ޝަހީދު ވަކިކުރިކަމުގެ ސިޓީ މިއަދުގެ ވަގުތެއްގައި އޭނާއަށް ވަނީ ރައްދުކޮށްފަ އެވެ.
ޝަހީދު މަގާމުން ވަކިކުރިކަން ކަށަވަރުވީ ނަމަވެސް އޭނާ މަގާމުން ވަކިކުރި ސަބަބެއް އަދި ސާފެއް ނުވެ އެވެ. އޭނާ ވެމްކޯގެ ޑީއެމްޑީކަމުން މި ވަކިކުރީ އެ ކުންފުނީގައި އަހަރެއް ވެސް ނުވަނީހެވެ. ޝަހީދު އެ މަގާމަށް އައްޔަނުކުރީ މި އަހަރުގެ އޭޕްރިލް ފަހުކޮޅެވެ.
ޝަހީދަކީ 17 އަހަރު ވަންދެން އެމްއެންޑީއެފްގައި ހިދުމަތް ކުރައްވާފައިވާ މީހެކެވެ. އޭނާއަކީ ޕީއެންސީގެ ސެނެޓު މެންބަރެއް އަދި އެ ޕާޓީގެ ގެމަނަފުށީ ދާއިރާގެ ރައީސެވެ.
