ގިނަ ރަށްތަކެއްގައި ޔުޓިލިޓީ ހިދުމަތް ފޯރުކޮށްދޭ ސަރުކާރު ކުންފުނި، ފެނަކައިން އިސްތިއުފާދެއްވުމުގެ ކުރިން އެ ކުންފުނީގެ މެނޭޖިން ޑިރެކްޓަރަކަށް ހުންނަވައިގެން ކުންފުންޏަށް އިތުރު މުވައްޒަފުން ނަގަން މުއާޒު މުހައްމަދު ރަޝީދު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގައި އެދުނުކަން "އަދަދު" އަށް އެނގިއްޖެ އެވެ.
ފެނަކައިގެ އޮނިގަނޑު ބަދަލުކޮށް، މަގާމުތައް އުފައްދައި މުވައްޒަފުންގެ އަދަދު ގިނަކުރަން ޕީސީބީގައި ހުއްދައަށް އެދުނު ނަމަވެސް، އެ ބޯޑުން ނިންމީ ފެނަކައިން އެދުނު ގޮތަށް އެ ހުއްދަ ދެވެން ނެތް ކަމަށެވެ. ނަމަވެސް ކުންފުނީގެ އިދާރީ އޮނިގަނޑަށް ގެންނަން ހުށަހެޅި ބައެއް ބަދަލުތައް ގެންނަން ޕީސީބީން ހުއްދަ ދިިނެވެ.
މިކަން ފެނަކައިގެ އޭރުގެ މެނޭޖިން ޑިރެކްޓަރު މުއާޒަށް އަންގައި ޕީސީބީން ފޮނުވި ސިޓީގެ ކޮޕީއެއް މި ނޫހަށް ލިބިފައިވެ އެވެ. އެ ސިޓީގައި މައިގަނޑު ގޮތެއްގައި އޮތީ ފެނަކައިގެ މާލީ ހާލަތަށް ރިއާޔަތްކޮށް ކޭޝްފްލޯ ހަމަޖެއްސުމުގައި އިތުރު މަގާމުތައް އުފައްދައި މުވައްޒަފުން ނަގަން ޕީސީބީގެ ހުއްދަ ނެތް ކަމަށެވެ.
ޕީސީބީގެ ސިޓީގައި ފާހަގަކުރި މުހިންމު އެއް ނުކުތާއަކީ، މުވައްޒަފުން އިތުރުކުރަން ހުށަހެޅިއިރު އާމްދަނީ އިތުރުކުރެވޭނެ އެއްވެސް ގޮތެއް ފެނަކައިން ހުށަހަޅާފައި ނެތުމެވެ.
މި ހާލަތުގައި ކުންފުނި އޮތް އިރު ހަރަދު ކުޑަކުރަން އެ ބޯޑުން ނެރެފައިވާ ސާކިއުލާއާ އެއްގޮތަށް މުސާރައިގެ އޮނިގަނޑަށް އެއްވެސް ބަދަލެއް ނުގެންނާށާއި، ފެނަކައިގެ ޖޮބް ކްލެސިފިކޭޝަން ފްރޭމްވޯކު ޕީސީބީން ދައުރުކޮށްފައިވާ ޖޮބް ކްލެސިފިކޭޝަން ފްރޭމްވޯކާ އެއްހަމަކުރަން ވެސް ޕީސީބީން އެ ކުންފުންޏަށް އަންގާފައިވެ އެވެ.
ފެނަކައަށް އިތުރު ކަމަކަށް އަންގާފައި އޮތީ އަލަށް ނަގާ މުވައްޒަފުންނާއި އެތެރެއިން މަގާމުތަކަށް އައްޔަނުކުރެވޭ މުވައްޒަފުންނާ މަސްއޫލިިިއްޔަތު ހަވާލުކުރުމުގައި ކުންފުނީގެ ހިއުމަން ރިސޯސަސް ޕޮލިސީތަކާ އެއްގޮތްވާ ގޮތުގައި މަތިން "ޓާމްސް އޮފް ރިފަރެންސް" ހަދައި އެއާ އެއްގޮތަށް މަސައްކަތް ކުރުމަށެވެ.
ހަމައެހެންމެ މުވައްޒަފުންގެ ހަރަދު، ކުންފުނީގެ ޖުމްލަ އާމްދަނީގެ 30 ޕަސެންޓަށް ވުރެ އިތުރު ނުވާނެހެން ޕީސީބީން ހުއްދަ ދީފައިވާ ސްޓްރަކްޗާއާ އެއްގޮތަށް އަމަލުކުރާށާއި މުސާރަ އާއި އިނިޔާތް ދިނުމާއި ކުންފުނީގެ އެހެނިހެން ހަރަދުތައް ކުރުމުގައި ކޭޝްފްލޯ މެނޭޖުކުރެވޭނެ ގޮތަކަށް ޕްލޭންކޮށްގެން ކުރިއަށް ގެންދަން ވެސް އެ ބޯޑުން އަންގާފައިވެ އެވެ.
ޕީސީބީގެ ސިޓީގައި އޮތް ތާރީހަށް ބަލާއިރު، މިއީ ނޮވެމްބަރު މަހުގެ ކުރީކޮޅު ފެނަކައަށް ފޮނުވާފައި އޮތް ފެނަކައަށް ފޮނުވާފައި އޮތް ސިޓީއެކެވެ. އެހެންކަމުން ކުންފުނި ހިންގުމުގައި ސަރުކާރުން އެއްބާރުލުން ނުދޭ ކަމަށް ބުނެ މުއާޒު އިސްތިއުފާ ދިނީ ޕީސީބީން މިގޮތަށް އަމަލުކުރަން އަންގާފައި ވަނިކޮށެވެ. މުއާޒު މަގާމުން އިސްތިއުފާ ދިނީ އިއްޔެގަ އެވެ.
މުއާޒުގެ އިސްތިއުފާގެ ސިޓީގައި، ގިނަ ކަންކަމާ މެދު ހިތްހަމަޖެހިވަޑައިގެން ނެތް ކަން ދޭހަވާ މޭރުމަކުން ވިދާޅުވީ ބޭނުންވާ ވަރަށް ވުރެ އިތުރަށް މުވައްޒަފުން ވެސް ނަގަން ޖެހުނު ކަމަށާއި، ކުންފުނީގެ މުވައްޒަފުން މަދުކުރަން ވެސް ސަރުކާރުގެ އެއްބާރުލުން ނުލިބުނު ކަމަށް ވިދާޅުވެފައިވެ އެވެ. އަދި ފެނަކައިގެ މާލީ ހާލަތު ރަނގަޅުކުރަން ގިނަ ގޮންޖެހުންތަކެއް ހުރި ކަން ވެސް އޭނާގެ ސިޓީގައި ބަޔާންކޮށްފައިވެ އެވެ.
