ހިޔާ ފްލެޓް H9-20-11 އެޕާޓްމަންޓް ބަލައި ފާސްކޮށް މަސްތުވާތަކެއްޗާއި ގިނަ އަދަދެއްގެ ފައިސާއާ އެއްކޮށް ހަތަރު މީހަކު އިއްޔެ ހައްޔަރު ކޮށްފި އެވެ.
ފުލުހުން ބުނީ އެ އޮޕަރޭޝަންގައި ކޯޓު އަމުރެއްގެ ދަށުން ހައްޔަރު ކުރީ ގ. ސެމިޓޯން، އިބްރާހީމް ޝަރީފް، 40 އާއި ގދ. ކޮލަމާފުށި، އޯޝަންބްލޫ، އަބްދުﷲ ހަސަން، 41 އާއި ހދ. ނޭކުރެންދޫ، އިރުދޭމާގެ، ހުސައިން ރިޔާޒު 33 އަދި ގއ. ދާންދޫ، ވަލުތެރޭގެ، އަބްދުﷲ ޖަމީލު 32 އެވެ.
"އެ އެޕާޓްމަންޓް ބަލައިފާސްކުރިއިރު، މަސްތުވާތަކެއްޗާއި މަސްތުވާތަކެތި ބަންދުކުރުމަށް ބޭނުންކުރާ އާލާތްތަކާއި ގިނަ އަދަދެއްގެ ފައިސާގެ އިތުރުން ގިނަ އަދަދެއްގެ މޯބައިލް ފޯނު ފެނިފައިވޭ،" ފުލުހުން ބުންޏެވެ.
ނަމަވެސް އެ އެޕާޓްމަންޓުން ފެނިފައި ވަނީ ކިހާ މަސްތުވާތަކެއްޗެއް ކަމަށް އަދި ކިހާ އަދަދެއްގެ ފައިސާއެއް ކަމެއް ފުލުހުން ހާމަކޮށްފައެއް ނުވެ އެވެ.
އެ މައްސަލަ ދަނީ ތަހުގީގު ކުރަމުން ކަމަށް ފުލުހުން ބުންޏެވެ.
ފަހަކަށް އައިސް ހިޔާ ފްލެޓުގައި ހިންގާ ކުށްތައް ދަނީ އިތުރު ވަމުންނެވެ. އެގޮތުން ފޭރުމުގެ މައްސަލަތަކާއި މަސްތުވާތަކެތީގެ މައްސަލަތަކުގައި ގިނަ އޮޕަރޭޝަންތައް އެތަނުގައި ހިންގާފައިވެ އެވެ.
