ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ މަސްލަހަތު އޮތް ކުންފުނިތަކަކަށް ތިލަފުށިން ގިނަ ބިންތަކެއް ދޫކޮށްފައިވާ ކަމަށް، އެ މައުލޫމާތު އެނގޭ ބައެއް ފަރާތްތަކުން ބުނެފި އެވެ.
ފަޒުލްގެ މަސްލަހަތު އޮތް ބައެއް ކުންފުނިތަކަށް ބިން ހަމަޖެއްސި ކަމަށް، އެޗްޑީސީގެ އެތެރޭގެ މައްސަލަތައް ބަޔާންކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު، ރައީސް ޑރ. މުހައްމަދު މުއިއްޒަށް ޖުލައި މަހު ފޮނުއްވި ސިޓީގައި ވެސް ފާހަގަ ކޮށްފައިވެ އެވެ.
ތިލަފުށީގައި އެމްޑަބްލިޔޫއެސްސީ އަށް އޮތް ބިމެއް، ފަޒުލްގެ މަސްލަހަތު އޮތް ހައިޕަލޫޕް ޕްރައިވެޓް ލިމިޓެޑަށް ބަދަލުކުރުމުގެ އިތުރުން، އެ ކުންފުންޏަށް 14,742 އަކަފޫޓުގެ ބިމަކާއި 15000 އަކަފޫޓުގެ ހަމަޖެއްސި ކަމަށް އެ ސިޓީގައި ބުނެފައިވެ އެވެ.
އަދަދު ނޫހަށް ލިބިފައިވާ ލިޔުންތަކުން އެނގޭ ގޮތުގައި ހައިޕާލޫޕަށް 14,742 އަކަފޫޓުގެ ބިން 25 އަހަރަށް ކުއްޔަށް ދިނީ، އަކަފޫޓެއް 5ރ. ގެ މަގުންނެވެ. މި ބިމުގެ އެކްއުޒިޝަން ފީގެ ގޮތުގައި އަކަފޫޓެއް، 38.55ރ. ގެ ރީޓުން ކަނޑައަޅާފައި ވާއިރު، ސީއެސްއާރުގެ ގޮތުގައި ދައްކަންޖެހޭ ފައިސާ ކަނޑައަޅާފައި ވަނީ އަކަފޫޓެއް 60ރ. ރޭޓުންނެވެ.
ޒުހޫރުގެ ސިޓީގައި ފަޒުލްގެ މަސްލަހަތު އޮތް އެހެން ކުންފުންޏަކަށް ވެސް 15000 އަކަފޫޓުގެ ބިމެއް ތިލަފުށިން ކުއްޔަށް ދޫކޮށްފައިވާ ފާހަގަކޮށްފައިވެ އެވެ.
އެއް މަސްދަރަށް ވުރެ ގިނަ މަސްދަރުތަކުން އަދަދު ނޫހަށް ބުނީ އެޗްޑީސީގެ މެނޭޖިން ޑިރެކްޓަރަކަށް ފަޒުލް ހުންނެވިއިރު، އޭނާއާ ގުޅުން ގާތް، އަދި މަސްލަހަތު އޮތް 15 އަށް ވުރެ ގިނަ ކުންފުންޏަށް ތިލަފުށިން ބިން ކުއްޔަށް ދޫކޮށްފައިވާ ކަމަށެވެ.
މިފަދަ ކަންކަން ހުއްޓުވަން މަސައްކަތް ކުރަމުން ދިޔުމަކީ އޭނާ މަގާމުން ވަކިކުރަން ޖެހުނު ސަބަބު ކަމަށް ޒުހޫރު ސިޓީގައި ފާހަގަކޮށްފައިވެ އެވެ.
ފަޒުލް ހިންގި ކަމަށް ތުހުމަތުކުރެވޭ ކަންކަން ކުރި ކަމަށް އެންމެ ބޮޑަށް ބާރު ލިބެނީ އެޗްޑީސީގެ ޗެއާޕާސަންގެ މަގާމުން ވަކިކުރި އަހުމަދު ޒުހޫރު ފޮނުއްވި ސިޓީއެކެވެ. ރައީސް ޑރ. މުހައްމަދު މުއިއްޒުއަށް އެޑްރެސްކޮށް ފޮނުއްވި މި ސިޓީގައި އެޗްޑީސީގެ ތެރޭގައި ފަޒުލްގެ ސީދާ ބައިވެރިވުމާއެކީ އެތައް ޖަރީމާއެއް ހިންގަމުން ދިޔަ ކަމަށް ތުހުމަތުކޮށްފައިވެ އެވެ.
އެ ސިޓީ "އަދަދު" ނޫހުން ލީކްކޮށްލުމުން، ރައީސް ޑރ. މުހައްމަދު މުއިއްޒު ވިދާޅުވީ އެ މަނިކުފާނަށް އެ ސިޓީ ލިބިވަޑައިގެންފައި ނެތް ކަމަށެވެ. ނަމަވެސް ޖުލައި 1، 2024 ގައި ރައީސް އޮފީހަށް އެ ސިޓީ ބަލައިގަނެފައިވާ ކަމުގެ ލިޔުން ވެސް ދޫކޮށްފައިވެ އެވެ.
