ސޯޝަލް މީޑިއާގައި ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއީއޯ އަދި ރައީސް އޮފީހުގެ ތަރުޖަމާން ހީނާ ވަލީދުގެ މައްޗަށް ކުރެވޭ ކޮރަޕްޝަންގެ ތުހުމަތުތަކާ އެކު އިސްތިއުފާއަށް ގިނަ ބަޔަކު ގޮވާލައިފި އެވެ.
އެންސްޕާއަށް ރައްދުވާ ކޮރަޕްޝަނުގެ މައްސަލައަކީ ރައީސް ޑރ. މުހައްމަދު މުއިއްޒާ އާއި ހީނާއާ ގުޅުން އޮތް އެމްއެމްޓީވީ ހިންގަން އެ އެޖެންސީއަށް އޮފީހެއް ބޮޑު އަގުގައި ކުއްޔަށް ދިން މައްސަލަ އެވެ.
އެ މައްސަލަ މިހާތަނަށް ވެސް ރައީސް ޑރ. މުހައްމަދު މުއިއްޒުއާ ހިސާބަށް އައިސްފައި ނުވާ ކަމަށް އެމަނިކުފާނު ވިދާޅުވުމުން ވެސް ގިނަ ބަޔަކު އަންނަނީ އެކަމަށް ފާޑު ކިޔަމުންނެވެ.
އެކްސްގައި ކުރެއްވި ޕޯސްޓެއްގައި ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒް ވިދާޅުވީ ތިންބާރު ވަކިވެފައިވާ ދައުލަތް ހިންގުމުގެ ނިޒާމު މުޅިން ނެތިގޮސް، ދައުލަތާއި ސަރުކާރަކީ ވައްކަމާއި ފޭރުމުގެ ހާއްޔެއްގެ ގޮތުގައި ސިފަވާންފެށުމަކީ އަމައްލަފުޅަށް ހީނާ ވެސް ވިސްނަންވެއްޖެ ކަމެއް ކަމަށާއި މަގާމުން އިސްތިއުފާ ދޭން ޖެހޭ ކަމަށެވެ.
އޭގެއިތުރުން އެކްސްގައި ResignHeena# ގެ ނަމުގައި ހޭޝްޓެގެއް ހަދައިގެން ގިނަ ބަޔަކު އަންނަނީ ހީނާގެ އެކި ޕޯސްޓްތައް ހަދައި އޭނާގެ އިސްތިއުފާއަށް ގޮވަމުންނެވެ.
ޕީއެންއެފްއިން ކުރިން ބޭއްވި ހަރުގެ ޖަލްސާއެއްގައި ކުރީގެ ރައީސް ޔާމީން ވެސް ވަނީ އެންސްޕާއިން ދައުލަތުގެ ފައިސާއަށް ހިޔާނާތްތެރިވި ކަމަށް ވިދާޅުވެ، ހީނާ މަގާމުން އިސްތިއުފާ ދޭން ޖެހޭ ކަމަށް ގޮވާލައިފަ އެވެ.
އެމްއެމްޓީވީ އާއި އެންސްޕާއާ ދެމެދު ވެވުނު ފަސް އަހަރުގެ އެއްބަސްވުމަކީ މަހަކަށް 580،000ރ. ގެ ރޭޓުން ކުލި ދައްކާ ގޮތަށް، ޖުމްލަ 34.8 މިލިއަން ރުފިޔާގައި އަގުކުރެވުނު އެއްބަސްވުމެކެވެ. މި އެއްބަސްވުމުގެ ކަންކަން ސޯޝަލްމީޑިއާއަށް ތިލަވެ އާންމުންނާއި އިދިކޮޅު ސިޔާސީ ފިކުރުގެ މީހުންގެ ފާޑުކިޔުން އަމާޒުވުމުން އެންސްޕާއިން ވަނީ އެއްބަސްވުން އުވާލާފަ އެވެ.
އެންޓި ކޮރަޕްޝަން ކޮމިޝަނުން އެ މައްސަލަ ތަހުގީގުކުރަން ފަށައި އެންސްޕާއިން ލިޔުންތަކެއް ވެސް ގެންދިޔަ އެވެ. ނަމަވެސް އޭގެ ފަހުން މައްސަލާގެ ތަފުސީލެއް ހާމައެއް ނުކުރެ އެވެ.
އެމްއެމްޓީވީގެ މައި ކުންފުނި ރަޖިސްޓްރީކޮށްފައި ވަނީ، ރައީސް މުއިއްޒުގެ އަމިއްލަގެ މ. ދިމްޔާތު ބަލަހައްޓަން ހުންނަ، އެ މަނިކުފާނުގެ އާއިލީ ބޭފުޅެއް ކަމުގައިވާ ހއ، ވަށަފަރު އަބްދުﷲ ޒާހިރު އެވެ. އޭނާއަކީ މީގެ ކުރިން މީޑިއާގައި އުޅުއްވި އަދި އެ ދާއިރާގެ ވިޔަފާރިއެއް ވެސް ކުރެއްވި ބޭފުޅެއް ނޫނެވެ.
