ބީއެމްއެލް 48 ވަނަ ގައުމީ ފެތުމުގެ މުބާރާތުގެ އެއް ވަަނަ ކްލަބަކަށް ފީނަ ސްވިމިން އެކަޑަމީ އާއި ދި ސްޕޯޓްސް ކްލަބް ހޮވިއްޖެ އެވެ.
އެ ގޮތުން، މުބާރާތުގެ އެއް ވަނަ ފިރިހެން ޓީމަކަށް ފީނަ ސްވިމިން އެކަޑަމީ ހޮވުނީ 330 ޕޮއިންޓް އާ އެކު އެވެ. ދެ ވަަނަ އަށް ދިޔަ ނިއު ލެގޫން ސްވިމިން ކްލަބަށް ވަނީ 200 ޕޮއިންޓް ލިބިފަ އެވެ. އަދި ތިން ވަނަ ހޯދި މޯލްޑިވްސް ލައިފްގާޑް އެސޯސިއޭޝަން އަށް ވަނީ 100 ޕޮއިންޓް ލިބިފަ އެވެ.
އެއް ވަނަ އަންހެން ޓީމަކީ، 305 ޕޮއިންޓް ހޯދި ދި ސްޕޯޓްސް ކްލަބް އެވެ. އަދި ދެ ވަނަ އަށް ދިޔަ، މޯލްޑިވްސް ލައިފްގާޑް އެސޯސިއޭޝަނަށް ވަނީ 210 ޕޮއިންޓް ލިބިފަ އެވެ. އަދި ތިން ވަނަ ހޯދި ނިއުލެގޫން ސްވިމިން ކްލަބަށް ވަނީ 115 ޕޮއިންޓް ހޯދައިފަ އެވެ.
ގައުމީ ފެތުމުގެ މުބާރާތުގެ އޯޕަން ބައިން އެއް ވަނަ ހޯދީ މުހައްމަދު ރިހާން ޝިހާމް އާއި ހަމްނާ އަހުމަދު އެވެ. މި ދެ ފެތުންތެރިން ވެސް ހިމެނުނީ އެއް ވަނަ ދިޔަ ކްލަބްތަކުގަ އެވެ.
މި ފަަހަރުގެ ގައުމީ މުބާރާތުގައި 12 ކްލަބަކުން ވާދަކުރިއިރު، ހަތަރު ކެޓަގަރީ ކުރިއަށްދިޔަ އެވެ. އެއީ، ޖޫނިއާ، ސީނިއާ، އީއޭޑީ އަދި މާސްޓާސް ކެޓަގަރީ އެވެ. އެ ގޮތުން، ޖުމްލަ އެކު، 115 ފިރިހެން އެތުލީޓުން ފެނިގެންދިޔައިރު، އަންހެން އެތުލީޓުންގެ ޖުމްލަ އަދަދަކީ 56 އެވެ.
ބައިވެރިވި ކްލަބްތަކަށް ބަލާއިރު، އޭ10 ސްޕޯޓްސް ކްލަބް، އެކުއަފީނާ ސްވިމިން ކްލަބް، ބީޖީ ސްޕޯޓްސް ކްލަބް، ކްލަބް ބޮޑުރިޔާ، ދި ސްޕޯޓްސް ކްލަބް، ފީނަ ސްވިމިން އެކެޑަމީ، ގާޑިއަންސް ސްޕޯޓްސް ކްލަބް، މޯލްޑިވްސް ލައިފްގާޑް އެސޯސިއޭޝަން، މޫދު މާލިމީ، މާޒިޔާ ސްޕޯޓްސް އެންޑް ރެކްރިއޭޝަން، ނިއު ލެގޫން ސްވިމިން ކްލަބް އަދި ސްޕޯޓްސް ނޭޗާ އެވެ.
