ޕަބްލިކް ސާވިސް މީޑިއާގެ ޑިރެކްޓަރުންގެ ބޯޑުގެ މެންބަރު ކަމަށާއި ޗެއާޕާސަންގެ މަގާމަށް މ. ހަނީކޯމްބް، އާމިނަތު ނަމްޒާ މިއަދު އައްޔަނު ކުރައްވައިފި އެވެ.
ނަމްޒާ އެ މަގާމަށް އައްޔަނު ކުރެއްވިއިރު ހުންނެވީ ލޯކަލް ގަވަމަންޓް މިނިސްޓްރީގެ ޑެޕިއުޓީ މިނިސްޓަރަކަށެވެ. މި ސަރުކާރު ފެށުނުއިރު ނަމްޒާ ހުންނެވީ ޖެންޑާ މިނިސްޓްރީގެ ޑެޕިއުޓީ މިނިސްޓަރަކަށެވެ. ނަމަވެސް އެ މިނިސްޓްރީގައި ފެންމަތިވި މައްސަލަތަކާ ގުޅިގެން އޭނާ ލޯކަލް ގަވަމަންޓް މިނިސްޓްރީއަށް ބަދަލު ކުރީ އެވެ.
މިދިޔަ ރޯދަ މަހު ޓީވީއެމް އިން ގެނެސްދިން އިހުސާސް ޕްރޮގްރާމަކާ ގުޅިގެން ވަރަށް ބޮޑެތި ފާޑު ކިޔުންތައް ވެސް އޭނާއަށް އަމާޒުވި އެވެ. އެގޮތުން, ޕްރޮގްރާމާ ގުޅިގެން އަމާޒުވި ފާޑު ކިޔުންތަކާ ގުޅިގެން އޭރު ޕީއެސްއެމްއިން މައާފަށް އެދި، ޕްރޮގްރާމްގެ ކޮންޓެންޓު ކޮމިޓީން ބެލުމަށް ފަހު އެއާ ކުރުމަށް ނިންމި އެވެ.
ޓީވީއެމްގެ ޕްރެޒެންޓަރެއް ގޮތުގައި މަޝްހޫރުވި ނަމްޒާ އެންމެ ފުރަތަމަ ޕްރޮގްރާމް ހުށަހަޅައިދޭން ފެށީ 2001 ވަނަ އަހަރު އިނގިރޭސި ބަހުން ގެނެސްދޭ "ޓޫރިޒަމް އަންލިމިޓެޑް" އިންނެވެ.
އެއަށްފަހު ޓީވީއެމްއިން ގެނެސްދޭ ޕްރޮގްރާމްތައް ފާއިތުވި އަހަރުތަކުގައި ނަމްޒާ ވަނީ ގެނެސްދީފަ އެވެ. އޭގެ ތެރޭގައި އިނގިރޭސި ބަހާއި ދިވެހިން ބަހުން ވަނީ ޕްރޮގްރާމްތައް ހިމެނެ އެވެ.
ޕީޕީއެމް ކޮންގްރެސްގައި 2013 ގައި އެ ޕާޓީގެ އޭރުގެ ނައިބުރައީސް އަހުމަދު އަދީބުގެ ކެމްޕެއިން ޖަލްސާއެއް ހުށަހަޅައި ދިނުމުން މޯލްޑިވްސް ބްރޯޑްކާސްޓިން ކޯޕަރޭޝަން (އެމްބީސީ) ގެ ޝޯތަކުން ނަމްޒާ ސަސްޕެންޑު ވެސް ކުރި އެވެ.
