ރާއްޖޭގައި ބޭއްވި އޭޓީއެފް ދެ މުބާރާތް، މޯލްޑިވްސް އޯޕަންގެ ސިންގަލްސް ބައި ކާމިޔާބުކުރި އާރާ އާސާލް އާޒިމް އުންމީދު ކުރަނީ ކުރިއަށް އޮތް ތަނުގައި ވެސް ރާއްޖޭގައި ބައިނަލްއަގްވާމީ ޓެނިހުގެ ގިނަ މުބާރާތްތައް ބޭއްވިގެންދާއިރު، އިތުރު ކާމިޔާބީ ހޯދުމަށް ކަމަށް ބުނެފި އެވެ.
އާރާ ވަނީ މި މަހު ރާއްޖޭގައި ބޭއްވި "އޭޓީއެފް މޯލްޑިވްސް ޖޫނިއާ އޯޕަން" ދެ މުބާރާތް ކާމިޔާބުކޮށްފަ އެވެ.
ފުރަތަަމަ މުބާރާތުގެ ފައިނަލުގައި، ރާއްޖޭގެ ނަޔާރާ އުސާމާ އަލީއާ ކުޅެގެން އާރާ މޮޅުވީ، 6-0، 6-4 އިންނެވެ. ދެ ވަނަ މުބާރާތުގެ ފައިނަލުގައި ހޮންގް ކޮންގްގެ ހުއި ލަމް އެލާ ވޯންގްއާ ކުޅެގެން މޮޅުވެފަ އެވެ. މިއީ މި ފެންވަރުގެ މުބާރާތެއްގައި ރާއްޖޭގެ ޓެނިސް ކުޅުންތެރިއަކު ހޯދި އެންމެ ބޮޑު ކާމިޔާބީ އެވެ.
މި ކާމިޔާބީ އަށް ފަހު "އަދަދު ސްޕޯޓްސް" އާ ވާހަކަ ދައްކަމުން އާރާ ބުނީ ގާތްގާތުގައި ބޭއްވި މި އޭޓީއެފްގެ ދެ މުބާރާތް ކާމިޔާބުކުރުމަކީ، މިއީ އޭނާގެ ކެރިޔަރުގައި މިހާތަނަށް ބެލިޔަސް ލިބުނު ބޮޑު ކާމިޔާބީ އެއް ކަމަށެވެ.
"އަސްލު ހަގީގަތުގައި ފުރަތަަމަ ހަފްތާގެ މުބާރާތަށް ވުރެ ދެ ވަނަ ހަފްތާގެ މުބާރާތް ޕާފޯމަންސަށް ބަލާއިރު ވަރަށް ރަނގަޅުކުރެވިފައި ވަނީ،" އާރާ ބުންޏެވެ.
މީގެ ކުރިން، މޯލްޑިވްސް ސްޕޯޓްސް އެވޯޑްސްގައި ހޮވި އެންމެ މޮޅު ޓެނިސް އަންހެން ކުޅުންތެރިއަކަށް ހޮވުނު އާރާ ބުނީ ފުރަތަމަ މުބާރާތުން ފެށިގެން ދުވަހުން ދުވަހަށް ކުޅުން ރަނގަޅު ކުރެވުނު ކަމަށާއި, އޭގެ ނަތީޖާ އަކީ ފައިނަލަށް ތައްޔާރުވެވުން ކަމަށެވެ.
"މިއީ ލިބުނު ބޮޑު ހިތްވަރެއް. މިއީ ވަރަށް ބޮޑު މޯޓިވޭޝަނެއް ހަގީގަތުގައި ކުރިއަށް އޮތްތަނުގައި މިއަށްވުރެ ރަނގަޅަށް މަސައްކަތްކޮށް އިތުރު ކާމިޔާބީތައް ހޯދަން، ދެން އޮތް ލެވަލަށް ދާން،" އާރާ ބުންޏެވެ.
އާރާ ބުނީ އަމިއްލަ ގައުމުގައި ބޭރުގެ ފެންވަރު ރަނގަޅު ކުޅުންތެރިންނާ އެކު ވާދަކޮށްލަން ލިބުނު ފުރުސަތަކީ މުޅިން އައު ތަޖުރިބާއެއް ކަމަށެވެ. އަދި މި ތަޖުރިބާގެ އަލީގައި ކުރިއަށް ހުރި މުބާރާތްތަކުގައި ވެސް އިތުރު ކާމިޔާބީ އަމިއްލަ ގައުމުގައި ހޯދަން ބޭނުންވާ ކަމަށް ވެސް އާރާ ބުނެފައިވެ އެވެ.
"މިއީ އަމިއްލަ ގައުމުގައި މި ގޮތަށް ބޭއްވުނު ފުރަތަމަ އިންޓަނޭޝަނަލް މުބާރާތް. މި ތަޖުރިބާ އިން ވަރަށް ބޮޑަށް ކުރިއަށް އޮތްތަނުގައި ވަރަށް ބޭނުންހިފޭނެ މުސްތަގުބަލުގައި އޮތް މުބާރާތްތަކުގައި، އަހަންނަށް ޔަގީންވޭ ރާއްޖޭގައި އިތުރު އިންޓަނޭޝަނަލް މުބާރާތްތަކެއް މުސްތަގުބަލުގައި ބާއްވާނެ ކަމުގެ، ކެތްމަދުވެފައި މި ހުރީ އެ މުބާރާތްތަކުގައި ކުޅެލަން ވެސް،" އާރާ ބުންޏެވެ.
