ހައުސިން ޑިވެެލޮޕްމަންޓް ކޯޕަރޭޝަން (އެޗްޑީސީ) ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާ ގުޅޭ ބައިވަރު މައްސަލަތައް ފާހަގަކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ފޮނުވި ސިޓީ ނުލިބޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވިއިރު، އެ ސިޓީ ރައީސް އޮފީހުން ބަލައިގެންފައިވާ ކަން "އަދަދު" އަށް އެނގިއްޖެ އެވެ.
އެޗްޑީސީއާ ގުޅިގެން ފެންމަތިވެގެން އުޅޭ މައްސަލަތަކާ ގުޅިގެން ރައީސް އޮފީސް ބޭރުގައި ހުންނަވާ ނޫސްވެރިންނާ ވާހަކަ ދައްކަވަމުން ޒުހޫރު ފޮނުވި ސިޓީއާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ވަނީ އެ ސިޓީ އެމަނިކުފާނަށް ނުލިބޭ ކަމަށް ވިދާޅުވެފަ އެވެ.
"އާދެ، އަޅުގަނޑު ވެސް ތި ވާހަކަ އަޑުއެހިން. އަޅުގަނޑަކަށް ނުލިބޭ އިނގޭތޯ ސިޓީއެއް. އަޅުގަނޑަށް ތި ވިދާޅުވާ ސިޓީއެއް އައިސްފައެއް ނެތް، ނުލިބޭ. އަޅުގަނޑަށް ލިބުނު ނަމަ އަޅުގަނޑު އެއަށް އަމަލުކުރާނަން ނުވަތަ އެއަށް ބަލާނަން،" ރައީސް ވިދާޅުވި އެވެ.
ރައީސް މިހެން ވިދާޅުވި ނަމަވެސް އެ ސިޓީ ރައީސް އޮފީހުން ބަލައިގެންފައިވާ ކަމުގެ ލިޔުމުގެ ކޮޕީއެއް މި ނޫހަށް ލިބިފައިވެ އެވެ. ރައީސް އޮފީހުގެ ރަސްމީ ތަތްގަނޑު ޖަހާފައި އޮތް އެ ލިޔުމުގައި އޮތީ އެ ސީޓީ ގެނައި މީހަކީ ވެސް ޒުހޫރު ކަމަށެވެ. އެ ސިޓީ އެ އޮފީހުން ބަލައިގަތް ތާރީހަކީ ޖުލައި 1، އެވެ. އަދި އެ އޮފީހުން އެ ސިޓީއާ ހަވާލުވީ މުވައްޒަފު ކަމަށް އޮތީ އައިމިނަތު ނަފްޝާ، ކިޔާ މީހެކެވެ.
ރައީސްއަށް އެޑްރެސްކޮށް ފޮނުވި ސިޓީއެއް ރައީސް އޮފީހުން ބަލައިގަތުމަށް ފަހު، ރައީސްގެ މޭޒުކޮޅާ ހަމައަށް އެ ސިޓީ ނުދިޔަ ސަބަބެއް އަދި ނޭނގެ އެވެ. ރައީސް އެ ވިދާޅުވާ ގޮތަށް މިކަން ހިނގާފައިވާނަމަ އެއީ ކަނޑައެޅިފައި އޮންނަ އުސޫލުތަކާ ހަމަތަކާ ހިލާފަށް ހިނގާފައިވާ ކަމެކެވެ.
ޒުހޫރުގެ ސިޓީގެ މައްސަލަ ބޮޑުވީ، އެޗްޑީސީގައި ހުރި މައްސަލަތައް ރައީސްގެ ސަމާލުކަމަށް މީގެ ފަސް މަސް ކުރިން ގެނައި ނަމަވެސް ސޯޝަލް މީޑިއާގައި މިކަންތައް ހާމަވުމާ ހަމައަށް، ފަޒުލްއަށް އެއްވެސް ފިޔަވަަޅެއް އަޅާފައި ނުވާތީ އެވެ. މިކަމުގައި އިދިކޮޅާއީ އާންމުންގެ މީހުން ވެސް ތުހުމަތުކުރަނީ ރައީސް ވެސް ޒިންމަވާ ނަގަން ޖެހޭނެ ކަަމަށެވެ.
މި ތުހުމަތުތަކުން ބަރީއަވަމުން ރައީސް ވިދާޅުވީ، މިވަރުގެ ކަމެއް ހިނގާކަން ކުރިން އެނގިފައި އޮތް ނަމަ އެމަނިކުފާޏު ވައުދުވެފައިވާ ގޮތަށް ފިޔަވަޅު އެޅީސް ކަމަށެވެ. އަދި ކޮރަޕްޝަނުގެ އަމަލުތަކާއި ގަވާއިދު ހިލާފަށް ހިނގާ ކަންކަން ހުއްޓުވުމަށް ފަހަތަަކަށް ނުޖެހޭނެ ކަަމަށް ވެސް ރައީސް ވިދާޅުވި އެވެ.
"މިއަދާ ހަމައަށް ވެސް ހުންނާނީ ހަމަ އެކި ތަންތަނުގައި ނޫނީ އެކި މީހުން ކޮށްފައި ހުރި ކަންތައްތައް، ކަންކަމުގައި މައުލޫމާތު ލިބުނީމައި، އަޑުއަޑު އިވުނީމައި އެކަމަކަށް ފިޔަވަޅު އަޅަން ކަމާއިބެހޭ ފަރާތްތަަކަށް ދަންނަވާފައި،" ރައީސް ވިދާޅުވި އެވެ.
އެޗްޑީސީއާ ގުޅޭ މައްސަލައަކަށް ފަހު މައްސަލައެއް ފެންމަތިވާން ފެށުމުން، ބިންވެރިޔާ ސްކީމުން ގޯތި ނުލިބޭ ބަޔަކަށް ގޯތި ދޭން އުޅުނު މައްސަލައިގައި ސަސްޕެންޝަނުގައި ހުރި ފަޒުލް ވަނީ އިއްޔެ މަގާމުން އިސްތިއުފާދެއްވާފަ އެވެ. މި މައްސަލައާ ގުޅިގެން އެޗްޑީސީގެ އިތުރު މުވައްޒަފުންތަކެއް ސަސްޕެންޑުކޮށް، 15 މުވައްޒަފަކު ވަޒީފާއިން ވެސް ވަކިކޮށްފި އެވެ.
