މިއުނިކް (ޑިސެމްބަރު 22) - ޕެޓްރިކް ޝިކް ޖެހި ހަތަރު ގޯލާ އެކު، ފްރައިބާގް އަތުން 5-1 އިން މޮޅުވެ، ބަޔާ ލެވަކޫސަނުން ޖަރުމަނު ލީގުގެ އެއް ވަނައިގައި އޮތް ބަޔާން މިއުނިކްގެ ލީޑު ކުޑަކޮށްފި އެވެ.
ބަޔާނުން ވަނީ އާރްބީ ލައިޕްޒިގު އަތުން 5-1 އިން މޮޅުވެ، ލީޑުފުޅާކޮށްފަ އެވެ. އެކަމަކު، ލެވަކޫސަން މޮޅުވުމާ އެކު، ބަޔާންގެ ލީޑުވަނީ ހަތަރު ޕޮއިންޓަށް ކުޑަވެފަ އެވެ. ބަޔާނަށް ވަނީ 15 މެޗުން 36 ޕޮއިންޓް ލިބިފަ އެވެ. ދެ ވަނައިގައި އޮތް ލެވަކޫސަނަށް ލިބިފައިވަނީ 15 މެޗުން 32 ޕޮއިންޓެވެ.
ލެވަކޫސަން ދަނޑުގައި ކުޅުނު މެޗުގައި އެ ޓީމަށް ލީޑުނަގައިދޭން ލިބުނު ޕެނަލްޓީ ފްލޯރިއަން ވާޓްޒް އަތުން ވަނީ ނާކާމިޔާބުވެފަ އެވެ. ލެވަކޫސަނުން ލީޑުނެގީ ފުރަތަމަ ހާފުގެ އިތުރު ވަގުތުގައި، ޝިކް ޖެހި ގޯލުންނެވެ. މިދިޔަ ސީޒަނުގައި ލެވަކޫސަނުން ލީގު ޗެމްޕިއަންކަން ހޯދިއިރު ވެސް ޝިކް ވަނީ މުހިންމު ވަގުތުތަކުގައި ތަފާތު ދައްކައިފަ އެވެ.
ދެ ވަނަ ހާފު ފެށިގެން ހަ މިނިޓް ތެރޭ ވާޓްޒް ގޯލެއް ޖަަހައި، ލެވަކޫސަންގެ ލީޑުފުޅާކޮށްދިން ނަމަވެސް، ފްރައިބާގްގެ ވިންޗެންޒޯ ގްރީފޯ ގޯލެއް ޖަހައި އެ ޓީމަށް އުންމީދެއް ހޯދައިދިނެވެ.
އެކަމަކު، އޭގެ ފަހުން، ފެނިގެންދިޔައީ، ޝިކް އަށް ލިބުނު ފުރުސަތަކުގެ ބޭނުންހިފައި، ތިން ގޯލު ޖަަހައި، ލެވަކޫސަނަށް މި މެޗުގެ ތިން ޕޮއިންޓް ޔަގީންކޮށްދިން މަންޒަރެެވެ. ޝިކް މި ހެޓްރިކް ހެދީ 10 މިނިޓް ތެރޭގަ އެވެ.
ލައިޕްޒިގު ކޮޅަށް ފުރަތަމަ މިނިޓްގައި ޖަމާލް މުސިއާލާ ވަނީ ލަނޑު ޖަހައި، ބަޔާނަށް ކުރިހޯދައިދީފަ އެވެ. އެކަމަކު، ސްލޮވީނިއާގެ ފޯވާޑް، ބެންޖަމިން ސެސްކޯ ވަނީ ގޯލެއް ޖަހައި، ލައިޕްޒިގަށް އެއްވަރުކޮށްދީފަ އެވެ. ބަޔާން މޮޅުވި ގޯލުތައް ޖެހީ، ކޮންރަޑް ލައިމާ، ޔޯޝުއާ ކިމިކް، ލެރޯއި ސާނޭ އަދި އަލްފަންސޯ ޑޭވިސް އެވެ.
