ސަރުކާރު ޒިންމާދާރު ކުރުމަށް އެއްބަސްވާ ހުރިހާ ސިޔާސީ ޕާޓީތަކާއި ޖަމިއްޔާ ޖަމާއަތްތަކާ އެކު އެއްބަސްވެވޭ ހަމަތަކެއްގެ މަތިން މަސައްކަތް ކުރުމަށް ދަ ޑިމޮކްރެޓްސްއިން ނިންމައިފި އެވެ.
ޑިމޮކްރެޓްސްގެ ނެޝަނަލް އެސެމްބްލީއަށް އެ ޕާޓީގެ ނައިބުރައީސް މުހައްމަދު ޝިފާޒް ހުށަހެޅުއްވި ގަރާރުގައި ވިދާޅުވީ ޕާޓީތަކާއި ޖަމާއަތްތަކާ އެކު މަސައްކަތް ކުރަން ފަށަނީ ސަރުކާރު ހަމަ މަގަށް އަޅުވައި ޒިންމާދާރު ކުރުމުގެ މަސައްކަތް އިތުރަށް ފުޅާ ކުރުމުގެ ގޮތުން ކަމަށެވެ.
އެގޮތުން ޑިމޮކްރެޓްސްއަކީ ސަރުކާރުގައި އޮތް ސިޔާސީ ޕާޓީއަކަށް ނުވުމާއި އަދި އިދިކޮޅު ޕާޓީއެއްގެ ގޮތުގައި މަސައްކަތް ކުރަމުންދާ ޕާޓީއެއްކަން ފާހަގަކޮށް ގަރާރުގައި ބުނީ ސަރުކާރުން ގަސްތުގަ އާއި އިހުމާލުން ރައްޔިތުންނާއި ދިވެހިރާއްޖެއަށް ބޭއިންސާފުވެ، ގެއްލުން ބޮޑު އެތައް ކަމެއް ތަކުރާރު ކުރަމުންދާ ކަމަށެވެ.
"ދިވެހިރާއްޖޭގެ ގާނޫނު އަސާސީ އިން ތަރުތީބު ކޮށްފައިވާ ޑިމޮކްރެޓިކް ނިޒާމު ބަލިކަށިކޮށް، ދައުލަތުގެ މުވައްސަސާތައް ރައީސުލްޖުމްހޫރިއްޔާއަށް ކޮންޓްރޯލް ލިބޭ ގޮތަށް ބަދަލުކޮށް، ރައްޔިތުންގެ ބާރުވެރިކަން ގެއްލޭ ގޮތަށް ގާނޫނު އަސާސީއަށް ކުއްލި ބޮޑެތި ބަދަލުތައް ގެނެސް ސަރުކާރު ޖަވާބުދާރީ ކުރުމުގެ ދޮރުތައް ދަނީ ބަންދު ކުރަމުން،" ގަރާރުގައި ފާހަގަކުރި އެވެ.
ޑިމޮކްރެޓްސްއިން ސަރުކާރު ޖަވާބުދާރީ ކުރުވުމަށް އެހެން ސިޔާސީ ޕާޓީތަކާއި ޖަމިއްޔާ ޖަމާއަތްތަކާ އެކު މަސައްކަތް ކުރުމަށް ނިންމާފައިވާއިރު، އެމްޑީޕީން ވެސް ވަނީ ވަކި އުސޫލެއްގެ ދަށުން އެހެން ސިޔާސީ ޕާޓީތަކާ އެކު ސަރުކާރު ޖަވާބުދާރީ ކުރުވުމަށް މަސައްކަތް ކުރަން ދާދި ފަހުން އިގުރާރުވެފަ އެވެ.
