އިޖުތިމާއި ސިއްހީ އިންޝުއަރެން ސްކީމާއި އިޖުތިމާއީ ރައްކާތެރިކަމުގެ އެހެނިހެން ޕްރޮގްރާމުތައް ހިންގާ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ޑެޕިއުޓީ ސީއީއޯ ޝިއުނާ އަހުމަދު މަގާމުން ވަކިކޮށްފި އެވެ.
އެންސްޕާއިން ޝިއުނާ ވަކިކުރި ސަބަބެއް އަދި ނޭނގެ އެވެ. ނަމަވެސް އިތުބާރު ހުރި މަސްދަރުތަކުން ވަނީ އޭނާ މަގާމުން ވަކިކޮށްފައިވާކަން "އަދަދު" އަށް ކަށަވަރުކޮށްދީފަ އެވެ. އަދި އޭނާ ވަކިކުރީ ގާނޫނު އަސާސީގެ 115 ވަނަ މާއްދާގެ ރައީސްއަށް ލިބިދޭ ބާރުގެ ދަށުން ކަން ވެސް މި ނޫހަށް އެނގިފައިވެ އެވެ.
އެންސްޕާގެ ޑެޕިއުޓީ ސީއީއޯ ވަކިކޮށްފައި މިވަނީ ރައީސް ޑރ. މުހައްމަދު މުއިއްޒާ ގުޅުން އޮތް އެމްއެމްޓީވީ ހިންގަން އެ އެޖެންސީއަށް އޮފީހެއް ހޯދުމަށް ކަމަށް ބުނެ ފައިސާތަކެއް ދިން މައްސަލައެއް ފެންމަތިވެފައި ވަނިކޮށެވެ.
އެމްއެމްޓީވީ އާއި އެންސްޕާއާ ދެމެދު ވެވުނު ފަސް އަހަރުގެ އެއްބަސްވުމަކީ މަހަކަށް 580،000ރ. ގެ ރޭޓުން ކުލި ދައްކާ ގޮތަށް، ޖުމްލަ 34.8 މިލިއަން ރުފިޔާގައި އަގުކުރެވުނު އެއްބަސްވުމެކެވެ. މި އެއްބަސްވުމުގެ ކަންކަން ސޯޝަލްމީޑިއާއަށް ތިލަވެ އާންމުންނާއި އިދިކޮޅު ސިޔާސީ ފިކުރުގެ މީހުންގެ ފާޑުކިޔުން އަމާޒުވުމުން އެންސްޕާއިން ވަނީ އެއްބަސްވުން އުވާލާފަ އެވެ.
ޝިއުނާ ވަކިކުރުމާ މި މައްސަލައާ ގުޅުން ހުރި ކަމެއް ސާފެއް ނޫނެވެ. މިކަމާ ގުޅޭ ގޮތުން މައުލޫމާތު ހޯދަން ރައީސް އޮފީހުގެ ތަރުޖަމާނު އަދި އެންސްޕާގެ ސީއީއޯ ހީނާ ވަލީދުއަށް ގުޅުމުން އޭނާ ފޯނަށް ޖަވާބު ނުދެއްވާތީ އެއްވެސް ކަމެއް ސާފުވާ ގޮތެއް ނުވި އެވެ.
ޝިއުނާއަކީ ރައީސް މުއިއްޒުއާ ކުރިން ވަރަށް ގާތް ގުޅުމެއް އޮތް، އޭރުގެ ރައީސް އޮފީހުގެ މިނިސްޓަރު އާދަމް ރަމީޒުގެ ކޮއްކޮ އެވެ.
