ލަންޑަން (ޑިސެމްބަރު 19) - އިނގިރޭސި ލީގު ކަޕްގެ ސެމީ ފައިނަލުން ލިވަޕޫލާއި އާސެނަލް އަދި ނިއުކާސަލް ޔުނައިޓެޑް ޖާގަ ހޯދައިފި އެވެ.
މުބާރާތުގެ އެންމެ ކާމިޔާބު ޓީމު ލިވަޕޫލުން ވަނީ ކުއާޓާ ފައިނަލުގައި ރަށުންބޭރުގައި ކުޅުނު މެޗުން ސައުތެމްޓަން އަތުން 2-1 އިން މޮޅުވެފަ އެވެ. އާސެނަލުން ވަނީ އަމިއްލަ ދަނޑުގައި ކްރިސްޓަލް ޕެލަސް އަތުން ފަހަތުން އަރައި 3-1 އިން މޮޅުވެފަ އެވެ. އަދި ނިއުކާސަލް އިން އަމިއްލަ ދަނޑުގައި ކުޅެގެން ބްރެންޓްފޯޑް ބަލިކުރީ 3-1 އިންނެވެ.
ލިވަޕޫލުން ގިނަ ބަދަލުތަކާ އެކު، ސައުތެމްޓަންއާ ދެކޮޅަށް ނުކުމެ، ލީޑުނެގީ ޑާވިން ނޫނޭޒް ޖެހި ގޯލުންނެވެ. ހަ މެޗަށް ފަހު ނޫނޭޒްގެ ގޯލެއް ފެނުނު މި މެޗުގައި، ލިވަޕޫލްގެ ކޯޗު އާނާ ސްލޮޓް ހުރީ ބެންޗަށް ނާދެވޭ ގޮތަށް ސަސްޕެންޝަނެއްގަ އެވެ. ލިވަޕޫލުން ފުރަތަމަ ހާފުގައި ލީޑުފުޅާކުރީ ހާވީ އެލިއަޓް ޖެހި ގޯލުންނެވެ.
ދެ ވަނަ ހާފުގައި، ކެމަރަން އާޗާ ވަނީ ލަނޑެއް ޖަހައި، ސައުތެމްޓަން އަށް އުންމީދެއް ހޯދައިދީފަ އެވެ. ބަދަލަކަށް ކުޅެން އެރި ލިވަޕޫލްގެ ފެޑެރީކޯ ކިއޭސާ ވަނީ ލަނޑެއް ޖެހޭތޯ ރަނގަޅު ދެ ހަމަލާއެއް ފޮނުވާލައިފަ އެވެ.
އާސެނަލްގެ ޖީސޫސް ގޯލަށް ބޯޅަ ފޮނުވާލަނީ.--- ފޮޓޯ: އޭއެފްޕީ
އާސެނަލް ދަނޑުގައި ޖިއަން ފިލީޕޭ މަޓޭޓާ ވަނީ މެޗު ފަށައިގެން މާ ލަސްތަކެއް ނުވެ، ޕެލަސް އަށް ކުރިހޯދައިދީފަ އެވެ. އާސެނަލް މޮޅުވީ، ދެ ވަނަ ހާފުގައި ގަބްރިއެލް ޖީސޫސް ހެދި ހެޓްރިކުންނެވެ.
މިއީ، މިދިޔަ އޮކްޓޫބަރު މަހުގެ ފަހުން، ޖީސޫސްގެ ފުރަތަމަ ލަނޑުތަކެވެ. އަދި އިނގިރޭސި ޕްރިމިއާ ލީގުގައި އޭނާ އެންމެ ފަހުން ގޯލު ޖެހީ، މިދިޔަ ޖެނުއަރީ މަހު އެވެ.
ނިއުކާސަލް އަށް ރޭގެ މެޗުގައި ސަންޑްރޯ ޓޮނާލީ ވަނީ ދެ ގޯލު ޖަހައިދީފަ އެވެ. އަނެއް ލަނޑު ޖަހައިދިނީ ފަބިއަން ޝެއާ އެވެ. ބްރެންޓްފޯޑްގެ ހަމައެކަނި ލަނޑު ޖެހީ އިތުރު ވަގުތުގައި ޖޮއާން ވިއްސާ އެވެ.
ލީގު ކަޕް ސެމީ ފައިނަލުގެ ގުރުއަތުލުން އޮންނާނީ ކުއާޓާ ފައިނަލުގައި މިރޭ މެންޗެސްޓާ ޔުނައިޓެޑާއި ޓޮޓެންހަމް ހޮޓްސްޕާސް ކުޅޭ މެޗަށް ފަހު އެވެ.
