ބިންވެރިޔާ ސްކީމުގެ ދަށުން ގޯތި ނުލިބޭ ބަޔަކަށް ވަގު ރަޖިސްޓްރީތަކެއް ހަދައި ދިނުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ އެއްވެސް ބައިވެރިވުމެއް ނޯންނާނެ ކަމަށް އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު މިރޭ ވިދާޅުވެއްޖެ އެވެ.
ވަގަށް ގޯތިތަކެއް ދިން މައްސަލައިގައި ޖަވާބުދާރީވާން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވަނީ އޭނާއަށް ކުރެވޭ ހުރިހާ ތުހުމަތުތަކެއް ދޮގުކުރައްވާފަ އެވެ. އަދި ވިދާޅުވީ ބިންތައް ހަވާލުކުރުމުގެ އެއްބަސްވުންތަކާއި ރަޖިސްޓްރީތައް ހަދައި ދިނުމަކީ ހައުސިން މިނިސްޓްރީން ކުރާ ކަމެއް ކަމަށާއި އެކަމުގައި އެޗްޑީސީގެ ދައުރެއް ނޯންނާނެ ކަމަށެވެ.
ފަޒުލް ވިދާޅުވި ގޮތުން ނަމަ މިކަން ސަމާލުކަމަަށް އައީ ވެސް އެ ކުންފުނިން މިކަމުގައި އޮންނަ އުސޫލުގެ ތެރެއިން ކަންކަން ކުރީމަ އެވެ. އެއީ އެހެން ބަޔެއްގެ ނަން މަތީގައި ރަޖިސްޓްރީކޮށްފައި އޮތް ގޯތިތަކެއްގައި ވަށާފާރު ރާނަން ހުއްދައަށް އެދި އެ ކުންފުންޏަށް އެދި ހުށަހެޅުމުން އެކަން ސާފުކުރަން ހައުސިންގައި އެދުމުންނެވެ.
"އަޅުގަނޑުމެން ޝާމިލުވާ ހިސާބަކީ [] އަޅުގަނޑުމެންގެ ޕޯޓަލް މެދުވެރިވެގެން އެޕްލިކޭޝަނެއް އަންނަ ހިސާބަކީ އަޅުގަނޑުމެން އޭގައި ޝާމިލުވާ ހިސާބު. އޭގެ ކުރިން މި އޮންނަނީ އަޅުގަނޑުމެންނާ ހައުސިން މިނިސްޓްރީއާ ދޭތެރޭގައި އޮންނަ މުއާމަލާތްތަކެއްގެ ތެރެއިން ހިނގާ ކަންކަން. އެއީ ވެރިފިކޭޝަން ޕްރޮސެސް،" ފަޒުލް ވިދާޅުވި އެވެ.
"އެހެންވީމަ، އަޅުގަނޑުމެންނަށް ބައުންޑަރީ ވޯލް ޕާމިޓަކަށް އަޅުގަނޑުމެންގެ ޕޯޓަލް މެދުވެރިވެގެން އެޕްލައި މިކުރަނީ އެ ރަޖިސްޓްރީއެއް އޮންނަ ފަރާތެއް ކަމަށް އަޅުގަނޑުމެން ގަބޫލު މިކުރަނީ."
އެޗްޑީސީން ހައުސިން މިނިސްޓްރީގައި ދެ ބިމަކާ ގުޅޭ ކަންކަން ސާފުކުރަން އެދުނީ އެހެން ބަޔެއްގެ ނަންމަތީގައި ހުރި ބިންތަކަކަށް މިފަދަ ހުއްދައަކަށް އެދި ހުށަހެޅުމެއް އައިސްގެންނެވެ. ފަޒުލް ވިދާޅުވި ގޮތުގައި، މިގޮތަށް ދެ ބިމަކާ ގުޅޭ ހަ މައްސަލައެެއް އެބައޮތް ކަމަށެވެ. މިހާރު އާންމުވެގެން އުޅޭ ލިޔުންތަކަކީ މި ބުނާ މައްސަލައިގައި ހިމެނޭ ދެ ބިން ކަމަށް އޭނާ ވިދާޅުވި އެވެ.
މިތަނުން އެއް ބިމުގައި ވަށާފާރެއް ރާނަން އެދި ހުއްދައަށް އެދުނީ ފަޒުލްގެ ބޭބެ، މުހައްމަދު ފަޒީލް ރަޝީދެވެ. ބިންވެރިޔާ ސްކީމުގެ ލިސްޓުތަކުން އެނގޭ ގޮތުގައި އޭނާއަކީ އެ ސްކީމަށް ޝަރުތު ހަމަނުވާތީ ބިން ނުލިބޭ ލިސްޓުގައި އޮތް މީހެކެވެ.
ފަޒުލް ވިދާޅުވި ގޮތުގައި މި މައްސަލައިގެ ތެރޭގައި އޭނާގެ ބޭބެ ހިމެނުމަކީ އިއްތިފާގެކެވެ. އަދި "އަމިއްލަ ލޭ ހިނގިޔަސް" ކަން ކުރާނީ އޮންނަ އުސޫލުގެ ތެރެއިން ކަމަށް އޭނާ ތަކުރާރުކޮށް ވިދާޅުވި އެވެ.
ދެން މިގޮތަށް ވަށާ ފާރު ރޭނުމުގެ ހުއްދައަށް އެދި ބިންވެރިޔާގެ ދަށުން ބިމެއް ލިބިފައިވާ ކަމަށް ސައްހަ ނޫން ލިޔެކިޔުންތަކެއް ހުށަހެޅި ކަމަށް ތުހުމަތުކުރެވޭ މީހާއަކީ މާލޭ ރައްޔިތެއް ވެސް ނޫނެވެ. އަބްދުލްމަޖީދު މާހިރު ނަމަކަށް ކިޔުނު މި މީހާގެ ރަޖިސްޓްރީ އޮންނަނީ ހއ. ދިއްދޫގަ އެވެ. މާލޭގެ ރަށްވެހިކަން ނެތް އިތުރު މީހަކު ވެސް ބިމެއް ލިބުނު ކަމަށް އެޗްޑީސީއަށް ހުށަހަޅާފައިވާ ކަމަށް ފަޒުލް ހާމަކުރެއްވި އެވެ.
ނޫސްވެރިންގެ ބައްދަލުވުމުގައި، މައްސަލަ ސޯޝަލް މީޑިއާގައި އާންމުވުމުގެ ކުރިން ގިނަ ދުވަސްތަކެއް ވޭތުވީއިރު ފިޔަވަޅެއް ނޭޅީ ކީއްވެގެންތޯ އާއި މަސްލަހަތު ފުށުނާރާތޯ ތަކުރާރުކޮށް ނޫސްވެރިން ސުވާލުކުރި އެވެ. މިކަމަށް ސީދާ ޖަވާބެއް ނުދެއްވާ ފަޒުލް ވިދާޅުވަމުން ގެންދެވީ އެއީ އެ ކުންފުނީގެ ޒިންމާގެ ތެރޭގައި ހިމެނޭ ކަމެއް ނޫން ކަމަށާއި އޭނާގެ މަސްލަހަތު ފުށުއަރާ ކަމެއް ނެތް ކަމަށެވެ.
ފަޒުލް އިތުރަށް ވިދާޅުވީ، ހައުސިންއިން ނާންގާ އެއްވެސް މީހަކަށް އެޗްޑީސީން ގޯތި ދީފައި ނުވާނެ ކަމުގެ ޔަގީންކަން އަރުވާ ކަމަށެވެ.
