އުރީދޫ ފަން ރަން 5,000 ބައިވެރިންނާ އެކު އަންނަ ހުކުރު ދުވަހު ހުޅުމާލެ ސެންޓްރަލް ޕާކްގައި ބާއްވަން ތައްޔާރުވެއްޖެ އެވެ.
އުރީދޫ ފަން ރަންއަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަގުބޫލު އެއް ހަރަކާތެވެ. މިދިޔަ އަހަރު ހުޅުމާލޭގައި ކުރިއަށް ގެންދިޔަ މަޖާ އެ ހަރަކާތްތަކުގައި 5،000 އަށްވުރެ ގިނަ މީހުން ބައިވެރިވި އެވެ.
އުރީދޫގެ އެސިސްޓެންޓް މެނޭޖާ، ޕަބްލިކް ރިލޭޝަންސް، މަރިޔަމް ޝިއުނާ ހަމީދު "އަދަދު" އަށް ވިދާޅުވީ ފަން ރަންގެ ލައިން އަޕް ހުކުރު ދުވަހު ހަވީރު 3:45 ގައި ހުޅުމާލެ ސެންޓްރަލް ޕާކުގައި ފަށާނެ ކަމަށެވެ.
"ވަރަށް ރަނގަޅު ތަރުހީބު ލިބުނު މިފަހަރުގެ ފަން ރަންއަށް ވެސް. 5،000 މީހުން ވަނީ ދުވުމުގައި ބައިވެރިވެފައި. 3:45 ގައި ލައިންއަޕް ފަށާނެ،" އޭނާ ވިދާޅުވި އެވެ.
ފަސް ކިލޯ މީޓަރު ހިމެނޭ އެ ދުވުމުގެ ކޮންމެ ކިލޯ މީޓަރެއް ނިންމާލުމަށްފަހު، މަޖާ ހަރަކާތްތައް ކުރިއަށް ގެންދާނެ އެވެ.
"ކޮންމެ ކިލޯ މީޓަރެއް ނިންމޭއިރު ވެސް އިންނާނެ ކޮންމެ ވެސް ކަހަލަ އެކްޓިވިޓީއެއް. އެއީ ކުލަ ޖެހުން ކަމަށްވިޔަސް، ފޯމް ކަމަށްވިޔަސް، އޮބްސްޓެކެލްސް ކަމަށް ވިޔަސް، އެކަހަލަ ގިނަ ކަންތައްތަކެއް އެކުލެވުގެންދާނެ ފަން ރަންގެ ތެރޭގައި،" ޝިއުނާ ވިދާޅުވި އެވެ.
ފަން ރަންގައި ހަ އަހަރުން މަތީގެ ގިނަ ބަޔަކު ބައިވެރިވިއިރު، އެ ދުވުމަކީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުންވެސް އެ ދުވުން ނިންމިދާނެއެވެ.
އުރީދޫ ފަން ރަންގެ އަމާޒަކީ، ދުޅަހެޔޮ ދިރިއުޅުމަކަށް، ދުވުމަކީ މަޖާ އަދި އުފާވެރިކަން ގެނުވަދޭނެ ހަރަކާތެއްކަން އަންގައިދިނުން ކަމަށް އުރީދޫއިން ބުންޏެވެ.
