މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެއިންޓަނަންސް ސެކްޝަނުގެ މުވައްޒަފުންނަށް އޮފް ދުވަސް ދިނުމުގެ އުސޫލަށް ގެނައި ބަދަލާ ގުޅިގެން ހިތްހަމަނުޖެހުން ފާޅުކޮށް ޕެޓިޝަނެއް ހެދި މައްސަލާގައި އެ ކުންފުނީގެ މުވައްޒަފަކު ވަޒީފާއިން ވަކިކޮށްފި އެވެ.
އެމްއޭސީއެލްގެ ވަޒީފާއިން ވަކިކުރީ އެ ކުންފުނީގެ ވެލްޑިން ވޯކްޝޮޕްގައި މަސައްކަތް ކުރަމުންދިޔަ ސީނިއާ ވޯކްސް ކޯޑިނޭޓަރު މުހައްމަދު ފިރާގު އެވެ. އޭނާ އަކީ އެ ޕެޓިޝަނުގައި އެންމެ ފުރަތަމަ ސޮއިކުރި މީހާ އެވެ.
މިކަމާ ގުޅިގެން "އަދަދު" ނޫހާ ވާހަކަ ދައްކަމުން ފިރާގު ބުނީ، ގިނަ އަހަރުތަކެއް ވަންދެން އެ ސެކްޝަނުގައި އޮތް އުސޫލު ބަދަލުކޮށް ހޮނިހިރު ދުވަހަކީ ވެސް މަސައްކަތު ދުވަހެއްގެ ގޮތުގައި ނިންމީ މިދިޔަ މަހު ކަމަށެވެ. އެކަމާ ގުޅިގެން ޑިޕާޓްމަންޓުތަކާއި ސެކްޝަންތަކުގެ އަދި ކުންފުނީގެ ވެރިންނަށް ވެސް ޝަކުވާ ހުށަހެޅި ކަމަށް އޭނާ ބުންޏެވެ.
އެގޮތުން، ކުންފުނީގެ ގްރީވެންސް ޑިޕާޓްމަންޓަށް ހުށަހަޅަން ތައްޔާރުކުރި ޕެޓިޝަނުގައި 200 އަށްވުރެ ގިނަ މުވައްޒަފުން ސޮއިކުރި ކަމަށްވެ އެވެ.
"ތަންކޮޅެއް ސީނިއާކޮށް ކޮންމެސް އެއްބަޔަކުތާ އުޅޭނީ މިކަމުގަ. ދެން އިސްކޮށް އުޅުނު މީހުންގެ ތެރޭގަ އަޅުގަނޑުވެސް އުޅުނިން،" ފިރާގު ބުންޏެވެ.
މި ޕެޓިޝަނުގެ އިތުރުން އެޗްއޯޑީގެ މައްސަލަތައް ބަޔާންކޮށް ލިޔުމެއް ވެސް ތައްޔާރުކުރި ކަމަށާއި އެ ލިޔުން ރައްޔިތުންގެ މަޖިލީހުގެ މެންބަރުންނާވެސް ހިއްސާކޮށްފައިވާނެ ކަމަށެވެ.
"އަޅުގަނޑު ކުއްލިއަކަށް އިއްޔެ 1:15 ގަ ގެންދަނީ އެޗްއާރު އަށް. ދެން ވަރަށް ގިނައިރު ބައިންދާފަ ގްރީވެސް ސެކްޝަނަށް ގެންދިޔައީ. ގެންގޮއްސަ ބުނީ މައްސަލައެއް ހުށަހަޅާފަ އޮތީމަ ސުވާލު ކޮށްލާށޭ ގެނައީ."
"ގެންގޮސްފަ ބުނީ ކުންފުނީގެ މަސައްކަތާ ގުޅިގެން ނިންމާ ގޮތްތަކާ މެދު ނުރުހުން ފާޅުކުރުމަކީ ފިޔަވަޅު އެޅޭނެ ކަަމެކޭ. އެ ވާހަކަ ދައްކާފަ ބުނީ ހޮނިހިރު ދުވަސް މަސައްކަތު ދުވަހަކަށް ހެދީމަ ކުންފުނީގެ ތެރޭ ނުރަނގަޅު މާހައުލެއް އުފައްދަނީއޭ، އަޅުގަނޑު ބުނިން އެފަދަ ކަމެއް ނުކުރަމޭ،" ފިރާގު ބުންޏެވެ.
އޭނާ ފާހަގަކުރި ގޮތުގައި އިއްޔެ އޭނާއާ ބައްދަލުކުރި ކުންފުނީގެ އޮފިޝަލުން ވަނީ ގްރީވެންސަށް ޝަކުވާ ހުށަހެޅުމުގެ ބަދަލުގައި ޕެޓިޝަނެއް ހަދާ، އެޗްއޯޑީގެ ވާހަކަ ކުންފުނިން ބޭރު ކުރީ ކީއްވެތޯ އަހާފަ އެވެ. އެކަން އެގޮތަށް ކުރީ ވަކިވަކި މުވައްޒަފުންގެ ވަޒީފާއަށް ކުރިމަތިވެދާނެ ބިރަކަށް ބަލާފައި ކަމަށް އޭނާ ބުނިކަންވެސް ފިރާގު ފާހަގަކުރި އެވެ.
އިއްޔެގެ ބައްދަލުވުމުގައި ސޮއިކުރަން ބަޔާނެއް ދިން ކަމަށާއި އޭގައި އޮތީ ހޮނިހިރުގެ މައްސަލާގައި ހެދި ޕެޓިޝަނަކީ އެޗްްއޯޑީ މަގާމުން ދުރުކުރަން ހެދި ޕެޓިޝަނެއްގެ ގޮތުގައި ކަމަށެވެ. އޭގައި އޭނާ ސޮއިކުރަން ދެކޮޅު ހެދުމުން އެޗްއާރު ޑިޕާޓްމަންޓުގެ އިސްވެރިޔަކު އައިސް އޭނާ ވަޒީފާއިން ވަކިކުރިކަން އެންގި ކަމަށް ފިރާގު ބުންޏެވެ.
މި މައްސަލާގައި މިހާތަނަށް އިތުރު މުވައްޒަފަކު ވަކިކުރި ކަމެއް ނޭނގެ އެވެ.
