ރޯމް، އިޓަލީ (ޑިސެމްބަރު 17) - އިޓާލިއަން ލީގުގައި ރޭ އިންޓަ މިލާނުން ލާޒިއޯ ދަނޑުގައި 6-0 އިން އެ ޓީމުގެ މައްޗަށް ކުރިހޯދައިފި އެވެ.
މިއީ، ލާޒިއޯ އިން ލީގު މެޗެއްގައި އަމިއްލަ ދަނޑުގައި ބަލިވި އެންމެ ތަފާތު ބޮޑު ނަތީޖާ އެވެ. ލާޒިއޯ އެންމެ ފަހުން އަމިއްލަ ދަނޑުގައި ލީގުގެ މެޗަކުން އެންމެ ތަފާތު ބޮޑު ނަތީޖާ އަކުން ބަލިވީ ފިއޮރެންޓީނާ އަތުން 5-0 އިން 1959 ވަނަ އަހަރު އެވެ.
ލާޒިއޯގެ ތާރީހުގައި ވެސް އެ ޓީމު އެންމެ ތަފާތު ބޮޑުކޮށް ލީގުގައި ބަލިވި ތިން މެޗަކީ ވެސް އިންޓަ އަތުންނެވެ. މި މެޗުގެ ކުރިން، ލާޒިއޯ ވަނީ 1931 ވަނަ އަހަރު 8-1 އިންނާއި 1961 ވަނަ އަހަރު 7-0 އިން ބަލިވެފަ އެވެ.
މިއީ، އިންޓަގެ ތާރީހުގައި ލީގުގައި ޖެހިޖެހިގެން ދެ މެޗުގައި މަދުވެގެން އެ ޓީމުން ފަސް ގޯލު ޖެހި ދެ ވަނަ ފަަހަރެެވެ.
ރޯމްގެ އޮލިމްޕިކް ސްޓޭޑިއަމްގައި ރޭ ކުޅުނު މެޗުގައި އިންޓަ އިން ލީޑުނެގީ 41 ވަަނަ މިނިޓްގައި ހަކަން ޗަނޮނޯލޫ ޖެހި ޕެނަލްޓީންނެވެ. އޭގެ ހަތަރު މިނިޓް ފަހުން، ފެޑެރީކޯ ޑި މާކޯ ވަނީ ގޯލެއް ޖަހައި، އިންޓަގެ ލީޑު ފުޅާކޮށްދީފަ އެވެ.
ދެ ވަނަ ހާފުގައި އިންޓަ އިން އިތުރު ހަތަރު ގޯލު ޖެހިއިރު، އެ ޓީމުގެ ލަނޑުތައް ޖެހީ، ނިކޯލޯ ބަރޭލާ، ޑެންޒެލް ޑަމްފްރީސް، ކާލޯ އަގުސްޓޯ އަދި މާކަސް ތުރާމް އެވެ.
މި ނަތީޖާއާ އެކު އިންޓަ އޮތީ ލީގުގެ ތިން ވަނައިގަ އެވެ. އެއީ، 15 މެޗުން 34 ޕޮއިންޓާ އެކު އެވެ. އެއް ވަނައިގައި އޮތް އެޓަލަންޓާ އަށް ވަނީ 16 މެޗުން 37 ޕޮއިންޓް ލިބިފަ އެވެ. އަދި ދެ ވަނައިގައި އޮތް ނަޕޯލީ އަށް 16 މެޗުން ލިބިފައިވަނީ 35 ޕޮއިންޓެވެ.
