އިސްތަންބޫލް، ތުރުކީ (ޑިސެމްބަރު 17) - މަނާބޭހުގެ މައްސަލައެއްގެ ސަބަބުން ސަސްޕެންޝަންގައި ހުރި ފްރާންސްގެ މިޑްފީލްޑަރު، ޕައުލް ޕޮގްބާ ކުޅުމަށް އެނބުރި އަންނަން ތައްޔާރުވަމުން އަންނައިރު، އޭނާއާ އެކު ތުރުކީގެ ގަދަބާރު، ގަލަތަސަރާއި އިން މަޝްވަރާތަކެއް ކުރިއަށްގެންގޮސްފި އެވެ.
މަނާބޭހަށް ޕޮޒިޓިވްވުމުގެ މައްސަލައެއްގައި ޕޮގްބާ، 31، އެންމެ ފުރަތަމަ، ހަތަރު އަހަރަށް ސަސްޕެންޑްކުރި އެވެ. އެހެން ނަމަވެސް ދާދި ފަހުން، އިންޓަނޭޝަނަލް ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އިން ވަނީ ޕޮގްބާގެ ސަސްޕެންޝަން 18 މަހަށް ކުޑަކޮށްފަ އެވެ.
އެހެންވެ، ޕޮގްބާ އަށް ޖެނުއަރީގައި، ޓީމު ޕްރެކްޓިސްތައް ރަސްމީކޮށް އެނބުރި ކުޅުމުގެ ތެރެއަށް އަންނަ އަހަރުގެ މާޗް މަހު އާދެވޭނެ އެވެ. ފުޓްބޯޅަ ކެރިއަރު ކުރިއަށްގެންދާނެ ގޮތާ ބެހޭގޮތުން، ޕޮގްބާ މީޑިއާތަކަށް ދިން އިންޓަވިއުއެއްގެ ތެރެއިން ވަނީ ޔުވެންޓަސްގައި މަޑުކުރަން ބޭނުންވާ ކަމަށް ވެސް ބުނެފަ އެވެ. އެހެން ނަމަވެސް، އެ ކްލަބާ އެކު މަޝްވަރާކޮށް މިހާރު ވަނީ އެއްބަސްވުން އުވާލައިފަ އެވެ.
އިނގިރޭސި މީޑިއާ އިން އަންނަނީ ޕޮގްބާ ދެން ފެންނާނީ އިނގިރޭސި ޕްރިމިއާ ލީގުގެ ކްލަބަކުން ކަމަށް ރިޕޯޓްކޮށްފަ އެވެ. އެ ގޮތުން، ހިލޭ ޓްރާންސްފާއެއްގައި މެންޗެސްޓާ ޔުނައިޓެޑް ނޫނީ މެންޗެސްޓާ ސިޓީ އަށް ޕޮގްބާ ދާން އުޅޭ ކަމުގެ ވާހަކަތައް ދެކެވުނު ނަމަވެސް ޕޮގްބާގެ އޭޖެންޓް ވަނީ އެއީ ހަގީގަތެއް ނެތް ރިޕޯޓްތަކެއް ކަމަށް ބުނެފަ އެވެ.
ގަލަތަސަރާއި އިން ޕޮގްބާގެ އޭޖެންޓާ އެކު ވާހަކަ ދައްކަމުން އަންނައިރު، އޭނާ ހޯދަން ފްރާންސްގެ މާސޭ އާއި ސައުދީ އަރަބިއްޔާގެ ޕްރޯ ލީގުގެ ކްލަބްތަކުން ވެސް ވަނީ އޮފާކޮށްފަ އެވެ.
