ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރިވެނިއު އޮތޯރިޓީ (މީރާ) ގެ ހިންގުން، 2028 ގެ ކުރިން އެ އޮތޯރިޓީގެ އަމިއްލަ އިމާރާތަކަށް ބަދަލު ކުރަން ކުރިއަށް އޮތް ހަތަރު އަހަރަށް އެކުލަވައިލި މީރާގެ ސްޓްރެޓެޖިކް ޕްލޭންގައި ހިމަނައިފި އެވެ.
މީރާއިން މިއަދު އާންމުކުރި ސްޓްރެޓެޖިކް ޕްލޭންގައި ހިމަނާފައި ވަނީ ކުރިއަށް އޮތް އަހަރުން ހާސިލު ކުރަން ބޭނުންވާ ލަނޑުދަނޑިތައް ވަނީ މައިގަނޑު ހަތަރު ދާއިރާއަކަށް ބަހާލާފަ އެވެ.
އެ ގޮތުން ދެމެހެއްޓެނިވި މާލީ އޮނިގަނޑެއްގެ ތެރެއަށް މީރާ ފެއްތުމަށް އެ ޕްލޭންގައި ކަނޑައަޅާފައިވާ ލަނޑުދަނޑިއަށް ވާސިލުވުމަށް ހިމަނާފައި ވަނީ ދެ ކަމެކެވެ. އެއީ ރިސްކަށް ބެލުމަށްފަހު އިސްކަންދޭ ތަރުތީބަކުން، ވަކި އުސޫލެއްގެ ދަށުން މީރާގެ ބަޖެޓު ބޭނުން ކުރަން ފެށުމާއި 2028 ގެ ކުރިން އަމިއްލަ އިމާރާތެއްގައި މީރާ ހިންގުމެވެ.
ޓެކްސްގެ ގާނޫނު ފާސްކޮށް އެ ނިޒާމު ވުޖޫދުކުރީއްސުރެ ވެސް މީރާގެ އިމާރާތް ހިންގަމުން ދަނީ އަމީނީމަގުގައި ހުންނަ ފިނޭންސް މިނިސްޓްރީގެ އިމާރާތުގަ އެވެ. ނަމަވެސް އެ އޮތޯރިޓީގެ ސްޓްރެޓެޖިކް ޕްލޭންގައިވާގޮތަށް 2028 ގެ ނިޔަލަށް އަމިއްލަ އިމާރާތަކަށް ބަދަލުކޮށްފި ނަމަ ވާނެ ކަމަށް ލަފާކުރާ ފައިދާތަކެއް ވެސް އެ ޕްލޭންގައި ހިމަނާފައިވެ އެވެ.
މީރާއިން ބުނި ގޮތުގައި އަމިއްލަ އިމާރާތަކަށް މީރާ ހިންގުން ބަދަލު ކުރުމުން އެ އޮތޯރިޓީގެ ސެކިއުރިޓީ މިހާރަށްވުރެ ވަރުގަދަވެ އެ އޮތޯރިޓީން ދެމުންދާ ހިދުމަތްތައް އިތުރަށް ފުޅާވެ ޓެކްސްގެ ނިޒާމު ހަރުދަނާ ކުރުމަށް ކުރަމުންދާ މަސައްކަތް އިތުރަށް ހަލުވި ވާނެ އެވެ.
މުޅި ސްޓްރެޓެޖިކް ޕްލޭނުން ހާސިލު ކުރަން ބޭނުންވާ ކަމެއްގެ ގޮތުގައި އޮތީ 2028 ގެ ނިޔަލަށް އެއްވެސް ދައްޗެއް ނެތި ފަސޭހަކަމާއެކު ޓެކްސްގެ ނިޒާމު ހިންގޭނެ ގޮތެއް މަގުފަހި ކުރުމެވެ.
