ލަންޑަން (ޑިސެމްބަރު 16) - އިނގިރޭސި ޒުވާން ޓެނިސް ތަރި، އެމާ ރަޑުކާނޫ އަށް ދިމާވަމުން އަންނަ އަނިޔާގެ މައްސަލަތަކުން އަރައިގަނެ، އަވަހަށް ޕީކަށް ގެންގޮސް ކާމިޔާބު ހޯދަން އެހީތެރިވުމަށް ޖަޕާނުގެ ފިޓްނަސް ކޯޗު، ޔުޓާކާ ނަކަމޫރާއާ އެކު މަސައްކަތް ފަށައިފި އެވެ.
ގިނަ ބަޔެއްގެ ލޮލުގައި އެމާ، 20، އަޅައިގަތީ 2021 ވަނަ އަހަރުގެ ޔޫއެސް އޯޕަންގެ އަންހެން ސިންގަލްސް ޗެމްޕިއަންކަން ސެޓެއް ވެސް ނުގެއްލި ހޯދުމާ ގުޅިގެންނެވެ. އެ މުބާރާތުގެ ކޮލިފައިން ބުރުން ހޮވިގެން ގޮސް ޗެމްޕިއަންކަން ހޯދުމާ އެކު އެ ކާމިޔާބީ އިތުރަށް ހާއްސަވީ ރެކޯޑަކާ އެކު އެވެ.
އޭގެ އެއް އަހަރު ފަހުން، ސިންސިނާޓީ މާސްޓާސްގައި އެމާ ވަނީ 24 ގަޑިއިރު ތެރޭ ދުނިޔޭގެ ދެ ޗެމްޕިއަނުން ކަމަށްވާ ސެރީނާ ވިލިއަމްސް އާއި ވިކްޓޯރިއާ އަޒަރެންކާ ބަލިކޮށްފަ އެެވެ.
އެހެން ނަމަވެސް އޭގެ ފަހުން، އެމާ އަށް އެކަށީގެންވާ ކާމިޔާބީތަކެއް ނުހޯދި ގިނަ ފަހަރުތަކެއްގެ މަތިން ކޯޗުން ވެސް ބަދަލުކުރި އެވެ. އެކަމަކު އަސްލު ލެވަލްގައި ކުޅެވޭގޮތެއްނުވި އެވެ.
އެއާ އެކު، އެމާ ވަނީ މި މަހުގެ ފުރަތަމަ ހަފްތާ އިން ފެށިގެން ތަޖުރިބާކާރު ފިޓްނަސް ކޯޗު ނަކަމޫރާއާ އެކު މަަސައްކަތް ފަށައިފަ އެވެ. ނަކަމޫރާ ވަނީ މީގެ ކުރިން، މަޝްހޫރު ދެ ޓެނިސް ކުޅުންތެރިޔާ، ކުރީގެ ތަރި، ރަޝިއާގެ މާރިއާ ޝަރަޕޯވާ އާއި ޖަޕާނުގެ ނައޯމީ އޮސާކާއާ އެކު މަަސައްކަތްކޮށްފަ އެވެ.
އެމާ، 24، ބުނީ، ނަކަމޫރާއާ އެކު މަސައްކަތްކޮށް، 2025 ވަނަ އަހަރުގެ ޓެނިސް ސީޒަނަށް ކަނޑައަޅާ ޓާގެޓަށް ވާސިލްވެވޭނެ ކަމުގެ އުންމީދު ބޮޑު ކަމަށެވެ.
ނަކަމޫރާއާ އެކު، އެމާ އާއި އޭނާގެ ކޯޗު، ނިކް ކަވާޑޭ ޓްރެއިނިންތައް ކުރިއަށްގެންދަމުން އަންނައިރު، ޑިސެމްބަރު މަހުގެ ފަހު ހަފްތާގައި ޓްރެެއިނިން އޮތީ، ނިއު ޒީލެންޑްގަ އެެވެ. އެއީ، ޖެނުއަރީ މަހު 12 ވަނަ ދުވަހު ފަށާ އޮސްޓްރޭލިއަން އޯޕަން އަށް ތައްޔާރުވުމުގެ ގޮތުން، އެޑަލެއިޑްގައި އޮތް މުބާރާތެއްގައި ކުޅުމުގެ ގޮތުންނެވެ.
