ލަންޑަން (ޑިސެމްބަރު 16) - އިނގިރޭސި ޕްރިމިއާ ލީގުގައި މިރޭ މެންޗެސްޓާ ޔުނައިޓެޑުން ފަހު ވަގުތު ފަހަތުން އަރައި 2-1 އިން މެންޗެސްޓާ ސިޓީ ބަލިކޮށް އެ ޓީމު ހާސްކޮށްލިއިރު، ޗެލްސީން 2-1 އިން ބްރެންޓްފޯޑްގެ މައްޗަށް ކުރިހޯދައި ލީގުގެ އެއް ވަނައިގައި އޮތް ލިވަޕޫލާ ދެމެދު ފަރަގުކުޑަކޮށްފި އެވެ.
ސިޓީ މި ވަނީ އެންމެ ފަހުން ކުޅުނު 11 މެޗުގެ ތެރެއިން އަށް ވަނަ މެޗުން ބަލިވެފަ އެވެ. ލީގުގައި އެންމެ ފަހުން އެ ޓީމު ކުޅުނު ހަތް މެޗުގެ ތެރެއިން މޮޅުވީ އެންމެ މެޗަކުންނެވެ. އެންމެ ފަހުގެ ޗެމްޕިއަން، ސިޓީ މި ވަގުތު ފަސް ވަނައިގައި އޮތީ 16 މެޗުން 27 ޕޮއިންޓާ އެކު އެވެ.
ލީގުގެ އެއް ވަނައިގައި އޮތް ލިވަޕޫލަށް 15 މެޗުން 36 ޕޮއިންޓް ލިބިފައިވާއިރު، ލީގުގައި ޖެހިޖެހިގެން ފަސް ވަނަ މެޗުން މޮޅުވި، ޗެލްސީން ވަނީ 16 މެޗުން 34 ޕޮއިންޓް ހޯދައިފަ އެވެ. ތިން ވަނައިގައި އޮތް އާސެނަލަށް 16 މެޗުން 30 ޕޮއިންޓް ލިބިފައިވާއިރު، ހަތަރެއްގައި އޮތް ނޮޓިންހަމް ފޮރެސްޓަށް ވަނީ 16 މެޗުން 28 ޕޮއިންޓް ލިބިފަ އެވެ.
އަމިއްލަ ދަނޑުގައި ކުޅުނު ސިޓީން ފުރަތަމަ ހާފުގައި ޖޮސްކޯ ގްވާޑިއޯލް ބޮލުން ޖެހި ގޯލުން ލީޑުނެގިއިރު، މެޗުގެ ބޮޑުބައި އެ ޓީމު އޮތީ ކުރީގަ އެވެ. އެކަމަކު، ހުރިހާ ކަމެއް ބަދަލުވެގެންދިޔައީ، މެޗުގެ ފުރިހަމަ ވަގުތުގެ ފަހު ދެ މިނިޓް ތެރޭގަ އެވެ. އެ ގޮތުން، މެޗުގެ 88 ވަނަ މިނިޓްގައި ބްރޫނޯ ފެނާންޑޭސް ވަނީ ޕެނަލްޓީ އަކުން އެއްވަރުކޮށްފަ އެވެ. އޭގެ އިރުކޮޅެއް ކުރިން ފެނާންޑޭސަށް ލިބުނު ފުރުސަތެއް ވަނީ ނަގާލައިފަ އެވެ. ޔުނައިޓެޑަށް ޕެނަލްޓީ ހޯދައިިދިން އަމަދު ޑިއާލޯ ވަނީ މެޗުގެ 90 ވަނަ މިނިޓްގައި ގޯލު ޖަހައި، އެ ޓީމު މޮޅުކޮށްދީފަ އެވެ.
ޔުނައިޓެޑުން އަލެހަންދްރޯ ގާނާޗޯ އާއި މާކަސް ރެޝްފޯޑް ސްކޮޑަށް ވެސް ނުނަގައި ކުޅުނު މި މެޗުގައި އެ ޓީމުގެ ކޯޗު ރުބެން އަމޮރިމް މި ވަނީ ވާދަވެރި ސިޓީ ބަލިކޮށްފަ އެވެ. އަމޮރިމް އަކީ އެއް ސީޒަނެއްގައި ތަފާތު ދެ ޓީމެއްގައި ހުރެ ސިޓީގެ ކޯޗު ޕެޕް ގާޑިއޯލާ ބަލިކުރި ފުރަތަމަ ކޯޗެވެ. ޔުނައިޓެޑާ ހަވާލުވުމުގެ ކުރިން ސްޕޯޓިން ލިޒްބަންގައި ހުރެ ވެސް އަމޮރިމް ވަނީ ސިޓީ ބަލިކޮށްފަ އެވެ.
މި މޮޅާ އެކު، ޔުނައިޓެޑް އޮތީ، 16 މެޗުން 22 ޕޮއިންޓާ އެކު، 13 ވަނައިގަ އެވެ.
ބްރެންޓްފޯޑް ކޮޅަށް ފުރަތަމަ ހާފުގައި ޗެލްސީން ލީޑުނެގީ މާކް ކުކުރޭލާ ޖެހި ގޯލުންނެވެ. ޗެލްސީގެ ކޯޗު ރޮބާޓް ސަންޗޭޒް އެ ޓީމު ލީޑުގައި ބާއްވަން ރަނގަޅު ހަމަލާތަކެއް ހުއްޓުވިއިރު، ޗެލްސީން ވަނީ ނިކޮލަސް ޖެކްސަން ޖެހި ގޯލުން ލީޑުފުޅާކޮށްފަ އެވެ. ބްރެންޓްފޯޑްގެ ހަމައެކަނި ލަނޑު ޖެހީ ބްރަޔާން އެމްބުއޭމޯ އެވެ.
މި މެޗު ނިމުނު ފަހުން ހިނގައިދިޔަ ކަމެއްގެ ސަބަބުން ޗެލްސީގެ ކުކުރޭލާ އަށް ވަނީ ރަތް ކާޑެއް ދައްކައިފަ އެވެ.
ޓޮޓެންހަމް އިން ވަނީ ސައުތެމްޓަން ދަނޑުގައި، ފުރަތަމަ ހާފުގައި ޖެހި ފަސް ގޯލާ އެކު، 5-0 އިން މޮޅުވެފަ އެވެ. އެ ޓީމުގެ ލަނޑުތައް ޖެހީ، ޖޭމްސް މެޑިސަން ދެ ގޯލާއި ސޮން ހެއުން މިން، ޕަޕޭ ސާ އަދި ޑޭޖާން ކުލުސެވްސްކީ އެވެ.
މި މޮޅާ އެކު، ޓޮޓެންހަމް އޮތީ 16 މެޗުން 23 ޕޮއިންޓާ އެކު، 10 ވަނައިގަ އެވެ.
