ހައުސިން މިނިސްޓްރީގެ މުވައްޒަފުންގެ މައުލޫމާތާއި އެ މިނިސްޓްރީން ހިންގަމުންދިޔަ ހުރިހާ މަޝްރޫއުތަކެއްގެ މައުލޫމާތު ހުރި ސާވާއަށް އިއްޔެގެ އަލިފާނުގައި ލިބުނު ގެެއްލުމުގެ ސަބަބުން އެކްސެސް ނުވެވިއްޖެ ނަމަ އެ މައުލޫމާތު އަލުން ހޯދޭނެ ގޮތެއް ނޯންނާނެ ކަމަށް ހައުސިން މިނިސްޓަރު، ޑރ. އަލީ ހައިދަރު ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްއަށް ހައިދަރު މިރޭ ދެއްވި އިންޓަވިއުއެއްގައި ވިދާޅުވީ އިއްޔެގެ އަލިފާނުގައި އެ މިނިސްޓްރީގައި ހުރި ހުރިހާ ލިޔެކިޔުމަކާއި ޑޭޓާއެއް އަނދައިގެން ގޮސްފައިވާ ކަމަށެވެ. އަދި އަނދައިގެންދިޔަ ސާވާގައި ހުރި މައުލޫމާތު ސަލާމަތް ކުރެވޭނެ ކަމަށް އަންދާޒާ ނުކުރެވޭ ކަމަށް ވެސް އޭނާ ވިދާޅުވި އެވެ.
"ހަމަ ގާތްގަނޑަކަށް ވުޒާރާގައި ހުރި ހުރިހާ ލިޔެކިޔުމަކާއި ޑޭޓާއަކާ އެއްކޮށް އެ ދިޔައީ، ހާއްސަކޮށް އަޅުގަނޑުމެންގެ ސާވާ، ސަލާމަތް ނުކުރެވޭނެ ކަމަށް މިހާރު އަންދާޒާ ކުރެވެނީ، އެހެންވެއްޖެ ކަމަށް ވެއްޖެއްޔާ އެއީ ވަރަށް ބޮޑު ގެއްލުމެއް، އެއީ އަޅުގަނޑުމެންގެ އަތުގައި ހުރި ހުރިހާ މައުލޫމާތެއް ގެއްލިގެން އެދިޔައީ،" ހައިދަރު ވިދާޅުވި އެވެ.
އޭނާ ވިދާޅުވީ ހައުސިން މިނިސްޓްްރީގެ ހުރިހާ މުވައްޒަފުންގެ މައުލޫމާތާއި އެ މިނިސްޓްރީން ހިންގަމުންދިޔަ ހުރިހާ މަޝްރޫއުތަކެއް މައުލޫމާތު ވެސް ހުންނާނީ އެ ސާވާގައި ކަމަށެވެ. އެ ސާވާއަށް އެކްސެސް ނުލިބިއްޖެ ނަމަ ދެން އެ މައުލޫމާތުތައް ލިބޭނެ ގޮތެއް ނޯންނާނެ ކަމަށް ހައިދަރު ވިދާޅުވި އެވެ.
"ހުރިހާ މުވައްޒަފުންގެ މައުލޫމާތާއި އަދި އަޅުގަނޑުމެން ކުރަމުން ގެންދިޔަ ހުރިހާ މަޝްރޫއުތަކެއްގެ މައުލޫމާތު ވެސް ހަމަ ރައްކާ ކުރެވިފައި ހުންނާނީ ސާވާގައި، އެ ސާވާއަށް އެކްސެސް ނުލިބޭ ކަމަށްވަންޏާ އަޅުގަނޑުމެންނަކަށް އެ މައުލޫމާތެއް އަލުން ހޯދޭނެ ގޮތެއް ނޯންނާނެ، ދެން ހުރިހާ ލިޔެކިޔުމެއް ވެސް އަނދައި ދިޔައީ،" ހައިދަރު ވިދާޅުވި އެވެ.
އެކަމާ ގުޅޭގޮތުން އިތުރު މައުލޫމާތު ހޯދަން މިނިސްޓަރު ހައިދަރުއަށް ގުޅުމުން ފޯނަށް ޖަވާބު ނުދެއްވާތީ ލިބޭގޮތް ވަނީ ނުވެފަ އެވެ.
ހައުސިން، އިންފްރާސްޓްރަކްޗާ އަދި އެންވަރަމެންޓް މިނިސްޓްރީ ހިންގަމުންދިޔަ އިމާރާތްތައް އިއްޔެ ހިނގި އަލިފާނުގެ ހާދިސާގައި ވަނީ އަނދާ ހުލިވެފަ އެވެ. އެއާއެކު އެ ތިން މިނިސްޓްރީގެ މަސައްކަތް ވަގުތީ ގޮތުން ދަރުބާރުގެއަށް ބަދަލު ކުރުމުގެ މަސައްކަތް މިހާރު ދަނީ ކުރަމުންނެވެ.
ސަރުކާރުން މަސައްކަތް ކުރަމުންދަނީ އެ ތިން މިނިސްޓްރީގެ މަސައްކަތް ވެސް ވަގުތީގޮތުން އަންނަ އާދީއްތަ ދުވަހު ފެށޭގޮތަށް އިންތިޒާމުތައް ހަމަޖެއްސުމަށެވެ.
