މި ސަރުކާރުން ބަދަލުގެ ގޮތުގައި މެލޭޝިއާގެ ކުންފުންޏަކަށް ދޭން ނިންމާފައިވާ 6.9 ބިލިއަން ރުފިޔާގެ ކޮންޓްރެކްޓަކީ ކުރީގެ ހުރިހާ ސަރުކާރުތަކަށް ވުރެ ބަދަލުގެ ގޮތުގައި އިތުރަށް ފައިސާ ހޭދަކުރަން ޖެހޭ ކަމެއް ކަމަށް އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕީޖީ ލީޑަރު އިބްރާހިމް ނާޒިލް މިރޭ ވިދާޅުވެއްޖެ އެވެ.
އެމްޑީޕީން ބޭއްވި ހަރުގެ ޖަލްސާގައި ހިތަދޫ ދެކުނު ދާއިރާގެ މެންބަރު ނާޒިލް ވިދާޅުވީ މި ސަރުކާރުން ބަދަލުގެ ގޮތުގައި މެލޭޝިއާގެ ކުންފުންޏަކަށް 6.9 ބިލިއަން ރުފިޔާ ދޭން ނިންމައި، އެ ކުންފުންޏާ އެކު އެއްބަސްވުން ހަދައިގެން އެ މަސައްކަތް ކުރަމުންދާ ކަމަށެވެ.
"ކުރީގައި ދީފައި ހުރި ހުރިހާ ބަދަލެއް އެއްކޮށްލީމަ، އެކި ދުވަސްވަރުގައި 10 އަހަރު ވަންދެން ދީފައި ހުރި ބަދަލުތަކެއް ވިޔަސް، އެ ހުރިހާ އެއްޗެއް އެއްކޮށްލީމަ ވެސް މި ބުނާ 6.9 ބިލިއަން ރުފިޔާއާ ހިސާބަށް މިވީތަނަށް ނެތް ބަދަލު ދެވިފަކާއެއް،" އޭނާ ވިދާޅުވި އެވެ.
ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި މެލޭޝިއާގެ ކުންފުންޏާ އެކު ހަދާފައިވާ އެއްބަސްވުމާ ގުޅިގެން ދެ ލައްކަ ޑޮލަރުގެ ބަދަލެއް ދޭން ޖެހިދާނެ ކަމަށް ބުނެ އެ ކުންފުނިން ރައީސް އިބްރާހިމް މުހައްމަދު ސޯލިހުގެ ވެރިކަމުގައި ސިޓީއެއް ފޮނުވާފައިވާކަން ނާޒިލް ފާހަގަ ކުރެއްވި އެވެ.
"ސިޓީއެއް ފޮނުވާފައި އޮތީ. އެ ސިޓީ ފޮނުވައިގެން، އެ ސިޓީއާ އެކީގައި 6.9 ބިލިއަން ރުފިޔާގެ އެއްބަސްވުމެއްގައި އެ ސޮއިކުރީ. ތިން ލައްކަ ޑޮލަރު ދޭން ޖެހިދާނެއޭ. އަދި ބަލާލީމަ ދޭން ޖެހެނީ ކޯއްޗެއް ކަމެއް ވެސް ނޭގޭ. ފަނަރަވަރަކަށް ހާސް ރުފިޔާއިން ވެސް ނިންމާލެވިދާނެ،" ނާޒިލް ވިދާޅުވި އެވެ.
އެ އެއްބަސްވުން ސަރުކާރުން ހެދީ އެއްވެސް ޝަރުއީ މަރުހަލާއެއް ކަޑައްތު ކުރުމެއް ނެތިކަން ފާހަގަކުރައްވާ އެމްޑީޕީގެ ޕީޖީ ލީޑަރު ނާޒިލް ވިދާޅުވީ އެމްޑީޕީން އެ ކަން ބަލައި މަންފާވި މީހުންނާއި ކުށްވެރިވާ މީހުން ހޯދާނެ ކަމަށެވެ.
"މިހާ ބޮޑު އަދަދެއް، ރައްޔިތުންގެ ފައިސާ އެނގޭތޯ. ޓެކްސް ފައިސާ، ތިބޭފުޅުންގެ ފައިސާ. މި ފައިސާ ނަހަމަ ގޮތުގައި އެކި ފަރާތްތަކަށް ދެވިގެންދާއިރު އަޅުގަނޑުމެންނަށް އެނގެން އެބަޖެހޭ. ވަރަށް ސާފުކޮށް އެނގެން އެބަޖެހޭ. 6.9 ބިލިއަން ރުފިޔާގެ އެއްބަސްވުމުގައި ސޮއިކުރަން ޖެހެނީ ކީއްވެ ކަމެއް، ހިނގަ ހިނގާ އޮތް ބަރާބަރު ސިސްޓަމެއް ބާތިލު ކޮށްފައި އަނެއްކާ އެހެން ބަޔަކަށް ދޭން ޖެހެނީ ކީއްވެގެން ކަމެއް އަޅުގަނޑުމެންނަށް އެހާ ސާފެއް ނޫން،" އޭނާ ވިދާޅުވި އެވެ.
ރާއްޖޭގައި ވަޒީފާ އަދާކުރާ ބިދޭސީންގެ ކަންކަން ބެލެހެއްޓުމަށް މިހާރު ބޭނުންކުރާ އޮންލައިން ޕްލެޓްފޯމް ދޫކޮށްލައި، އާ އެކްސްޕެޓު ސިސްޓެމްއެއް ހެދައި އެ ސިސްޓެމް ބެލެހެއްޓުން މަލޭޝިއާގެ ބެސްޓިނެޓު ކުންފުންޏާ އެވެ.
އެންމެ ފަހުގެ ބޯހިމެނުން ދައްކާ ގޮތުން ރާއްޖޭގައި 132،000 އަށް ވުރެ ގިނަ ބިދޭސީން އުޅެ އެވެ. ގަވާއިދާ ހިލާފަށް ދިރިއުޅޭ މީހުންނާއެކު އެ އަދަދު ދެ ލައްކައަށްވުރެ މަތިވާނެ ކަމަށް އިންޓަނޭޝަނަލް ލޭބާ އޯގަނައިޒޭޝަން (އައިއެލްއޯ) އިން ލަފާކުރެ އެވެ.
ބެސްޓިނެޓާއެކު ސޮއިކުރި އެއްބަސްވުމުގައިވާ ގޮތުން ބިދޭސީއެއްގެ ބޮލަކަށް އަހަރަކު 100 ޑޮލަރު ނުވަތަ 1,542ރ. ސަރުކާރުން އެ ކުންފުންޏަށް ދައްކަން ޖެހޭނެ އެވެ.
