ކޮވިޑް-19 ބަލިމަޑިކަމުގެ ދުވަސްވަރު ސަރުކާރުގެ އައިޖީއެމްއެޗުގެ ލެބޯޓަރީގައި ބޭނުންކުރި "ރީއެޖެންޓްސް" އަމިއްލަ މަސްލަހަތު ހިމެނޭ ކުންފުންޏަކަށް ދިން މައްސަލައިގައި އެ ހޮސްޕިޓަލުގެ ކުރީގެ ތިން ވެރިޔެއްގެ މައްޗަށް ދައުވާ ކުރަން ފޮނުވި މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް އަނބުރާ ފޮނުވާލިތާ ދެ މަހަށް ވުރެ ގިނަ ދުވަސް ވެއްޖެ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފި އެވެ.
އޭސީސީން މި މައްސަލައިގައި ދައުވާ ކޮށްދޭން އެދުނީ އައިޖީއެމްއެޗުގެ ކުރީގެ ސީއީއޯ އިބްރާހިމް ސަލީމް (ބަންދު ސަލީމް) އާއި އައިޖީއެމްއެޗުގެ ލެބޯޓަރީގެ ކުރީގެ ހެޑް ޑރ. މިލްޒާ އަބްދުލްމުހުސިން އަދި އެ ހޮސްޕިޓަލުގެ ޕްރޮކިއުމަންޓް ކޮމިޓީގެ ޗެއާމަނަކަށް އޭރު ހުންނެވި ޑރ. އަލީ އަބްދުﷲ ލަތީފަށެވެ. އޭސީސީން އެދުނީ މި ތިން މީހުންގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށުގެ ދައުވާކޮށް ދިނުމަށެވެ.
އޭސީސީން ތުހުމަތުކުރަނީ މި މައްސަލައިގައި ނާޖާއިޒު މަންފާ ހޯދައިދިނީ އާރުއެމްއެލްއެސް ލެބޯޓަރީ ސާވިސަސްއަށެވެ. މި ކުންފުނި މެދުވެރިކޮށް އަލީ ލަތީފު މަނީ ލޯންޑާ ކުރިކަމަށް ތުހުމަތުކުރެވޭތީ އޭނާގެ މައްސަލަ ތަހުގީގުކޮށްދިނުމަށް އެދި ފުލުހަށް ހުށަހަޅާފައިވާ ކަމަށް ވެސް މި މައްސަލައިގެ ތަފުސީލުތައް ހާމަކުރަން މިދިޔަ އޮގަސްޓު 20، ގައި ބޭއްވި ނޫސްވެރިންގެ ބައްދަލުވުމެއްގައި އޭސީސީން ބުނެފައިވެ އެވެ.
މި މައްސަލައިގެ ދައުވާކުރަން ފޮނުވިތޯ ސާފުކުރަން "އަދަދު" އިން ޕްރޮސެކިޔުޓާ ޖެނެރަލް (ޕީޖީ) އޮފީހުގެ ތަރުޖަމާނު އަހުމަދު ޝަފީއުއާ ސުވާލުކުރުމުން އޭނާ ވިދާޅުވީ މި މައްސަލަ އޭސީސީން ޕީޖީ އޮފީހަށް ހުށަހެޅީ އޮގަސްޓު މަހުގެ ތެރޭގައި ކަމަށެވެ. ނަމަވެސް އިތުރު ކަންތައްތަކެއް ސާފުކުރަން ހުރުމުން ސެޕްޓެމްބަރު 2، ގައި މައްސަލަ އަލުން އޭސީސީއަށް ފޮނުވާލާފައިވާ ކަަމަށް އޭނާ ވިދާޅުވި އެވެ.
އޭސީސީއަށް މައްސަލަ އަނބުރާ ފޮނުވާލި ފަހުން އެ ކޮމިޝަނުން އެ މައްސަލައިގެ އަދާހަމައެއް ހޯދަން ނިމުނު ހަފުތާގެ ތެރޭގައި ތަކުރާރުކޮށް ގުޅީމެވެ. ނަމަވެސް އެ ހަފުތާ ނިމިގެން ދިޔައިރު ވެސް އެ މައްސަލަ އަނބުރާ ޕީޖީއަށް ފޮނުވާލުމުގެ ކަންކަން ގޮސްފައިވާ ހިސާބެއް ސާފެއް ނުވި އެވެ. އެ ތަނުގެ މީޑިއާ އޮފިޝަލަކު ބުނީ "އަޕްޑޭޓެއް" ހޯދުމަށް ފަހު ގުޅާނެ ކަމަށެވެ.
ކޮވިޑު ކޮރަޕްޝަން މައްސަލައިގައި އެންމެ ގިނަ ތުހުމަތުކުރެވޭ އަލީ ލަތީފަކީ އައިޖީއެމްއެޗުގެ މެޑިކަލް އެގްޒެކެޓިވް ކޮމިޓީގެ މެންބަރުކަމާއި، ޓެކްނިކަލް އެޑްވައިޒަރީ ކޮމިޓީގެ މެންބަރު އަދި ކޮވިޑާއި ގުޅިގެން އެކުލަވާލި ޓެކްނިކަލް އެޑްވައިޒަރީ ގްރޫޕްގެ މެންބަރުކަށް ވެސް ހުންނެވި މީހެކެވެ. މި ޓެކްނިކަލް އެޑްވައިޒަރީ ގްރޫޕަކީ ކޮވިޑު ޕީސީއާރު ޓެސްޓުތައް ކުރަން މަޖުބޫކުރުމުގެ ނިންމުންތައް ނިންމި ކޮމިޓީ އެވެ.
މި މައްސަލައިގައި ހިމެނޭ ކުންފުންޏަކީ އޭނާގެ މަސްލަހަތު އޮތް ކުންފުންޏެއް ކަމަށް އޭރު ވެސް ވާހަކަތައް ދެކެވުނެވެ. ނަމަވެސް އޭރު އޭނާ އާއި އައިޖީއެމްއެޗުން ވެސް އެ ވާހަކަތައް ދޮގުކުރި އެވެ. އިކޮނޮމިކް މިނިސްޓްރީގެ ބިޒްނަސް ޕޯޓަލްއިން އެނގޭ ގޮތުގައި އެ ލެބޯޓަރީ ހިންގަނީ ޕަޔޮނިއާ މޯލްޑިވްސް ނަމަކަށް ކިޔާ ކުންފުންޏެއްގެ ދަށުންނެވެ. އެ ކުންފުނީގެ ހިއްސާދާރުންނަށް ތިބީ އިކުލީލް ޝަރީފް އަދި އިބްރާހިމް ސައީދު މުހައްމަދު އެވެ.
ޕަޔޮނިޔާ މޯލްޑިވްސްއަކީ ކޮވިޑު ބަލިމަޑުކަމުގެ ދުވަސްވަރު އޮކްޓޫބަރު، 2020 ގައި އުފެއްދި ކުންފުންޏެކެވެ. އެ ކުންފުނިން ކުރާ ހަމައެކަނި ވިޔަފާރިއަކީ ވެސް އާރުއެމްއެލްއެސް ހިންގުމެވެ. ނަމަވެސް އެ ކުންފުނިން ވަނީ، ކުންފުނި އުފެއްދިތާ އަހަރު ދުވަސް ނުވަނީސް އޭޕްރިލް، 2021 ގައި، ރިސޯޓެއް ތަރައްގީކުރަން ގދ. ކަނޑަހަލަގަލާ ކުއްޔަށް ނަގާފަ އެވެ.
ކަނޑަހަލަގަލާގެ ލީސް އެކުއިޒިޝަން ކޮސްޓުގެ ގޮތުގައި 2،800،000.00 ޑޮލަރު އަދި ޓޫރިޒަމް ޓްރެއިނިން ފަންޑަށް 150،000.00 ޑޮލަރު ޕަޔޮނިޔާ މޯލްޑިވްސްއިން ދިން ކަމަށް ޓޫރިޒަމް މިނިސްޓްރީގެ މައުލޫމާތުތަކުން ދައްކަ އެވެ. ރިސޯޓު ކުއްޔަށް ނެގިތާ ތިން އަހަރަށް ވުރެ ގިނަ ދުވަސް ފާއިތުވީއިރު، އަދި އެ ތަނުގައި ރިސޯޓެއް ތަރައްގީކުރަން ކުރި މަސައްކަތެއް ސެޓެލައިޓް ފޮޓޯތަކުން ނުދައްކަ އެވެ.
