ސަރުކާރުން ބޭނުންވަނީ ރާއްޖޭގައި އަނެއްކާ ވެސް ހުދުމުހުތާރު ވެރިކަމެއް ރާއްޖޭގައި ގާއިމް ކުރަން ކަމަށާއި އެކަމާ ދެކޮޅަށް ހުރިހާ ރައްޔިތުން ނުކުންނަންޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
އެމްޑީޕީން ބާއްވާ "ގާނޫނުއަސާސީގެ ދިފާއުގައި ރައްޔިތުން" ޖަލްސާގައި ވާހަކަ ދައްކަވަމުން ސޯލިހު ވިދާޅުވީ ހުރިހާ ހައްގުތަކެއް ނިގުޅައިގަނެ، ރައްޔިތުންގެ ބާރުވެރިކަން ސަރުކާރުގެ އަތްދަށަށް ގެންނަން މަސައްކަތް ފަށާފައިވާ ކަމަށެވެ. ރައީސް ޑރ. މުހައްމަދު މުއިއްޒު ބޭނުންވެވަޑައިގަންނަވަނީ ހުދުމުހުތާރު ވެރިކަމެއް ގާއިމް ކުރަން ކަމަށް ސޯލިހު ވިދާޅުވި އެވެ.
"މި ސަރުކާރަށް މިހާރު އެއް އަހަރުވެއްޖެ. އަޅުގަނޑުމެން އެއިރު ވެސް ބުނަމުން ދިޔައީމު، އަޅުގަނޑުމެން އެއް އަހަރު ވަންދެން މަޑުކުރާނަމޭ. ވަގުތު ދޭނަމޭ،" ސޯލިހު ވިދާޅުވި އެވެ. "މި ސަރުކާރުގެ އަމާޒަކީ ހުދުމުހުތާރު ވެރިކަމެއް އަނެއްކާ ވެސް މި ރާއްޖޭގައި ގާއިމް ކުރުން."
ސޯލިހު ވިދާޅުވީ ތަބަކަކަށް ލާފައި އެއްވެސް މީހަކު ހައްގުތަކެއް ނުދޭނެ ކަމަށާއި ޖެހޭނީ ހައްގުތައް ހޯދަން ނުކުންނަން ކަމަށެވެ.
"ދަންނަވަންތޯ އެއްވެސް ހައްގަކީ މީހަކު ހެޔޮ ހިތުން ތަބަކަކަށް ލާފައި ދޭނެ އެއްޗެއް ނޫން. ހައްގުތައް ޖެހޭނީ ހޯދަން. މީގެ ކުރިން ވެސް އަޅުގަނޑުމެން ހައްގުތައް ހޯދިން. މިއަދު ވެސް އަޅުގަނޑުމެން އަނެއްކާ ނުކުމެ މި ތިބީ އެ ހައްގުތައް ކަށަވަރު ކުރަން،" އެމަނިކުފާނު ވިދާޅުވި އެވެ.
ހައްގުތައް ހޯދަން އެންމެން ނުކުންނަންޖެހޭ ކަމަށާއި ފަހަތަށް ނުޖެހި އާންމުން ނުކުމެއްޖެ ނަމަ އެ އަޑު އަހަން ސަރުކާރަށް މަޖުބޫރުވާނެ ކަމަށް ވެސް ސޯލިހު ވިދާޅުވި އެވެ.
"މިއަދު އަޅުގަނޑުމެން ކުރަންވީ ކަމަކީ އަޅުގަނޑުމެންގެ ތެރެއިން އެންމެން ކުރަންވީ ކަމަކީ، ފަހަށް ނުޖެހި ނުކުންނަންވީ. އަޑުއަހަން މަޖުބޫރުވާނެ. ރައްޔިތުން ބޭނުންވާ ގޮތަށް ކަންތައްތައް ކުރަން މަޖުބޫރުވާނެ. އަޅުގަނޑުމެން ނުވާނެ ފަހަތަށް ޖެހިގެންނެއް. ބާރު އޮތީ ރައްޔިތުންގެ އަތް މަތީގަ. އެމްޑީޕީ މިއަދު މި އޮތީ ތިޔަ ރައްޔިތުންނާ އެކީގަ. މި ހައްގުތައް ހޯދައިދިނުމަށް ކުރަންޖެހުނު ކޮންމެ ކަމެއް ކުރަން ތައްޔާރަށް،" ސޯލިހު ވިދާޅުވި އެވެ.
މިރޭގެ ޖަލްސާގައި ވާހަކަ ދައްކަވަމުން ސޯލިހު ވިދާޅުވީ، ކުރިއަށް އޮތީ ނާމާން ދުވަސްތަކެއް ކަމަށާއި އެކަންކަމާ ދެކޮޅަށް މިއަދުން މިއަދަށް ފިޔަވަޅުތަކެއް އަޅަންޖެހޭ ކަމަށެވެ.
"އަޅުގަނޑުމެންނަށް ކުރިމަތިން މި ފެންނަމުންދާ ވިލާގަނޑުން އަޅުގަނޑުމެންނަށް ފެންނަނީ ވަރަށް ބަނަ ދުވަސްތަކެއް. ބިރުވެރި ދުވަސްތަކެއް. ނާމާންް ދުވަސްތަކެއް. ދަތި އުނދަގޫ ދުވަސްތަކެއް. އަދި މިކަމާ ދޭތެރޭގައި މިހާރުން މިހާރަށް އަޅުގަނޑުމެން މަސައްކަތްތަކެއް ނުކޮށްފި ނަމަ އަނިޔާވެރި ދުވަސްތަކަކަކާ އަޅުގަނޑުމެންނާ އަނެއްކާ ވެސް ކުރިމަތިލާން ޖެހިދާނެކަން މިއަދުވެސް ފެންނަމުން އެބަދޭ،" ސޯލިހު ވިދާޅުވި އެވެ.
އެމްޑީޕީގެ މިރޭގެ ޖަލްސާ ފެށުމުގެ ކުރިން ވަނީ ގައުމީ މަޖިލީހުގެ ބައްދަލުވުމެއް ބާއްވައިފަ އެވެ. އެމްޑީޕީއަށް ސޮއިކޮށްގެން ނުވަތަ ރައްޔިތުންގެ ހައްގުގައި ވަކާލާތުކޮށްގެން މަޖިލިސް މެންބަރެއްގެ ގޮނޑި ގެއްލިއްޖެ ނަމަ އެ މެންބަރަކު އަލުން އިންތިހާބު ކުރަން އެހީތެރިވެދިނުމަށް އެ ބައްދަލުވުމުގައި ވަނީ ފާސްކޮށްފަ އެވެ.
އޭގެ އިތުރުން، ގާނޫނުއަސާސީއަށް ގެނައި ބަދަލުތައް އަނބުރާ ނުގެންދާހާ ހިނދަކު، އެކަމާ ދެކޮޅަށް މުޅި ރާއްޖޭގައި އިހުތިޖާޖު ކުރުމަށް ވެސް ވަނީ ގައުމީ މަޖިލީހުން ފާސްކޮށްފަ އެވެ. އަދި އަސާސީއަށް ގެނައި ބަދަލުތަކާ ދެކޮޅަށް ޕެޓިޝަނެއް ހަދައި ސޮއި ކުރަން ފަށަން ވެސް އެ ބައްދަލުވުމުގައި ފާސް ކުރި އެވެ.
