ގެދޮރު ބިނާކުރުމުގެ އެންމެ ގިނަ މަޝްރޫއު އެއް އަހަރު ތެރޭގައި ކުރިއަށް ގެންދެވޭ އަހަރަށް މި ފެށޭ އަހަރު ވެގެންދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މާލެ އަތޮޅު ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި ކ. ހިންމަފުށްޓަށް މިއަދު ވަޑައިގެން އެ ރަށު ރައްޔިތުންނާ ބައްދަލު ކުރައްވައި ވާހަކަދައްކަވަމުން ރައީސް މުއިއްޒު ވިދާޅުވީ އަންނަ އަހަރު ސަރުކާރުން އެންމެ އިސްކަމެއް ދީގެން ހިންގަން ނިންމާފައި ވަނީ ގެދޮރުވެރިކަމުގެ މަޝްރޫއުތައް ކަމަށެވެ.
"ގެދޮރު ބިނާކުރުމުގެ އެންމެ ގިނަ މަޝްރޫއުތައް އެއް އަހަރުގެ ތެރޭގައި ކުރިއަށް ގެންދެވޭ އަހަރަށް އިރާދަކުރެއްވިއްޔާ 2025 ވާނެ، އަޅުގަނޑުމެން ވާނީ ވަރަށް ގިނަ ރަށްރަށުގައި ގެދޮރުގެ މަޝްރޫއުތައް ހިންގުމަށް ވައުދުތަކެއް އިންތިހާބުގައި ވެފައި،" ރައީސް ވިދާޅުވި އެވެ.
ގެދޮރުވެރިކަމަށް ފަހު އެންމެ އިސްކަމެއް ދޭނީ ތައުލީމީ ދާއިރާ އާއި ސިއްހީ ހާލަތު ރަނގަޅު ކުރުމަށް ކަމަށް ރައީސް ވިދާޅުވި އެވެ. ހިންމަފުށްޓަށް ވެސް އެ ދާއިރާތަކުން ކޮށްދޭން ހުރި ކަންކަން ކޮށްދެއްވާނެ ކަމަށް ރައީސް ވިދާޅުވި އެވެ.
އެގޮތުން އެ ރަށު ސްކޫލްގެ ބައެއް މަސައްކަތްތަކާޢި ސިއްހީ މަރުކަޒުގެ ހިދުމަތް އިތުރަށް ފުޅާކުރަން ހުރި ބައެއް ކަންކަން އަލަށް ފަށާ ޕީއެސްއައިޕީ މަޝްރޫއުތަކުގެ ގޮތުގައި އަންނަ އަހަރު ފެށިގެން ދާނެ ކަމަށް ރައީސް ވިދާޅުވި އެވެ.
އެ ބައްދަލުވުމަށްފަހު ރައީސް ވަނީ ހިންމަފުށީގައި ވެމްކޯގެ ހިދުމަތް ފެށުން އިފުތިތާހު ކޮށްދެއްވައިފަ އެވެ.
